Romans 4

Abraham ko gomang ningi nunguning te Kaem balam nu kari ningo diram mam

Se anananga girigir Abraham, ko gue te ana Juda kariimet, mu ana nu ko ko awuk balnak? Mu ana iwita ko balnakko: Abraham munan ningo bitakaso mu ko Kaem noko balam kari ningo diram ko ma me balam. Mena. Uwuta ale mu, Abraham munan bitakaso mu ko numi patawurukko terong ale. Bare nu Kaem koma te numi patawurukko me terong. Mu awuk, Kaem ko batoga te iwita noko balso: “Abraham Kaem ko den ko gomang ningi nunguning aram, se noko gomang ningi nunguning mu te Kaem noko balam kari ningo diram mam.”
Rom 4:3 Abraham gomang ningi nunguning: Gen 15:6.


Ana ikisan, kari ura iluso se ko koma tusan, mu ana munan ko iwita me balsan. Mena. Mu nu ura taso wore ko koma. Bare Kaem anananga balso kariimet ningo diram ma nanga balso, mu anananga ura koma iwita mena, mu Kaem munan nangarso. Ana kariimet memek, bare ana Kaem ko nangamang ningi nunguning aso, se umutang te Kaem anananga balso kariimet ningo diram maso.

Se David betela balam, kari awiriya munan ningo agi memek agi bitakaso bare Kaem nu ko balso kari ningo diram ko ma balso, mu kari umutang amilmilurukko. David iwita balam:

“Kariimet nunga memek Kaem siwu saparam mu amilmilomonko,
arikaya nunga ikup Kaem kutuwu saparam mu amilmilomonko.
Kari awiriya memek beteram, bare Kari Biya siwuram ale balam, udagi me ko balikko mam,
mu kari mu amilmilurukko.”
Rom 4:7-8 Psalm 32:1-2.

Agi amilmil David ko balam imi mu kari nungumik guang batoga wore la nunga e? Mena. Arikaya nungumik guang me batoga bare mu ago la amilmilomonko. Ana Kaem ko batoga te ko ikiman, Abraham ko gomang ningi nunguning mu te Kaem nu kari ningo diram ko balam. 10 Se tom awuk mu te mel mu aratam? Abraham kumik guang me batoga la aratam agi udagi e? Mena. 11 Mu Abraham kumik guang me batoga la, nu Kaem ko gomang ningi nunguning aram, se Kaem nu kari ningo diram ko ma balam. Se ko kausa mu nu kumik guang batagorman.
Rom 4:11 Abraham ko kumik guang batagorman: Gen 17:10.


Se umutang ko, Abraham mu kari arikaya nungumik guang me batoga bare Kaem ko nongomang ningi nunguning se Kaem nunga balam kari ningo diram mam, umutang nunga girigir Abraham.
12 Ale nu kari sang nungumik guang batoga wore nunga girigir tala. Bare nungumik guang batoga alo mu nunga ningi, arikaya tom Abraham kumik guang me batoga la gomang ningi nunguning te bagakaso iwitatala bagasan, umutang la nunga girigir.
Rom 4:12 Abraham ko kuriang nunguning: Mat 3:9; Gal 3:7,18,29.


13 Girakala Kaem Abraham se ko taleng girigir arungu den nunga maonam, “Ali lilim la mu ningarikkowo,” mam. Bare nuna law den karo tua ko lage te den mu ko nunguning me aringimonko. Mu Kaem nunga nongomang ningi nunguning te nunga baluk kariimet ningo diram ma nunga baluk se umutang te nuna den mu ko nunguning aringimonko.e

14 E kariimet law den karo tua ko lage te den Kaem Abraham ilak kaolam mu ko nunguning aringimonko ale mu, nangamang ningi nunguning mu mel yam ale. Se betelatala Kaem ko den Abraham ilak kaolam mu ko nunguning mena tala ale. 15 Mu awuk, kariimet suen la law den kiasan, ale umutang te noko gomang magara tagi nungumik kuali betesan. E law den bo mena ale mu asele, ana den kiasan ma me balnakko.

16 Buta se, Kaem Abraham ilak den kaolam mu nu Abraham am gomang tuam ale den ningo umutang nu maonam, umutang te Abraham ko taleng girigir suen la nunga nongomang ningi nunguning te den mu ko nunguning aringimonko. Bare saki Law Den mu karogo bagasan mu la mena, saki alo Abraham turan nongomang ningi nunguning bagasan mu ago la. Mu awuk, Abraham ana kariimet nangamang ningi nunguning mu ana suen la nanga girigir. 17 Kaem nu maonam se batoga te aniso iwitatala: “Ani ni ali sor lilim la nunga girigir ko ka balsam.” Mu Abraham Kaem ko gomang ningi nunguning aram se Kaem noko uwutata balam. Kaem umutang kariimet kuesan mu marak nungarso, ale mel uwuta ko mena wore nu balso mu butata aratoso.

18 Se Abraham Kaem mel bitirukko mu ko nu maonam mu ko lage me arikaso. Bare nu Kaem den maonam mu ko gomang ningi nunguning aram se nu maingkala la lage ariga iwita bagakaso. Umutang te nu kariimet motam suen la nunga girigir nu. Kaem maonam butata, “Ka girigir alo butata aratomonkowo!” 19 Abraham ko yar mu 100 taukko pingi aram. Se ko kumik guang mu sail menaram ale kua ko iwita. Se Sarah mu karogo la garukaram ale kuriang bo iluwokko me terong. Se Abraham mel mu ko ikikaso, bare noko gomang ningi nunguning me sokel menayakaso, am sokel ago bagakaso. 20 Se mel udagi aratukko Kaem balam mu nu ko gomang me nama taikaso. Mena. Noko gomang ningi nunguning aora biya. Se nu Kaem nup patawukaso. 21 Ale nu ikiam, Kaem mel bitirukko nu maonam mu bitirukko terong mam. 22 Umutang ko, Abraham ko gomang ningi nunguning te, Kaem nu ko balam kari ningo diram ko balam.

23 Se den Kaem te Abraham ko balam, “kari ningo diram” ko ma balam, mu den mu Abraham ko la mena. 24 Mu anananga agotala. Mu awuk, ana Kaem ko nangamang ningi nunguning aram, Kaem borta nanga Biya Jesus Kristus patowaram se barasam.

Nu nanga baluk kariimet ningo diram ko nanga balukkowo.
Kaem Jesus beteram se anananga memek ko moman se kueram. Se Kaem ana te nanga baluk kariimet ningo diram ko nanga balukko aking patowaram se barasam.

25 

Copyright information for `WSK