Romans 6

Ana Kristus ilak kueman ale aking Kristus ilak barasaman, marak sokel iru te la baganakko

Kaem ko gomang lila sokel ago nanga ira murso. Buta se nina awuk ikisan? Ana kilek memek am bita se baganak se Kaem gomang biyala nangarukko mu terong e? Mena! Ana Kristus ilak kueman ale kilek memek nabiring tuman. Se ana kilek memek aking bita se baganakko mu me terong!

Mu nina ikisan, ana Kristus nup te anuwa taman mu ana nu ilak biguwuman ale ilak kueman iwitata. Ana anuwa taman mu ana Kristus ilak kueman, ale ana nu ilak nanga mutim tuguman, umutang te Ba Kaem ko marak sokel ago wore te Kristus patowaram se barasam iwitatala, ana barasanak ale munan iru te aolak ilu se baganakko.
Rom 6:3-7 Ana Kristus ilak kueman ale ilak barasaman: Gal 2:19-20; 3:27; Phil 3:10-11; Col 2:12.


Ana nu kueram iwita ilak kueman. Buta se uwutatala, ana nu barasam iwita ilak barasanakko. Kari kueso mu nu udagi kilek memek ko dungan me bagoso iwitatala, ana iwita ikinakko: ana Kristus ilak kueman se anananga ikia memek te bagakasan mu Kristus ago tam kangono te kueram ale ko sokel menawuram, umutang te ana kilek memek ko ura dungan kariimet me baganakko.

Ana Kristus ilak kueman. Buta se ana nu ilak baganakko mu ko nangamang ningi nunguning. Mu awuk, ana ikisan, Kristus barasam ale udagi me kuerukko. Nu kua namara ko munan se ko sokel bowa ningi me bagoso. 10 Nu tom suwanta ko kueram, ale nu kueram umutang te kilek memek ko sokel menawuram. Ale nu aitak marak bagoso mu nu Kaem ilak bagoso.
Rom 6:9-10 Kristus tom suwanta ko kueram, ale tom suen biya bagurukko: Rev 1:18; 1 Peter 3:18.
11 Se mu turantala, nina nengeta ninimi te ikialko, nina kueman, ale aitak kilek memek ko sokel bowa ningi me bagasan. Mena. Nina Jesus Kristus te Kaem koma te marak bagasan.

12 Buta se, nina kilek memek ko bowa ningi me bagaralko! Ale ninga ningimik guang karogo kueralko sumu ko ikia memek me karo tualko. 13 Ninga ningimik ko nuamur bo kilek memek ko ura te me beteralko. Mena. Nina kariimet kueman ale aking barasaman iwitata, nengeta ninimi Kaem kuting te awural ale, ninga ningimik nuamur suen la mu noko munan diram mu ko ura te la beteralko.
Rom 6:12-13 Ana kilek ningo la betenakko: 1 Peter 2:24; Rom 12:1.
14 Mu nina aitak kilek memek ko sokel bowa ningi me bagasan. Mu awuk, nina Law Den bowa ningi me bagasan. Mena. Mu nina Kaem ko gomang lila te bagasan.
Rom 6:14 Ana Kaem ko gomang lila te bagasan: John 1:17.


Ana munan diram ko ura kariimet

15 Ana aitak Law Den bowa ningi me bagasan, ana Kaem ko gomang lila te bagasan. Buta se ana awuk manak? Ana am kilek memek betenak e? Mena! 16 Mu nina ikisan, nina kari bo kuting te ninimi awusan, ale ko kuring karo tusan, ale ko ura dungan betesan, mu nina kari mu ko ura dungan kariimet bagasan. Se nina kilek memek ko dungan kariimet bagaral, umutang te nina nama sarenga namaralko. Bare nina Kaem ko kuring karo tui se bagaral, umutang te Kaem kariimet ningo diram ko ninga balukko.
Rom 6:16 Ana ura dungan iwita me baganakko, Kaem ko la baganakko: Mat 6:24; John 8:34-36; 2 Peter 2:19.


17 Bare ana Kaem ko nup patowanak ale amilmil tunakko! Mu awuk, nina ulengkala kilek memek ko ura dungan bagaman, bare Kaem ko den ningaram se ikiman ale ninguru karo tuman. 18 Nina munan memek bowa ningi bagaman, bare aitak Kaem ninga bataguru tam, ale munan diram ko ura kariimet ko ninga awuram. 19 Nenenga ikia me sinar woreso se umutang ko ani kari nunga ikia te den imi ninga manorsam. Nina ulengkala ikup memek ko dungan ko ninimi beteman ale memek duap duap bitakasan. Bare aitak nina munan ningo diram ko ura kariimet ko ninimi beteral ale kako laili bagaralko.

20 Tom nina munan memek ko ura dungan bagakasan, mu nina munan ningo ko ura kariimet me bagakasan. 21 Ale nina munan memek aitak ko dola se bagasan umu ningi anape yawara tokasan? Mena. Munan umutang mu te nama kuera ko wore! 22 Bare Kaem nina kilek memek ko ura kariimet ko bagaman mu ninga giam ale nu kota ko ura kariimet ko ninga awuram. Se nina mel ningo talko mu iwita: bagara kako laili se marak ningo tom suen biya te bagara ko umutang talko. Munan memek ko koma mu sarenga namasan. Bare Kaem ko munan nanga Biya Jesus Kristus te am nangarso mu marak yawara tom suen biya te bagara ko.

23 

Copyright information for `WSK