1 Thessalonians 5

Ant Ko Yer Niampepm Ntankuel Yupulp Jisas Na Yoel

Pe sank ekeielel ka sank yerk, ant okorokn nikimp yipm sank nuworpel yupulp atikel kona Jisas na yoel. Apulpaser yipm ankil ka ntinkirai ampulp, arai kil yo yikei nintipmel nuarep nti mewurkite ka at nompel. Ekilelel nti mentitmaken arai niek na, “Yemp pie rienelim, ant pie apmuei sepmel.” Nti na niek ntakilelel i, wankepm oko ninink yikei nimintipmel ntaka yakop ka nti maken nkamp apulp ninkilapm ka nti na rael. Aser yakop epe arai nti somp yer nta Wulapm Weinkelel kako soplikekn, nti kapukorokn sirkemp.

Aser yipm ntitmaken Wulapm Weinkel, yipm ka yatel. Yapmunemp yipm karokn nimpiemp mi ko yipm nkis kukoel nako yipm serk prierprur yupulp Jisas kona kil yo yikei nintipmelel ntaka mewurkiteel. Karokn. Yapmunemp aiyipmel ka mpilil, ka ntinkirai ampulp. Eti yipm kakorokn nkis wunamp'uretel nako nkuwepm yer yemp nimpiempel ntaka nti moule yapmunemp antuel karokn akorp nako nti nikerpm Wulapm Weinkel. Nti moule ntakilelel, yapmunemp antuel karokn mpilil apulp sankwunamp sepmel, ka nuarep nti ka at yemp nimpiempel. Nti moule ka akei nimpiemp nkuwur mi al mpep'uret ka apul mamp kukoel, nti ka nuarep moule ka ar niumpu wuntuel.

Eti yipm kako nkis niampepm ntankuel yet wunempel yep wule aiyipmel.

Wulapm Weink karokn yuwak yipm na somp yakop yer nta ankilel yupulp sankwunamp'uretel. Karokn. Krais Jisas Sepmel antilel ka nkamp yemp antilel wuntu aikol lonkuntonkel apulp yapmunemp'uretel antilel. Kil ka nantip mua arkomp ant, apul ant na yer nta ankilel yet yemp yapelel yintemp yapmunemp mpililel. I kapepe wunamp sepmel ant'o sopel ka ntalekil. Ant'o yupulp Wulapm Weink suwaink, yikei kil nkael pe ant'o yikei yapmunemp mintenkel niampepm tneipil nako kil simpop antel. Pe ant'o yikei nta niupuknel nkrawomp nti wantosukurel. Kona ant yupul ntakilelel, kako nuarep ant ka ntankamp lontumpua nimimpiepm mi ka tunkorp ant aipopelel i ko ant wamiyimp yapmunemp ntinkiliempel Wulapm Weinkel epe i yintempil yer sepmel yupmueiel. Kona yipm yuwur mi yipm nkis keipmel, yipm oko yintempil yer sepmel soplikekn.
11 Kona ntakilelel, yipm mentitmaken wanto Wulapm Weinkel kapuko yikei sank epe ant nakimp yipmel mintenkitneip yipm aiyipm nta karep yipm apulapulel.

Wulapm Weink Arai Yikiwat Nti Kristen

12 Nti moule ka Wulapm Weink yuwak nti na yuwulmp yipmel, ko yipm yep nti yikei yiripel eipm sank antuel. Nti ka awor sank ntintomp ntremp yipm yayapel Wulapm Weinkel nako yipm nikerpmel. 13 Niokn nti apulel ka ntinkiliemp, ko yipm yiki nia antuel yumpulp. Yapmunemp yapel aiyipmel ko yer yintemp nti. Pe yipm kapuko nkis niyepm yer yapmunemp likekn yintemp yipm aiyipm.

14 Ant'a yiki yipm yapmunemp nako yipm sankintemp nti moule likipelel ka nkarkemp nioknelmpel. Pe nti moule ka nkarkemp muatiel, ko yipm mintenkitneip nti, ko nti ampu yer niuluknun. Pe nti minititep ka awup ntinkiliempel ko yipm yikiwat nti. Kona yipm yupul ntakilelel, yipm oko yikei niumuaipmel yupulp nti wantosukurel. 15 Kona mewel na yupul yipm kuretel, yipm'orokn ampu yupul kil kuret waperel. Karokn. Aninkanink ko yipm yikei yapmunemp sepmel waiyimp yipm aiyipm yintempel nti ntitmaken kurieknel wantosukurel soplikekn.

16 Aninkanink yapmunemp aiyipmel ko yer yintemp mpuaimpuai suwaink, 17 pe yipm'o yimp Wulapm Weink nikimpil sank ntentenkel. 18 Pe yipmarko mentitmaken ka Krais Jisas ar pmiempniumpuaipm aiyipmelel, eti kona mpuampua sepm'uret ninkem yipmel, ka puikn Wulapm Weinkel ko yipm nirempil niek tukuarempil yupulp. 19 Kona Pirpm Wulapm Weinkel na yupul niokn ntaka yite ka kakirp nael, yipm'orokn yukur. 20 Ntakilelel, kona mewel na niek yuworp yapmunemp Wulapm Weinkel yipm'orokn yikei eipmel mi yimpil pmomp yer kil. 21 Aser yipm'o eipm ser yuworel weink ankilel kona sepm mi kuretel. Sank kona sepm ka wat a ntunkel, ko yipm yum yer yapmunemp yupul misop. 22 Oroknel, (add? kona yapmunemp simisimi ka kuret yer niampepm Wulapm Weinkelel) ko yipm nta yikei nisepel.

23 Yapmunemp musukorel ka nkarp ar Wulapm Weink likekn, i kapepe (apm aiyimpil nako kil yupul) ka niokn ankilel kil ko yupul yapmunemp pmiempniumpuaipm aiyipmel sukurel ko (na) yer nta ankilel likekn. Ntakilelel, Jisas Krais kona yoel, Wulapm Weink ko yuwulmp yipm nako moule aiyipmel pmin'uriekn ko yer mporel suwaink. 24 Wulapm Weink ankil ka aiyimp kuap ant na sop yayapel ankilel. Sank ka Wulapm Weink nak nuwarel, kil karokn ninkaielel. Ka kil akei mintenk ankilel apulp yipm.

25 Mamuntomp antilel nti, yipmarko yimp Wulapm Weink yupulp nako kil nuworp antel. 26 Yipm kona ninkem nti mamuntomp Kristenel aiyipmelel, ko yipm niremp nti, ntayiremp nti. 27 Ant akei nia Sepmel Antilel Jisasel nakimp yipm, pe wupm epie ko yipm yet yapel yimp, nikimp nti ntitmaken Wulapm Weinkel yikeiwanto. 28 Ant aiyimp Sepmel Antilel Jisas Krais, kil ko yeyupulp yipm yupmueiel. Kapepe. Sank ka mintapepe, karep miniat.

Copyright information for `XBIY