Romans 2

Kaem kariimet suen biya diram la nunga tuterukko

Se aga bo, ni saki alo nunga bagara tutesam e? Bare ura sumu ni bitarko mena! Mu ni saki alo nunga bagara tutesam mu ni keta nimi den ningi betesam. Mu awuk, kilek memek nuna betesan wore ni agotala betesam.
Rom 2:1 Tutera ura mu anananga ura mena: Mat 7:1-2.


Ana ikisan, Kaem tutera ura diram la beteso ale kariimet kilek memek memek umutang betesan mu diram la ko koma memek nungarso. Se aga bo, ni den te nunga atumusam bare ni keta uwutatala betesam mu ko awuk ikisam? Kaem umu ko memek me kisok i? Mu ni me giris palage mu nu memek ni kisokkowo! Kaem ni ko ko yawarakala beteso ale kam maiya biya ni giris palageko kimi kisiso, ale ka memek koma tairate me kisiso. Bare ni mel mu mel yam ko balsam e? Kaem giris palageko munan yawara kisiso bare ni me ko ikisam agila pa?
Rom 2:4 Kaem kariimet giris palagomonko kimi nungarso: 2 Peter 3:9.
Nika ikia aora biya se me giris palagasam. Se tom Kaem kariimet diram la nunga tuteruk ale ko gomang magara wetang te bitirukko, mu ni ko koma memek biyala tokowo!

Kaem kariimet suen la aguwaya bita lagakasan mu te iki se ko koma diram la nungarukko.
Rom 2:6 Psalm 62:12; Pro 24:12.
Se kariimet tom suen biya bagara ningo nup ago duruk te Kaem ilak te bagomonko mu tamonko karogo kaesan ale kilek ningo bita lagasan, mu Kaem marak ningo tom suen biya te bagara ko mu nungarukko. Bare kariimet nongota nunumi ko la sinar tasan, ale munan nunguning nubiring tusan ale kilek memek karo tusan, mu nuna Kaem ko gomang magara aringimonko. Arikaya memek bita lagasan mu yaman ikup biyala nunga irokko, Juda alo girimon se, sor saki udagi. 10 Bare arikaya munan diram bita lagasan, mu Kaem bagara ningo, nup biya, se nongomang lila ago mu nungarukko, Juda alo girimon se, sor saki udagi. 11 Mu awuk, Kaem sor suen biya ko kariimet, Juda ta, Juda kariimet mena ta, munan koma suwanta te la nunga tuterukko.
Rom 2:11 Kaem kariimet suen la diram la nunga tuterukko: Acts 10:34-35.


12 Kariimet Kaem ko Law Den me ikisan ale kilek memek betesan, mu ko moke, nuna tutera kam te memek tamonko. Bare nu ko den mu ko iki se me nunga tuterukko. Se aking kariimet noko Law Den ikisan ale kilek memek betesan, mu nu den mu ko iki se nunga tuterukko.

13 Mu nina ikisan, kariimet Law Den ikisan bare me karo tusan, mu Kaem nunga baluk nuna kariimet ningo diram ma me balukko. Mena. Kariimet den mu ikisan wore nunga ningi, arikaya den mu karo tusan umutang la Kaem nunga baluk kariimet ningo diram maukko.
Rom 2:13 Den am ipi me ikinakko: Mat 7:21; James 1:22.


14 Sor saki ko kariimet nuna Kaem ko Law Den mu me ikisan, bare nuna nongota nunga ikia te munan saki den mu te karogo ko baluwoso wore betesan. 15 Se mu te ana ikisan, Law Den te munan ko baluwoso, mu Kaem munan mu nunga nongomang ningi ago bataguru beteram. Se nuna munan ago bagasan mu ko kausa bo tala mu iwita: nuna nongota nunga bagara aolak tutesan. Nunga ikia mu nunga manarso, sumu memek betesan, sumu diram betesan mu nunga manarso.

16 Buta se, maingte, tutera tom te, Kaem Jesus Kristus te kariimet suen biya uwutata nunga tuterukko, nunga ikia yumura te se, nunga bagara te diram la nunga tuterukko. Se den gilalong yawara ani balsam mu uwutata baluwoso.

Juda alo saki Law Den te nunumi patawukasan, bare me karo tuikasan

17 Ni Juda kari agi mu, ani den sang ka manikko. Ni nimi balsam “Ani Juda” ma balsam. Ale ikisam, ni Law Den karo tui ale te sokel ago sanamirko ikisam. Ale nimi patowasam ale balsam, “Ani Kaem ko kari,” masam. 18 “Ani maingkala noko Law Den ko ikia taem, ale ko ikia gomang ikiem. Buta se ani munan awuk bore ningo mu ani ko ikisam,” masam. 19 Ale “Ani Law Den te ikia nunguning ko duap maingkala ikiem. Buta se ani kariimet nomotam mena alo mu lage nunga kausekko. Kariimet tiromorom ningi mu nunga nikim ani,” ma nimi balsam ale “Ani kariimet ikia mena mu ikia nunga kausekko, ale ani kuriang gotektek nunga kausa kari,” ma nimi balsam. 21 Ale ni kariimet sang nunga kasursam.

Bare awuk se keta nimi me kasursam? Ni kari sang me tere namonko balsam, bare ni keta mu karogo tere nasam agila?
22 Ni balsam kari mu imet arungu me tere namonko masam, bare ni keta arungu tere nasam tala agila? Ni kaem kawel ko me kuesam masam, bare ni kariimet Kaem nunguning ko me ikisan mu nunga temple ningi mel saki ago tere nasam agila? 23 Ni nimi patowasam ale balsam, ani Law Den ikisam masam. Bare ni keta den mu kiasam ale te Kaem ko nup maguwusam tala agila! 24 Kaem ko batoga te aniso iwitata: “Nenengeta Juda ninga betera kaora memek te, sor saki ko kariimet nuna Kaem ko nup balu maguwusan.”
Rom 2:24 Ezekiel 36:22-23.


25 Ni Juda kari, se tom ni mimili bagerem mu nuna Kaem ko den te balam iwitata, nika kimik guang batagorman. Se ni Law Den karo tui, mu nika kimik guang batagorman mu nunguning karogo. Bare ni den mu me karo tui, mu ko ikia ni kimik guang me batagorman iwita, ni kari Kaem ko me ikiso wore turan.

26 Se kari nungumik guang me batoga, bare nuna munan diram Law Den te ko baluwoso mu karo tusan, mu Kaem awuk nunga ikiokko? Mu nu nunga ikiok nuna kari nungumik guang batoga iwita ma nunga balukko, ale nuna noko kari ma nunga balukko. 27 Se ni Juda kari, ni Law Den batoga te aniso mu ko ikisam, se ka kimik guang batagorman, bare ni ko den sang me karo tui agi mu, kari nungumik guang me batoga wore munan diram karo tusan umutang ni den atumu kisimonko.
Rom 2:26-27 Nungumik guang batoga ko munan: 1 Cor 7:19; Gal 5:6; 6:15. Ali sor saki ko kariimet Kaem ko den ikimonko kuakasan: Luke 11:31-32.


28 Mu awuk, (ikialko): / Ninguru ikialko: kari kumik guang batoga te la nu Juda kari nunguning ko me bagoso. Se kumik guang batoga ko munan mu munan kumik guang ko la mena tala. Mena. Bare kari Korang Bur ikia memek noko gomang ningi mu menawu saparam, kari umutang Juda nunguning. Se Law Den (batagorman se aniso mu) kari sangarso se mel mu me aratoso. Mena. Mu Kaem ko Korang Bur ura mu beteso. Se kari uwuta mu kariimet nup me patawomonko. Bare Kaem mu asele kari uwuta mu nup patawurukko.
Rom 2:28-29 Juda kari nunguning alo: Deut 10:16; 30:6; Jer 4:4; 9:25-26.


29 

Copyright information for `WSK