Romans 16

Paul ko amilmil den saki Rome nongote beteram

Cenchrea imet bo, Phoebe
Rom 16:1 Nunup ilagala imi ko bala iwita: Senkria, Fibi.
, mu nengete Rome namurukko tom pingi aram. Nu Cenchrea Kris alo nunga ningi ura ningo tam.
Se ani iwita ninga manorsam, nina Jesus Kristus nup te ninga bo iwita tal ale ko kueralko. Nu anapeya mel ko tukunang aruk mu am saongalko. Mu awuk, nu kariimet suen biya nunga sangarukaso, ale ani karogo la aga sangarukaso.

Aninga amilmil den Priscilla, ko kuari Aquila ilak nunga maonalko.
Rom 16:3 Priscilla Aquila ilak: Acts 18:2,26. Nunga nunup bala mu iwita: Prisila, Akwila.
Nuna Jesus Kristus te aninga ura suwan.
Nuna aninga sangarmonko nongota nunumi memek ningi beteman. Se ani nuna nogo ko ninguru amilmilasam. Bare ani la mena, sor saki ko Kris alo ago la amilmil nungarukasan. Se aninga amilmil den Kris alo saki nunga kawam te pempem biguwusan, mu ago nungaralko.

Aga bo yawara Epenetus, Asia batoga ningi nu giram Kristus ko gomang ningi nunguning aram, mu aninga amilmil den maonalko.
Ale aninga amilmil den Maria ago tualko. Nu nenenga ningi ura ninguru tokaso. Ale Andronicus Junias ilak, aninga gue suwan, nuna ani agarak talipara ningi bagakasan, mu aninga amilmil den ago nunga maonalko. Nuna ilagala apostle yawara, nuna giriman Kristus ko nongomang ningi nunguning aram, se ani udagi.

Ampliatus amilmil den ago tualko. Nu Kari Biya ko munan te aninga bo yawara. Kristus te anananga ura suwan Urbanus
Rom 16:9-11 Nunup imi ko bala iwita: Ebanas, Stakis, Apeles, Aristobyulas, Herodion, Nasisas.
, se aninga bo yawara Stachys, mu amilmil den ago nunga maonalko.
10 Se kari ari imitang mu betelatala: Apelles, nu ikup arikaso bare am Kristus kowom karokaso; Aristobulus ko kawam te ko bagara suwan; 11 Herodion, aninga gue suwan; se Narcissus ko kawam te Kris kariimet alo bagasan, mu suen la aninga amilmil den nungaralko.

12 Se imet ilagala Tryphena se Tryphosa
Rom 16:12-15 Nunup imi ko bala iwita: Traifina, Traifosa, Pesis, Rufas, Asinkritas, Flegon, Hemes, Patrobas, Hemas, Filologas, Julia, Nerias, Olimpas.
, nuna Kari Biya ko ura yawarakala tasan mu, se imet ningo Persis, nu Kari Biya nup te ura kowar ago tam, mu aninga amilmil den nunga maonalko.
13 Rufus, Kris kari yawara, se ko nuam, ani noko kuriang iwita ninguru aga sinar tokaso, mu aninga amilmil den nungaralko.
Rom 16:13 Rufus: Mark 15:21.
14 Asyncritus, Phlegon, Hermes, Patrobas, se Hermas, se Kris launuria arungu bagasan, mu suen la aninga amilmil den nungaralko. 15 Se Philologus Julia ilak, se Nereus ko koras ilak, se Olympas, se Kaem ko kariimet suen la arungu bagasan, mu aninga amilmil den nunga maonalko. 16 Se nina betelatala, ninimi ko ninguru kua se ninimi nigiting iluwalko. Kris kariimet alo suen la nunga amilmil den ningarsan.

Paul ko den nukum

17 O aga singsang, ani ninguru ninga manorsam, nina den nunguning maingkala taman, bare sinar talko! Kari saki den kelemak ninga kasurmon ale ngual ningarmon se paoga kirker aratuk bore ko, ninguru sinar talko. Nibiring nungaralko! 18 Kari ari uwuta mu anananga Biya Jesus Kristus ko ura kari nunguning mena. Mu nuna nongota nunga ikia karo tusan. Ale nononga den yawara, nunga den welang te kariimet kilek ningo se memek wore ninguru me ko ikia mu nongomang kulukursan. 19 Kariimet suen biya nina Kaem ko den karo tusan mu ninga ikiman, se umutang ko ani ninguru nina nego ko amilmilasam. Bare ani nina munan ningo ko ninguru ikialko, ale munan memek ko me ikialko angamang aniso. 20 Se Kaem, lila yawara ko duap, mu tom katirta Satan kutuwu sapuruk se nisiwik duap ningi dagulokko.

Nanga Biya Jesus Kristus ko marak sokel nengerak bagurukko.

Kari saki nunga amilmil den Rome nongote beteman

21 Se aninga ura suwan Timothy
Rom 16:21-23 Timothy: Acts 16:1. Gaius: Acts 19:29; 1 Cor 1:14. Nunup saki nunga bala mu iwita: Gaias, Lusias, Jeson, Tetias, Erastus, Kwatas.
ko amilmil den ningarso. Se aninga gue suwan Lucius, Jason, se Sosipater betelatala.

22 Ani Tertius, Paul ko kuring taem ale tam gawa imi batagem, mu Kari Biya nup te aga amilmil den ningarsam.

23 Se Gaius ko amilmil den ningarso. Nu ko kawam te ani ninguru aga bitarso, ale imi te Kris alo suen la buta tala nunga bitarso. Erastus, wonong imi ko manga bitua kari, se nanga bo Quartus, mu agotala nunga amilmil den ningarsan. 24 
Rom 16:24 Den saki girakala batagorman mu te den imi ago aniso: “Nanga Biya Jesus Kristus ko marak sokel nina suen la ningarukko. Nunguning.”


Kaem ko den gilalong yawara mu te sokel nangarukko

25 Ana Kaem ko nup patowanakkowo! Nu den gilalong yawara ani apusam, den Jesus Kristus ko balso, mu te sokel ningarukko terong mam. Den nunguning umutang girakala yumura te anikaso, 26 bare aitak Kaem wetang te beteram. Kaem tom suen biya bagoso mu kota balam, se den girakala prophet bataguru beteman mu ana sor suen biya ko kariimet nunga manaruwasan, umutang te nuna ko nongomang ningi nunguning aruk se kuring karo tumonko. 27 Kaem suwanta umutang, nu kota ikia suen biya karogo, mu ana Jesus Kristus te ko nup tom suen biya patawu se laganakko! Nunguning.

Copyright information for `WSK