1 Thessalonians 2

Pol Nak Apulp Niokn Ka Kil Apul Ar Tesalonaikael

Mamuntomp antilel nti, ampueik ant aser yipmel, niokn Wulapm Weinkel ka ant apulp yipmel karokn ar kuserel. Karokn. Ka yipm nkamp ntinkirai ampulp, niepm sepmel ka nanker. Pe yipm'arokn wunempiskel ant apulp ka ant ar yemp aiyipmelel, nti moule mpurel karokn mpuaimpuai apulp Wulapm Weink eti nti ak ant wankepm suknel mitinkel apulp na ntunkorp niokn Wulapm Weinkelel. Ampueikel nti mpurel apulp ant soplikekn ar Filipai. Nti ka mpuliep ant, apul ant kuret. Aser Wulapm Weink ka ak ant yarkup mintenkel i kil ampu apul ant ar nkis niumumpuelim. Ant awomp nti arel i, ant mpi aser yipm nankimp yipm sank sepmel ankilel soplikekn. Ant karokn nkinkiekn apulp nti kana ntunkorp antel.

Ant aiyimp kuap yipm na sop yayapel Wulapm Weinkelel, ka ant arokn sinkiael i ko ant ninkai yipmel na nikimp yipm sank puakrenkelel. Karokn. Yipm ka ntinkirai na yapmunemp antilel karokn kuret nako ant wunempyilep yipm wuntokn irpm mpuampua aiyipmel mi ko ant sompel. Pe ant arokn nar wulienk mperar mi ant nkamp marknimp ntri na wananklelel kuap yipm na ser ant akosepm nako yipm mpuaimpuai yupulp antel. Karokn. Wulapm Weink ankil ka aser yapmunemp pmiempniumpuaipm antilel, pe kako kil ankil nipikimp yipm na, ka ant 'arokn ampu apul setel kuretel nkuwepm ar yapmunemp antilel. Karokn. Ant arokn wat sank Wulapm Weinkel apulp na nia somp ant yer niampepm aiyipmel wantosukurelel nako yipm niremp antel. Karokn. Ant apulp na nia ko somp ant yer niampepm Wulapm Weinkel likekn, nako kil likekn mpuaimpuai yupulp antel. Kil ankil ka aser ant akosepm i kil mper niokn antempel sank sepmel ankilel ant ka nakel apmuei nta antilel.

Ant ka aposel, ka Krais ankil wankes ant atel. Pe kona ant puiknel, ant oko yikei mpunti ka sil antel nako nikimp yipm na yek ant mpuampua irpm na yuwulmp antel. Aser karokn. Ant ka akei yapmunemp sepmel niuluknunel waiyimp yipm ntaka mantiek tniokn ka niumua akei nti ninkilapm ankilel akei aripelel, mi kil ak nti niumuapm alel. Yipm ka memprien antilel, pe puikn antilel ka apulp yipmel ka suknelip. Pe ant ka mpuaimpuai yatip ka an nakimp yipm sank sepmel Wulapm Weinkel. Aser ant 'arokn akei sank nakimp yipm 'userel. Karokn. Ant antel ka ak yipm kitie likeknelim. Ant arokn wunempaserp wule antilel, apulpaser yipm ka memprien antilel. Arep ka ant mpi antemp yipm arel ka yipm apiser ant pe, aninkanink ant arokn na yikei yipm nkael yupulp na yipm'a yuwulmp antel. Ant karokn ak yipm niokn ntinkiliempel ntaka ntokwankepm suknel na yipm'a sanel. Karokn. Nomp awun, rien niunkurikn ant ka mamamp akei nta antilel apul niokn ntinkiliempel, i akei nkamump wuntokn antilel apulp niepm irpm antilelel yupulp na ant wat sank sepmel Wulapm Weinkel nikimp yipm yikei watelel.

10 Ant antemp yipm arel, ant karokn ampu apul setel kuretel. Sankwunamp antilel ka ant ar nkisel ka akolikekn yatip, Wulapm Weink antemp yipmarko ntitmaken ankilel aser ant soplikekn. Pe ant ka moule yatewelelip, ant ka aim yapmunemp sepmel suwaink. Mewel kakorokn somp sank kuretel mperp ant. 11 Pe yipm likekn likekn ka ntinkirai apulp sankwunamp antilel ka ant apulp yipmel. Ant ka nuarep waiek ka apulp nti ninkilapm ankilelel. Yipm awup ntinkiliempel, ant ka mintenkitneip yipm, ampu apulp yipm yapmunemp mpililim i ant aikiwat yipm, nako sankwunamp aiyipmel ko akosepm yer niampepm Wulapm Weinkelel. Pe kil ankil ka aiyimp kuap yipm nako yipm yer nta ankilel nako yipm yintempil yupul niokn ankilelel mi ko yipm yintempil somp nia suknelel.

Nti Moule Ka Ar Nta Wulapm Weinkel, Nti Ka Ar Nkis Niumumpuel i Arnkos Wankepm

13 Ant ampu nak naremp Wulapm Weink aninkanink apulp yapmunemp yatel aiyipmel. Ampueik ant la aser yipm mi ka ant nakimp yipm sank Wulapm Weinkelel, ka yipm arokn akei eipmel nuarep sank moule kitapmelel. Karokn. Ka yipm eipm akei aripel i aim apmuei yapmunemp i ka ar mintenk apmuei yipm yapmunemp apulp na ka yipm aser sank niupukn aipopelel ka sank suknel Wulapm Weinkelelip. Kapepe sank Wulapm Weinkel ntakilelel ka apul niokn ar yapmunemp aiyipmel likeknlikekn nako nimpilemp sankwunamp irpm aiyipmel nako yipm yer nkis nternterel. 14 Pe wankepm irpm ampueik ka ninkem nti ntitmaken Wulapm Weinkel ar nta antuel Judael ar kitapm antuelel, ka pe ninkem yipm soplikekn. Nti moule ntieyarkup antuelel ka apul kuret ak nti ntitmaken opo ka aiki nia Jisasel wankepm. Pe yipm ka soplikekn, nti moule ntieyarkup aiyipmel pe ar kitapm aiyipmelel ka ak yipm wankepm soplikekn apulpaser yapmunemp aiyipmel ka ar mintenk antemp Jisas. 15 Ampueikel nti moule ka nak aworp yapmunemp Wulapm Weinkel, nti Juda ka ar nti wuntu. Pe nti ka ar Sepmel antilel Jisas wuntu soplikekn. Pe ekeielel nti ka apul ant soplikekn, nti ka naker ant, nkiyir ant naikul awomp yemp aiyipmel antempel i ant nkarpmok. Nti apul ntalepe aninkanink i Wulapm Weink aser ntiel, ka nti antemp nti moule wanto nkisemp wurokn. Yayapel antilel ka ant'a yet na nikimp nti moule kurieknel sank Wulapm Weinkelel, ka nti Juda ntumunkorp. Nti apulp na ant korokn nikimp nti moule kurieknel sank sepmel epe nako nti nimpilemp yapmunemp na yer nta Wulapm Weinkelel. Nti apul ntakilelel, ka ntiremp ant na yapmunemp'uretel antuel ka nkarp suknelim, pe yapmunemp ntinkiliempel Wulapm Weinkel ka antemp nti apmuei. Eti wankepm kuretel ka niminkem nti misilep.

Puikn Polel Ka Nkirnkerip, Kil Kana Mpi Ser Nti Tesalonaikael

17 Mamuntomp antilel nti, ant ka saiyip yipm yatip. Nti Juda ka nkiyir ant mi pie ant ar la peikel. Wuyen karokn antun ant, pe yapmunemp antilel ka nimisork apulp yipmel. Puikn antilel apulp na ant ampu na ser yipmel ka sukn nkirnkerip. Pe ant ntinkiliemp awup yayapel nako ant ampu mpi ser yipmel. 18 Apm Pol, apm ankil ka awup yayapel ntentenk, na mpi ser yipmel, aser karokn. Satan ka ntunkorp apm yatip. 19 Ant apulp na ant ampu na mpi ser yipmel, ka apulpaser yipm ankil ka weink apulp yapmunemp mpuaimpuaiel antilel. Ant kapuko natip yipm yatip kona antarko yet niampepm Jisaselel. Jisas kona ampu yoel, kil arai ser akosepm wunamp aiyipmel nako ampu yupulp ant sepm waperel yupulp yipmel, nako kil nikimp ant na “Nti Tesalonaika ka nuarep niepm sepmel ka tnei ar niokn aiyipmelel.” Yapmunemp antilel ka ar mintenk apulp epieel, eti ant ka mpuaimpuai ampulp yipm.

Copyright information for `XBIY