Romans 15

Ana nangata la nainimi ko me ikinakko, saki alo ago nunga ikinak ale nunga sangornakko

Ana nangamang ningi nunguning sokel ago, mu ana nanga saki alo nongomang ningi nunguning sokel mena se munan saki ko nongomang nama taiwara mu, nunga iki karowa se arungak baganakko. Ana yam nangata la nainimi ko me ikinakko. Mena. Ana nunga iki se nunga nongomang motam sokel tui se nunga sangornakko.
Rom 15:1-3 Ana nangata la nainimi ko me ikinakko: 1 Cor 10:23-24,31-33.
Kristus betela nu kota numi ko la me ikia tam. Mena. Nu kariimet nunga sangukko ikup giam. Nu numi ko iwita balam se Kaem ko batoga te aniso: “Ba,” mam, “den memek ni te ka manorman mu ani agotala aga iram.” Den suen biya girakala batagorman se aniso mu anananga kausa ko iwita. Se den umutang anananga nangamang sokel tuok se te sokel agotala sanamanak ale Kaem nanga giokko mu ko kimi bita se baganakko.

Aninga angamang mu iwita: Kaem, nu nangamang sokel tuso se te sokel ago sanamasan, mu ninga sanguk, se nengemang suwanta Jesus Kristus kowom kaoralko. Umutang te nina suen la nigiring suwan awural ale nanga Biya Jesus Kristus ko Kaem, se ko Nuet, mu nup patowaralko.

Buta se Kristus ninga kueram ale ninga giam iwitata, nina ninga saki nunga kueral ale nunga gialko, Kaem nup te barasukko. Ani iwita ninga manorsam, Kristus Juda nunga ura kari ko aratam mu ko duap iwita: mu Kaem ko den nunga taleng girigir alo nunga maonam mu ko nunguning te aratukko. Se mu te sor saki ko kariimet agotala Kaem ko gomang nungaram mu ko ikimon ale ko nup patawomonko. Se David mel mu ko iwita balam:

“Umutang ko ani sor saki ko kariimet nunga ningi ka nip patawirik,
ale ka nip te wur iluwekko.”
Rom 15:9-10 Psalm 18:49; Deuteronomy 32:43.

10 Aking batoga bo te iwita baluwoso:

“O sor saki ko kariimet, nina Kaem ko kariimet arungu amilmilaralko!”
11 Aking bo balso:

“Sor saki ko kariimet suen la Kari Biya nup patowaralko!
Imikiri suen la nup kualala biya patowaralko!”
Rom 15:11-12 Psalm 117:1; Isaiah 11:10.

12 Aking Isaiah iwita balam:

“Jesse ko gue te kari bo aratuk sanamuruk ale sor saki ko kariimet nunga bituokko.
Se nuna nu nunga sangaru taukko mu ko nongomang ningi nunguning arukko.”
13 Aninga angamang mu iwita: Kaem, nu nangamang sokel tuso, mu ninga nengemang ningi nunguning te amilmil se lila biyala ningaruk, se nina Korang Bur ko sokel te nengemang aora biya baga se, tom yawara udagi taiwoso mu ko kimi bita se bagaralko.

Paul tam gawa imi batogam wore ko duap balam (ale ko ura ko agotala balam)

14 Ani angamang ningi ninguru ninga ikiem mu nina munan ningo ago terong maman, ale ikia suen biya karogo, se ninimi kausalko terong mam. 15 Bare tam gawa imi batagem mu den saki aora nuam mu karogo balem, munan saki nina ikiman wore ningamin te tairukko. Mu awuk, Kaem gomang aisam ale 16 ani Jesus Kristus ko ura kari ko aga balam, ani sor saki ko kariimet Kaem ko den gilalong yawara nunga manikko. Se Korang Bur kariimet umutang laili nunga awurok, se ani (priest iwita...???) nuna Kaem tama tua iwita Kaem kuting te nunga awurekko.

17 Ani Jesus Kristus ko sokel te Kaem ko ura bitakasam, ale ura mu ko am amilmilirikko. 18 Ani mel bo ko me balikko. Bare sor saki ko kariimet Kaem kuring karo tumonko nunga manaruwakasam se Kristus aninga ura ningi munan bitakaso mu la balikko. Nu ani mel bitakasam ale den balukasam mu te aga saongam. 19 Ale sokel aisam se kilek duap duap bitakasam. Se Korang Bur betela sokel aisukaso. Buta se ani Jerusalem ningi Kristus ko dugu duap apura duap beterem, ale ninguru balu balu geragem tai Illyricum aratem. 20 Aninga ikia biyala sor Kristus ko me ikisan mu te la ko dugu duap balikko. Mu awuk, aninga singsang nunga ngatalek awete kawam kalikko me ko kuesam. 21 Prophet mel mu ko iwita giram balam:

“Saki alo me ko nunga manorman, mu ko ikimon aringimonko.
Saki alo me ko ikiman, mu ko ikimonko.”
Rom 15:21 Isaiah 52:15.

22 Butata se ura imitang aninga kalokaso se ani nengete me taikasam. (NIV and NLT position. Some put this sentence with next paragraph)

23 Bare aitak aninga ura sor mu te bita saperem. Ani yar suen biya nengete tairikko ikikasam. 24 Se aninga ikia tairik ale tom katirta nengerak baga, Spain namirikko mu aga saongal se namirikko.

25 Bare aitak mu ani girek Jerusalem namirik, ale Kris alo munan nungarikko. 26 Mu awuk, Jerusalem ningi Kris saki mel ko tukunang aman ale anisan. Se Macedonia se Achaia Kris alo nunga sangarmonko balman ale ko munan bolala awuman wore ani giek ale ago nama nungarikko.
Rom 15:26 Nuguting munan ago nama Jerusalem Kris alo nungarmonko: 2 Cor 8:1-4; 9:1-5.
27 Nuna nongota betemonko balman, ale amilmil ago beteman. Bare nuna Juda alo mu am nunga sangarmonko. Mu awuk, Juda alo munan sang sor saki ko kariimet nunga marak sangukko wore nungarukasan. Se ko koma, nuna Juda alo ali imi ko mel te am nunga sangarmonko.

28 Se ani ura imi menawurik ale nunga munan aisiman mu ago nama nungarik, mu ani Spain namirikko umutang tairik ningarki se namirikko. 29 Ani ikisam, tom ani nengete tairik, mu ani Kristus ko marak, ko lila yawara biyala ago tairikkowo.

30 O aga singsang, nina nanga Biya Jesus Kristus ko kuesan, ale Korang Bur te ani ago ko kuesan tala. Buta se ani ninga isarsam, ani agarak biguwural ale ani ago ko ninguru Kaem ngatongalko, 31 nu Judea ningi kariimet Kristus nubiring tuman mu nunga ningi aga sinar taukko. Se betela aninga ura Jerusalem ningi bitirikko mu Kris alo ko kuemonko.
Rom 15:31 Kris supuling alo amilmil ago la Paul taman: Acts 21:17-25. Bare Juda saki mu Paul momonko kaeman: Acts 21:27-36.
32 Asele Kaem ko gomang buta aniruk agi mu, ani amilmil ago la nengete tairik ale tom katirta aeman sapa se nengerak bagirikko. Kaem, lila yawara ko duap, mu nina suen la nengerak bagurukko. Nunguning.

33 

Copyright information for `WSK