Titus 3

Kristus ko kariimet nunga bagara aolak

Ni ka kariimet nunga manaru se ali sor ko supuling se kari supuling saki nunga nobowa ningi baga se nuguring karo tumonko.
Titus 3:1 Ana ali sor supuling nobowa ningi baganakko: Rom 13:1-7; 1 Peter 2:13-14.
Ale nuna kilek yawara yawara betemonko ikia tairatela nungamin te tairukko.
Ale nuna kari bo kumik te den memek me balmonko, ale ining singi me betemonko. Mena. Nuna kariimet suen la nunga kua se lila te arungu bagomonko.

Ni ikisam, tom ana Jesus Kristus ko me nangamang ningi nunguning aram la, mu ana betela ikia mena, kuring batoga, se ikia kawel karo tuikasan. Ana ikia memek se nangamang barasa kilek duap duap karo tuikasan, ale nunga ura dungan ko iwita bagakasan. Ana nangamang motam ningi bo ko mel ko iki paguwu se nunga bita maguwura ko ikia tokasan. Nuna ana nago ko nongomang magakaso, se ana agotala nuna nogo ko nangamang ikuwakaso.

Bare tom nu ko ikiwaram mu te nanga Sangaru Ta Kari Kaem nu ana kariimet ninguru nanga kueso mu wetang te beteram, ale gomang nangaram, ale nanga giam. Bare nu ana nanga kilek ningo bitakasan mu ko ikia te me nanga giam. / Bare ana kilek ningo saki beteman se mu ko nu nanga giam iwita mena. Mena. Nu kota ana nago ko gomang batagam se nanga giam. Ale anananga memek siwu waram, Korang Bur te ana kariimet iru ko nanga awuram, ale marak sokel iru te baganakko mu nangaram. Nu anananga Saonga Kari Jesus Kristus te Korang Bur ninguru tala nangaram. Ale ko gomang nangaram umutang te nu kariimet ningo diram ko nanga balam. Umutang te ana noko kuriang baga se, tom suen biya ilak baganakko mu ko iki se uwutata baganakko. Imi mu den nunguning. Se aninga ikia mu ni den imi sail ago balu se kariimet Kaem ko nongomang ningi nunguning aram mu kilek ningo pempem la betemonko. Uwutata mu diram se kariimet ninguru nunga sangukko.

Bare nanga usir alo se tai taleng girigir nunga dugu duap ko ikia tawun biya balsan, ale Law Den tagisan gurugumusan, munan umutang biring tuiko.
Titus 3:9 Ikia kawel sang: 1 Tim 1:4; Titus 1:10, 14.
Munan mu kariimet me nunga sangukko, bare nunga ikia la maguwurokko.
10 Se awiriya den kawel te Kris alo nunga pagaru kirker nunga awuso, mu den ninguru manaru, ale aking udagi manaru, se nika den me ikiok mu biring tuiko.
Titus 3:10 Kari Kris alo nunga pagaru kirker nunga awuso: Rom 16:17; Mat 18:15-17.
11 Ni ikisam, kari uwuta mu den nunguning buring tuam, ale nu kota numi ikiso mu nu memek beteso.

Den nukum saki

12 Ani Artemas agi Tychicus nikate bitirik se namurukko aga ikia bitawasam. Se tom nuna bo nikate nama aratuk, mu ni lage i arik mu tairatela Nicopolis wonong te aningate tair ale agarkiko. Aninga ikia betesam mu daula yar ko tom te mu ani wonong mu te bagirikkowo.

13 Ni ka Kris alo arungu kari ilagala Apollos, se mel ikup ko den nunga ko kari Zenas ilak, na yu mel terong la te nunga saongal se gimon ago aolak ilumonko.
Titus 3:13-14 Apollos: Acts 18:24. Ana ura mena me baganakko: Eph 4:28.
14 Ni Kris alo munan nunga kasuru se nuna ura ninguru yawarakala tamon, ale kariimet saki mel ko tukunang asan wore te nunga sangarmonko. Nuna ura mena am ipi me bagomonko.

Kariimet suen la ani agarak bagasan mu ni amilmil yawara kisisan. Se ni anananga amilmil yawara Kris alo nikerak bagasan mu nungaruko.

Kaem ko gomang lila nina suen la nengerak bagurukko.

15 

Copyright information for `WSK