1 Thessalonians 4

Ant'orokn Yupul Tniompreimp

Yipmarko mamuntomp, ampueik ant akei niawurpm Jisasel nakimp yuwap yipm apulp sank sepmel ankilelel, ka ntremp yipm apulp sankwunamp ka Wulapm Weink aser sepmel. Yipm ka ntinkirai apulp mi ka yipm apul sopel. Aser ekeielel ant ampu na yiki maipilem yikei niawurpm Jisasel ampu na yimp kuap yipm yupulp sankwunamp sepmel pe ko yipm yupul nako sikir mpi kurieknel.

Puikn Wulapm Weinkel ka ntalekil. Kil nkamp yipm mper yatel nako yipm yer nkis sankwunamp sepmelel suwaink, pe yipm ko yep wule aiyipmel korokn yupul tniompreimp. Yipm kapukorokn yupul sop nti moule kurieknelel, wunemp antuel karokn akorp apulp Wulapm Weink. Nti ka waker wule antuel apul misop puikn antuel. Aser yipm arokn. Sankwunamp aiyipmel ko yer sepmel suwaink yer niampepm antuel wantoel. Mamuntomp Kristenel aiyiknel, ko yikn yepil yikei yiripel. Yipmwuye korokn yel niepm tinam sampolel. Ampueik ant sankamintemp yipm nankimp yipm na Wulapm Weink arai yupul yipm milminel yep sankwunamp'uretel ntalepe kona yipm yupulel. Apulpaser Wulapm Weink karokn kuap yipm nako yipm yapmunemp nirkutupel na yipm waker wule aiyipmelel. Karokn. Ka kil kuap yipm na yer nkis musukorel sop sankwunamp sepmel suwaink. Pe kona mouleel na niek nkiyir sank ekeielel, kil karokn nak nkiyir ant moule kitapmel likekn. Karokn. Ka kil nak nkiyir Wulapm Weink ankil, apulpaser ka Wulapm Weink ankil apulp ant i Pirpm Sepmel Ntinkiraiel Ankilel ka antemp ant apmuei.

Ant Yiki Niuwul Sankwunamp Sepmel Nako Serp Suknel

Wunamp sepmel aiyipmel ka yipm antemp nti mamuntomp Kristenel aiyipmel apulel, ka yipm akei ntaniupuknel nkramomp nti. Apulpaser ka Wulapm Weink ankil ntremp yuwap yipm i yipm apul akosepmim. Yipm apulp nti mamuntomp Kristenel aiyipmel ar yemp wampwampel ar kitapm Masedonia. Eti ka ant'o nikimp yipm sank niawurpmel yupulpi? Aser ant puikn apulp na yipm ko yupul sumpop sankwunamp sepmel epe yupul sikir mpim kuriekn.

11 Yapmunemp yapelel aiyipmel ko ntalekil. Yipm yer nkis sepmel, nta wat yo pmin likekn, nako nti weinkyanker yuntun nia sepmel yimp yipmel. Ko yipm yikei nta aiyipmel yupul nioknelmp nako yipm niumuapm yuwa nti maken ninkilapm aiyipmel ntaka sank ampueik ant nakimp yipmel. Kona yipm yupul ntakilelel, yipm korokn yer nta wantoel yikei nti nkael.

Sepmel Antilel Arai Ampu Yo Somp Ant

13 Pe sank nonkel ant'a nikimp yipmarkoel ka ntalekil. Ant apulp na yipm'o eipm yukorp yupulp simi oko arai ninkem nti moule aiyipmel ampueik awurawurel. Ka yipm'orokn yikei saiyip muan warpmel numpul yupulp nti ntaka nti mentitmaken kurieknel apulel. Nti karokn yapmunemp mintenk apulp Wulapm Weink nako nti niampepm tneipilel, eti nti ka ar antemp yapmunemp wankepmel suwaink. 14 Aser ant ka ntinkirai apulp Jisas ka ampueik awur mi Wulapm Weink ampu aiki kil nkarpel. I kapepe ant kako ntinkirai yupulp Wulapm Weink arai yikei niawurpm ankilel ampu yupulp nti moule ankilel ampu ko serpel soplikekn. Kil ko somp nti moule ka akei kil nkaelel i ko ntiarko yintemp Jisas yer sepmel yupmueiel.

15 Sank epie ant'a nikimp yipmel ka sank Sepmel Antilel Jisas ankil nakimp yuwap antel. Ka ntalekil. Kona Jisas ampu na yoel, ant ntitmaken Wulapm Weinkel peyar nkis keipmelel, ant kapukorokn yuwornulkn nti ntitmaken ampueik awurawurel i ant no niorknel. Karokn. Nti epe ka awur niorknelel kapuko serp no niorknel i ant ka nkis keipmelel arai sop nti no nkien. 16 Kako ntalekil. Ensel ka mpunti sil mi ka ar niorknelel, kil oko yikei mampel niek sank niawurpmel yupulp Jisas kana yek yemp keipmel yoel, pe nti ko yuwor ma yiki yilump i pmiemp Wulapm Weinkel ko nti yumop. Mpuampua irpm epe kapuko ninink krikel. Pe nti moule Wulapm Weinkel ampueik awurel, nti oko serp no miniorkn. 17 Niatel i ko ant ntitmaken peyar nkis keipm mi karokn awurel, kil ko yuweip somp ant yupul no i yintemp nti mentitmaken Wulapm Weinkel opo nomp mporkeipm, i ko antarko miser Jisas i yintempil yer sepmel yupmueiel. Kapepe. Sank ka mintapepe. 18 Yipm mpi nikimp yuwap yipm aiyipm sank epie nako yapmunemp yipm mpililel, mi ko yipm yer nkis mintenkel.

Copyright information for `XBIY