Titus 2

Kariimet garuk se kulak nunga den

Bare ni mu munan aguwaya Kaem ko den gilalong yawara ago terong maso mu la kariimet nunga manaru sagerko. Kari garuk mu iwita nunga manaruko: nuna yu nana ngualara mena, nuna ikia diram la tamon, ale nunga bagara aolak ko ninguru sinar tamonko. Nuna den nunguning ko ninguru ikimon ale nongomang ningi nunguning aruk, se mel suen biya nunumi ko kua se nongomang lila te betemonko.

Se koma suwanta tala, imet garuk iwita nunga manaruko: nononga bagara aolak mu munan ningo diram te la bagomonko. Nuna saki alo me nunga balu maguwumon, ale nuna yu waen ko dungan ko me bagomonko. Mena. Nuna kilek ningo la betemon se saki alo aringimon ale agotala te betemonko. Se uwutata bita se imet kulak itiwik mu iwita nunga manarmonko: nuna nunga nugari se nunga kuriang ninguru nunga kuemonko. Ale nongota nunga ikia se nunga bagara aolak ko sinar tamon, ale diram la bagomonko. Ale nuna nunga kawam yawarakala bitarmon, ale nugari nobowa ningi bagomonko. Se mu te saki alo nuna nungumik te Kaem ko den me balu maguwumonko.
Titus 2:3-5 Imet nunga den: 1 Tim 3:11; Eph 5:22.


Se koma suwanta tala, kari kulak nunga manaru se nunga ikia se nunga bagara aolak ko ninguru sinar tamonko. Se mel suen biya te ni keta ka bagara aolak ko kausa yawara bitar se nuna aringimon ale te betemonko. Se Kaem ko den nunga kasuruko mu nika gemang ningi nunguningkiri te am garagarayam nunga manaruko. Ni den nunguning diram mu la baluko, se kariimet nika den mu ningi den bo paguwu kam iwita me ikimonko. Mu te kariimet nikerak betesan mu dolomon, ale den memek bo ana nangimik te balmonko mena.
Titus 2:7-8 Nanga bagara aolak te kausa yawara betenakko: 1 Tim 4:12; 1 Peter 5:3; 2:15.


Ura dungan kariimet nunga den

Se ura dungan kariimet mu ni iwita nunga manaruko: nuna mel suen biya te nunga kari bibiya nobowa ningi baga se ura yawara tamon se nunga amilmilomonko. Nuna den memek me balu nungarmonko. 10 Ale nongote me tere namonko. Mena. Nuna ura diram la betemon se nunga supuling ura nungarman mu ko ikia bo me nunga morukko. Se umutang te nunga munan suen biya te mu nuna nanga Saonga Kari Kaem ko den gilalong yawara mu nup biya tumonko.

Kris alo munan diram la bita se Kristus tairukko kimi betemonko

11 Ana uwutata baganakko, mu awuk, Kaem kariimet suen la gomang nungaram ale munan nu te nunga giok se yawarakala bagomonko mu wetang te beteram. 12 Se Kaem ko gomang nangara umutang iwita nanga kasurso: ana ali imi ko betera kaora memek, ko nangamang barasa kilek, mu suen la nabiring tunak ale, tom ana ali imi te bagasan la, ana nanga ikia se nanga bagara aolak ko sinar tanak, ale diram la baga se Kaem ko kuring bowa ningi baganakko.

13 Ale iwitata baga se mu, nanga Biya Jesus Kristus ko sokel se ko nikinang biya ago tairukko mu amilmil ago la ko kimi bita se baganakko. Nu anananga Kaem Biya, se anananga Saonga Kari.
Titus 2:13 Jesus Kristus: 2 Peter 1:1; Jude 4.
14 Ana kilek memek suen biya bitakasan. Bare nu anananga bataguru taukko kota ko kumik guang memek te beteram ale kueram, umutang te nu nanga nangamang tuagu nungok, noko kariimet nunguningkiri ko nanga awurok, se kilek ningo sokel karogo betenakko uwutata beteram.

Ni den suen la imi am butata kariimet nunga manaru sager se te betemonko. Nongomang sokel tuiko. Bare kariimet den ikisan ale me te betesan, mu ni ining nungaruko. Se bo ta ni kari yam bo ko iwita kiring me batagukko.

15 

Copyright information for `WSK