2 Peter 3

Yesu ma ilame pulupe

Mikadepe dle so namkadulo, na꞉ matle yu ilimale hale iye wua꞉ dla hamima. Na꞉ta wua꞉ dla yu ilalipo hapili dapiyamte dulu hema na꞉ solotama, wua꞉ta woloma malamale ka꞉dle halepo depame. Adipalati, na꞉ solotama, wua꞉tapo God tle yu hapame molo atlamalalo sota atlamale yu mate epo di pasakalo gadlalo Lod Yesu Keliso yu, Taiya dle sota atlamale mate woloma malaha꞉ha꞉lepo depame.

Epedeme wua꞉ koko i woloma malamaiya. Adipalati, mosukulu alila dla God koko dla tepelemyemama putlomale yu mate atlamalalo so opatapo pulupe. Epame yia꞉ta puame yia꞉ motota solotamale koko hapulomaye halomyelepe. Epame ma yia꞉ta epo atlamyelepe, “Yesuye ikadepe ma ilame puli duwa? Amasiyama ya꞉ ala popuasema. Adipalati, ta꞉lamo pato i kotiyapo puwa oloma etle ta꞉lamotapo ma pomeyelope dlalo hallati asiyama di mamadulo tlo mo-palimpuwapo,” demyelepe. Epapele koko tle yia꞉tapo Godta ya꞉ yu tle pepele di mita꞉ple koko mate epo ta꞉lamoye yú dulu tle hame woyamale koko mate dla mikadepe dloweye allimdepo.

Epedeme amka꞉yapa God meyelo yú mate ta꞉lamo pato, oloma edla haluwaye, yumuwapo. Amasiyama God matle wata oloma hema hutiye pepele di mate epo ta꞉lamo mateye dlapatapo hamdlepo depame yu himpo halapo. Epedeme koko iye Godta koko gladlowe alila dla woyamelepe. Epame alila oloma edla ya꞉tapo batalimale so opa kokoye gladepame batalipo hamastlepe.

Amasiyama mikadepe dle so namkadulo, wua꞉ koko hatlo itlo malamolowe wowelimiya. Adipalati, God dla alila hatlopeye 1000 sokomoko epapele some halapo. Epame ma asiyama 1000 sokomokoye alila hatlope epapele some halapo. Epedeme Lod dla ya꞉ta koko hali dle koko haloweye podekelena. Amasiyama opa opitapo Lodye dekelema demdepo. Epapele tlope ya꞉ podekelesemde. Adipalati, ya꞉ posolotamasema, oplami hatlota Dlapa mo dla tloweye. Epedeme ya꞉tapo wua꞉ta batalimale koko dulu tle malamale meyelope dlepo depame sadle mate wua꞉ye omhalapo.

10 Amasiyama Lod ya꞉ alilata puluweye uhalalo oplami some pulupe. Epalati oloma edla pepele diye sokomoko some dillimpumama me-pa꞉lepe. Epalati dlapatapo alisisi hapulomaye hamdemama ta꞉lamo mate epo dulu edla ha꞉ha꞉lalo alisisi hapuloma mate mosukulu hamdepo hamastlepe.

11 Epapedeme ka꞉e! Koko hapulomaye dlapata epo hamdepo hamastlepe dlepiye, wua꞉ ka꞉dena, aiyalma depo ha꞉ha꞉mama God mila꞉pi tle woloma ka꞉depo ha꞉ha꞉iya. 12 Wua꞉ God mila꞉pi tle ka꞉ka꞉depo ha꞉ha꞉mama Lod ya꞉ alilata puluwe dla dalemha꞉ha꞉mama omha꞉ha꞉iya. Wua꞉ta epapelepiye, eta God ya꞉ alilatapo ma-hapele pulupe. Epedeme alila oloma edla pepele diye dlapata hamdlepe. Epalati alisisi hapulomaye alemalleta hamama potulupo hamastlepe. 13 Amasiyama di Godta yu itiyapo himili e dolumama pepele di amko mate epo ta꞉lamo amko mateta puluwe dla omha꞉ha꞉po. Epedeme mo edla isikimi ka꞉dle koko siyapota meyelo ellepe.

14 Epedeme mikadepe dle so namkadulo, wua꞉tapo Lod ya꞉ alilata puluwe dla omha꞉ha꞉mama woloma God mila꞉pi tle ka꞉depo ha꞉ha꞉iya, wua꞉ta ya꞉ alila dla ullu pa꞉talo so depo ha꞉ha꞉lepo depame. Epame God mate sadepo ha꞉ha꞉iya. 15 Epedeme wua꞉ koko iye woloma malamaiya. Lodye opata pasakalo gadlowe halepo depame sadle mate yia꞉ye ala me-omhalapo. Epedeme diamkale Polo mape koko hatlo hema Godta ya꞉ dla ka꞉dle malamale hamili mate wua꞉ watle me-ilalipo hamiwapo. 16 Epedeme ya꞉tapo yu ilalimale hapuloma dulu dla koko hatlo metlo ilalimuwapo. Amasiyama koko opi Polota ilalimale dulu dla kokalalimale ma me-hutiyepo. Epedeme koko yeitamale so mate epo malamale tatlamale so matetapo Polota yu ilalimale ya꞉ dulu kokoye batalipo hukulumdepo. Epame God yu opi mape mepo batalipo hukulumdepo. Epapele koko tle yiskamu miyelo yia꞉ dla koko gladleye hame pumdepo.

17 Mikadepe dle so namkadulo, wua꞉ ipapele kokoye mo-wua꞉malamana. Epapedeme wuskamu wua꞉ye woloma omha꞉ha꞉iya. Adipalati, batalimale sotapo yia꞉ta imale koko tle wua꞉ta kokalepo ha꞉ha꞉ tle wua꞉ye ma alikili dla eleme tlala. 18 Amasiyama wua꞉ye Lod Yesu di pasakalo gadlalota bokotiyapo malamale mate epo wua꞉ta ya꞉ malamale koko mateta wua꞉ dulu dla ta꞉ta꞉diya. Epapedeme hela꞉dle mate epo itiyamale mateta Keliso dla kokó elepo ellepe. Koko iye ikadepepo.

Copyright information for `XLA