Romans 3

Kaem munan diram la beteso

Buta se Juda alo munan saki te sor saki ko kariimet nunga kiaman agi mena? Se nungumik guang batoga ko munan te mel yawara ago e?

Se!! Juda alo mel saki te mu nuna gira. Mel motam la mu Kaem ko den nuna ko sinar tamonko nungaram.
Rom 3:2 Psalm 147:19-20 uwutatala balso.


Bare nunga sang den mu me karo tuman se umutang ko, Kaem kota ko den me karo tuok i?

Mena! Nu karo tuokko. Kariimet suen biya kawel kari, bare Kaem nu den nunguning ko kari. David Kaem ko batoga te noko iwita balam se aniso:

“Se ni aga memek ko aga manorsam mu ni diram balsam.
Ni den te aga atumusam mu ni diram betesam.”
Rom 3:3-4 Psalm 51:4. Kaem ko den balam mu karo tuso: Rom 9:6; 11:29; 2 Tim 2:13.

Se ana munan diram me betesan mu Kaem ko munan diram nunguningkiri wore wetang te beteso. Se mu ko ana awuk balnak i? Agi balnak, Kaem anananga memek betesan wore ko koma memek nangarso, bare nu diram me beteso, ma uwuta balnak e? Mu mena! Kariimet sang uwutata balsan, bare nononga ikia diram mena, mu ikia kawel! Kaem munan diram beteso. E Kaem munan diram me bitiruk, mu nu kariimet lilim la awuk ta nunga tuterukko? Mena.

Agi kari bo agarak den tagirok ale iwita balukko agila? “Se aninga munan kawel mu Kaem ko munan nunguning wetang te bitiruk se nu te nup biya tauk, mu awuk se nu baluk ani memek kari ma aga baluk ale memek aisukko?”

Bare nu uwuta aga manuk agi mu, nu am ngual iwita balukko: “Ana kilek memek betenak se munan ningo te aratukko”! Kariimet sang aip maguwusan ale balsan, den mu ani agata balsam se ikisan masam. Bare mena! Nuna kawelasan. Mu nuna memek tamonko terong mam, se Kaem memek nungarukkowo!

Sor suen biya ko kariimet Kaem koma te bo diram mena

Se awuk? Ana Juda mu Kaem koma te sor saki nunga kiaman agi mena e? Mena! Ani maingkala ta ninga kausem, Juda se sor saki ko kariimet mu suen la nunga memek bowa ningi anisan. 10 Kaem ko batoga te aniso iwitata:

“Bo ta diram nunguning mena, am mena,
11 ale bo ta ninguru me ikiso,
ale bo ta Kaem me kupuso.
12 Suen la Kaem nubiring tuman ale maga muruwuman.
Bo ta munan ningo bo me beteso, am mena biya.
Rom 3:10-12 Psalm 14:1-3.

13 Nunga nodogotak nuguring kuera ko mutim iwita,
se nunga nungamili mu den kawel te balsan.
Ale nogore sumulak te mu urer ko kuating memek kari te nunga moso se kuesan mu tuar mu te aniso.
Rom 3:13,14,15 Psalm 5:9; Psalm 10:7; Isaiah 59:7-8.
QQQ Compare 13b with Psalm 140:3b.
14 Nunga nuguring mu kari maguwura ko den ago terong mam.
15 Nunga nusuwik nuguting mu kari te momonko tairate pitikoso.
16 Nuna aolak ilusan mu mel suen biya maguwu se la.
17 Ale nongomang suwanta bagara lila ko ikia nongote mena.
18 Nuna Kaem ko me nguangasan, am mena.
Rom 3:18 Psalm 36:1.

19 Ana ikisan, den suen biya Kaem ko batoga te aniso mu kariimet den mu taman wore nunga atumuso ale balso. Buta se kari bo ta baluk ani kari ningo diram ma balukko mena. Ana sor suen biya te ko kariimet, Juda ta, Juda mena ta, mu ana Kaem koma te memek ago la. 20 Se kari bo ta Law Den karo tuok se Kaem te baluk nu kari ningo diram ma balukko mu mena. Bare Law Den mu anananga memek wetang te beteso se ko ikisan.
Rom 3:20 Law Den anananga memek wetang te beteso: Rom 7:7; Gal 2:16.


Kaem kariimet nunga memek siwurokko Jesus te tama beteram

21 Bare aitak Kaem lage nu te nanga baluk ana kariimet ningo diram ma balukko mu wetang te nanga kausam. Se lage umu mu law den karo tua ko me balso. Bare Moses se prophet alo nunga den te lage imi ago ko balukasan. 22 Se lage mu iwita: kariimet Jesus Kristus ko nongomang ningi nunguning aruk, mu Kaem nunga baluk kariimet ningo diram ma nunga balukko. Kariimet saki lage bo kigilik, se saki lage bo kigilik mu mena, suen la koma suwanta. 23 Mu awuk, ana suen biya memek beteman, se Kaem ilak duruk wonong te baganakko me terong. 24 Bare Kaem kota aking gomang nangaram, ale ura Jesus Kristus te nanga dia taukko beteram mu te ana kariimet ningo diram ma nanga balam.
Rom 3:22-24 Lage Kaem kagaru nangaram: Gal 2:15-16; Eph 2:8-9.


25 Kaem anananga memek siwurokko Jesus te tama beteram, noko gue ana nago ko kaparam mu ko ana nangamang ningi nunguning aruk se Kaem nanga memek siwurokko. Jesus tam kangono te me kueram la, kariimet kilek memek bitakasan, bare Kaem am nungarkiwakaso, koma memek me nungarukaso. Bare tom Jesus kueram mu te, Kaem nu laili kako nunguningkiri mu numi wetang te beteram. Noko munan diram la. Se nu kari awiriya Jesus ko gomang ningi nunguning aso, mu nu balso kari mu kari ningo diram ma balso.

27 Buta se, lage anananga nainip te patowanakko mu apoko ya? Menatawo! Lage mu sisiram. Se anape mel lage mu kaolam? Agi law den karo tua ko munan lage mu kaolam e? Mena. Nangamang ningi nunguning ko munan nainimi patowara mu menawuram. 28 Mu awuk, ana iwita balsan, Kaem anananga nangamang ningi nunguning te kariimet ningo diram ko nanga balso. Mu ana law den karo tusan mu ko koma iwita mena.

29 Agi Kaem mu Juda alo nunga Kaem la e? Ale nu sor saki ko kariimet nunga Kaem mena e? Mena. Mu nu sor saki ko kariimet mu nunga Kaem agotala. 30 Mu Kaem suwanta. Se nu Juda alo / nungumik guang batoga alo nunga nongomang ningi nunguning te nunga balso kariimet ningo diram maso, ale sor saki ko kariimet / kariimet nungumik batoga mena alo mu betelatala, nunga nongomang ningi nunguning te tala nunga balso kariimet ningo diram ko nunga balso.

Mu butata. Se ana nangamang ningi nunguning ko munan te Law Den mu menawusan e? Mena nunguning, mena. Mu ana Law Den sokel tusan.
Rom 3:31 Jesus Law Den ko munan bita kutuwuram se ana noko sokel te munan Kaem ko kueso mu karo tusan: Rom 8:4; Phil 4:13; Mat 5:17-19.


31 

Copyright information for `WSK