Acts 13

Banabas mate Sol mate hohopame taiya dle

1Antiyoka sos dulu dla God tle yu hapame molo atlalo so mate sos dokopala so mate iwolota ha꞉ha꞉iyo. Yia꞉ hiye Banabas, epo Simiyon (ya꞉ hi haleye Nigele), epo Kulene oplami Lukiyus, epo Manae (dokopala oplami Helod mate madipata teta꞉le), epo Sol.

2Yia꞉ta yimkata daya aiyalma depo ha꞉ha꞉mama inoma sumpopa꞉lati Hela꞉dle Sokota yia꞉ watle epo atlaiyo, “Banabas mate Sol mate hohopame na꞉ta hapilowe oko dla ipila꞉iye,” diyo. 3Epalati yia꞉ta daya aiyalma depo ha꞉ha꞉po gudepame Banabas mate Sol mate dota hohopo inoma supame God oko dla taiya diyo.

Banabas mate Sol mate Saiples hasu dla tale

4Banabas mate Sol mate Hela꞉dle Sokota taiya dlati Selukiya mo tle koa hame ma Saiples hasu dla tamalemama yia꞉ gadlowe oplami Yon Maka semtaiyo. Yia꞉ puame Saiples hasu dla Salamis mo dla koa himiyo. Epame mo edla Yu so inoma sumalalo aya dla hehetamsiyamama God yu atlamsiyamaiyo.

6Epame ala hasu hatlo medla me-siyamama mo hale Papos dla tame woyamaiyo. Yia꞉ edla tame natilati Yu oplami hale osolo walle halaiyo. Ya꞉ hiye Baleyesu (ya꞉ hi haleye Elimayas demdiyo. Adipalati, hi i ya꞉ dulu kokoye osolo walle oplami demama apopo.) Ya꞉ mo edla biskapa God yu molo atlalo oplami halaiyo. Ya꞉ye hasu dokopala oplami Selegiyus Paulus ya꞉mkaleyo. Hasu dokopala oplami eye ka꞉dle oplamiyo. Epedeme ya꞉ God yu dallowe solotamama Banabas mate Sol mate sisilamaiyo. Amasiyama osolo walle oplami Elimayas posolotamaiyo, dokopala oplamitapo God yu dalepame Yesu dla mikadepe dloweye. Epammama ya꞉tapo Banabas mate Sol mateta God yu atloweye humatlaiyo.

9Amasiyama oloma edla Sol, ya꞉ hi hale Polo demdeta Hela꞉dle Sokota pasatale mate halemama osolo walle oplami Elimayas watle inoma kokata omhalemama epo atlaiyo, 10“Wa꞉ye Saiten yamipo. Wa꞉ ka꞉ka꞉dle koko hapuloma dla opahale demhalapo. Wa꞉ye alila hapuloma dulu dla opaye isikimi elemala natimhalapo. Epame wa꞉ adipalati Lod yu ka꞉dleye ma meyelope depame ma opa dla mala-atlamhalema꞉? 11Epedeme watapo Lodta wa꞉ watle batalimale asiyama hamimama wa꞉ inoma dapiyamteye kokowelepe. Epalati wa꞉ta alila opi dulu dla salita hela꞉dle ponatilowa,” diyo.

Epalati oloma edla amtuwaleta ya꞉ inoma dla bodlati ya꞉ inomata mo-kokoweiyo. Epapalati ya꞉tapo oplami hale ya꞉ api imtlowe totamsela꞉iyo.
12Epalati hasu dokopala oplamita koko i natipo yelepame Lod dla mikadepe diyo. Adipalati, Polo mate Banabas mate yia꞉ta God yu atlale dulu dla itiyamale natiyo.

Polota Pisidiya mo pato dulu dla Antiyoka mo dla God yu atlale

13Polo mate ya꞉ mate pumulale so mate Papos mo tle koa hame kaula pato ulupo ma Pampiliya mo pato dla puame woyamaiyo. Mo dulu edla Pelega mo dla koa himiyo. Edla Yon Makata yia꞉ saliyome ma ilame Yelusalem dla taiyo. 14Epame Polo mate Banabas mate Pelega saliyome ma ta꞉la api Pisidiya mo pato dulu dla Antiyoka mo dla tame woyamaiyo. Yia꞉ edla ha꞉ha꞉lati Yu so inoma sumalalo alilata pulati yia꞉ inoma sumolowedeme inoma sumalalo aya dulu dla hetame popa꞉iyo. 15Epalati inoma sumalalo aya dokopala sota Mosesta aiyalma hatitimale mate epo God tle yu hapame molo atlalo sota hatitimale mate sesa꞉iyo. Epame ma Polo mate Banabas mate dla yu hamimama epo atlaiyo, “Namkadulo, wua꞉ dla di watle gadlowe yu atlamolowe hutiyelepiye, me-atlamaiya,” diyo.

16Epalati Polota sila꞉tipo do ta꞉demama epo atlaiyo, “Namkadulo Isalael so mate epame God dla mikadepe dle po-Yu so wua꞉ mate yu i daliya. 17Di Isalael so Godtapo di mamaduloye me-elemuwapo. Epame yia꞉tapo Isip mo dla ha꞉ha꞉lati Godta yia꞉ye woloma omhaluwapo. Epalati Isalael so opata pasatauwapo. Epapalati Godta yia꞉ye itiyamale mate Isip mo tle alikili dla eleme woyamuwapo. 18Epame yia꞉ta sokomoko 40 dalupa dulu dla God watle allimama ya꞉ dla kostame siyamalati asiyama Godta yia꞉ pomelemdena. 19Epame Godta Keinan mo dulu dla yu meyelope meyelope dle 7 mo so hapulomaye alikili dla dodolomsalepo yia꞉ ta꞉la kolahapame ma ya꞉ opa Isalael so watle hamiwapo. 20Epalati di mamadulota Isip mo dla ha꞉ha꞉po ma mo i hala pumuluwaye, sokomoko 450 mo-pololuwapo.

Epame di mamadulota mo edla me-ha꞉ha꞉lati Godta koko gladlalo soye hatitimuwapo, yia꞉ omha꞉ha꞉lepo depame. Amasiyama alotle God tle yu hapame molo atlalo oplami Sa꞉muwelta halale oloma edla Isalael sota ma solotamuwapo, yia꞉ omhallowe dokopala oplami ikadepe hamolowedeme. Epalati Godta Benyamin elele dulu dla oplami hale, Kis yami Solye dokopala oplami ikadepe hallowe dla hulumuwapo. Epapalati Solta sokomoko 40 dulu dla Isalael so dokopala oplami haluwapo.
22Epame Godta Sol alimama alikili dla gilidepame matle Yesi yami Deibidita yia꞉ dokopala oplami hallepo depame pamoluwapo. Epammama Godta Deibidi koko dla ipo atluwapo, ‘Na꞉ Yesi yami Deibidi dla ka꞉dle koko natima. Epedeme ya꞉ta na꞉ta solotamale koko hapuloma halomhallepe,’ duwapo.

23Epedeme Godta ka꞉yapa yu itiyamale mate himimama epo atluwapo, ‘Deibidi asiya dulu tle Isalael so dla pasakalo hallowe hapilalo oplami pulupe,’ duwapo. Epedeme oplami eta mo-puwapo. Eye Yesupo. 24Amasiyama Yesu ala populalo hallati Yon tatle puame Isalael so hapuloma watle God yu atlamsela꞉mama epo atlemsela꞉mduwapo, ‘Wua꞉ malamale meyelope depame yú dla tutula꞉iya,’ demduwapo. 25Epame Yonta ya꞉ oko mosukulu gudla tamama epo atlemsela꞉mduwapo, ‘Wua꞉ta na꞉ye ana demdi? Godta sale Kelisoye pona꞉. Amasiyama ya꞉ye na꞉ ko tle pulupe. Epedeme na꞉ta ya꞉ hete alisisi uptimoloweye po-ala꞉na,’ demduwapo.

26Namkadulo Yu so wua꞉ mate epo po-Yu so di God dla mikadepe dlalo so wua꞉ mate na꞉ yu daliya. Pasakalo hallowe kokoye Godta dia꞉ watle Yesu tle hamiwapo. 27Amasiyama Yu so mate yia꞉ dokopala so mate Yesuye woloma pomalanatina. Epapedeme yia꞉ solotamuwapo, Yesuye yumuluwedeme. Epedeme yia꞉ koko pa꞉le tame Paelet watle Yesu yumulupo depame ha꞉ha꞉limuwapo. Yia꞉ta koko i halomsiyamaleye God tle yu hapame molo atlamalalo sota ka꞉yapa hatitimale yu mate ma-ala꞉uwapo. Epapedeme Yu sota inoma sumalalo alila hapuloma dla God tle yu hapame molo atlamalalo sota hatitimale yuye sikemte sesa꞉mduwapo. Amasiyama yia꞉tapo dulu koko woloma pohamdena.

29Epedeme God tle yu hapame molo atlamalalo sota Yesu koko dla atlamale koko hapulomata Yesu dla mo-wowoyapo gudlati yia꞉tapo Yesu motoye dali yekelemhimili di tle hamtulume wabasi dla himiwapo. 30Amasiyama Godta ya꞉ye powale tle ma pasakalo duwapo. 31Epalati alotle alila pasatale dulu dla Yesuta ya꞉ mate Ga꞉lili tle Yelusalem dla pumulale so watle ya꞉skamu nalati-imsela꞉uwapo. Epedeme opa ewolotapo yia꞉ta Yesu powale tle sila꞉time sela꞉la natili kokoye di opa Yu so watle atlamsiyamapo.

32Epapedeme dita ka꞉dle yuye wua꞉ dla hampualepo. Epedeme ka꞉yapa Godta di mamadulo mate yu itiyapo himiwaye koko etapo wata dia꞉ dla mo-woyamalepo, ya꞉tapo ya꞉ maseyemala Yesuye mo-powale tle ma pasakalo duwa koko tle. Epedeme Sam 2ta koko hema epo atlapo,

‘Wa꞉ye na꞉ maseyemala ikadepe.
Watapo na꞉ta wa꞉ye ma-hamalepo’ depo.
34Epame Godta Yesuye powale tle ma pasakalo duwapo. Epedeme ya꞉ matle ya꞉ maseyemalaye poa pe-epapolowa. Epapele koko tle Godta epo atluwapo,

‘Na꞉ta ka꞉yapa Deibidi watle yu itiyamale mate koko ka꞉ka꞉dle hapilowe atluwaye
ma wa꞉ watle hamilowepo,’ duwapo.
35Epame God yu buka dla ma epo atlapo,

‘God tle malale aiyalma oplamitapo wabasi dulu dla pohutuluwa,’ depo.
36Epedeme God yu iye Deibidi koko po-atlana. Adipalati, Deibidita God ya꞉ oko hapuloma halomsela꞉po gudepame pouwapo. Epalati ya꞉ motoye ya꞉ mamadulo wabasi seme dla hamatilati ya꞉ motota edla hutuwapo. 37Amasiyama Yesu motoye wabasi dulu dla elemama pohutana. Adipalati, Godta ya꞉ye powale tle ma pasakalo duwapo.

38Epedeme namkadulo, wua꞉ dita atlama yu i woloma daliya. Adipalati, Godtapo Yesuta koko halë tle wua꞉ bobtalimaleye hiyolepame ullu pa꞉talo so dlepe. Ame adipalati, Mosesta aiyalma hatitimaleta wua꞉ye wua꞉ bobtalimale tle alikili dla eleme woyapame po-ullu pa꞉talo so dena. Amasiyama oplami antapo Yesu dla mikadepe dlepiye, Yesuta ya꞉ye batalimaleta itiyamale tle alikili dla hamame woyamelepe.

40Epapedeme wua꞉ woloma na꞉ yu hapame mikadepe dle dulu dla ha꞉ha꞉iya. Adipalati, God tle yu hapame molo atlalo sota atlamale koko ita wua꞉ dla pulala depame,

41‘Wua꞉ta ha꞉ha꞉le oloma edla na꞉tapo koko pato halepe.
Amasiyama wua꞉ta koko i natipame pomikadepe dlowa.
Epame oplami haleta ya꞉ dulu kokoye wua꞉ dla atlamelepiye,
wua꞉ ma woloma pohalowa.
Epapedeme na꞉ yu dla asupumlalo so, wua꞉ koko i natipo yiyelepame pallipe.’”
42Epo Polo mate Banabas mate yu atlamha꞉ha꞉po gudepame inoma sumalalo aya tle tulumha꞉ha꞉lati opata puame yia꞉ watle epo atlaiyo, “Wua꞉ matle inoma sumalalo alila haleta puame wua꞉ta God yu atlaleye ma atlaiye,” diyo. 43Inoma sumaleta ma tame gudlati opata sillipo ma yia꞉ aya dla tamhalaiyo. Epalati Yu so opi mate epo po-Yu sota God dla mikadepe dlalo so opi mate Polo wolota tamallati dolumtamalaiyo. Epalati Polo mate Banabas mate yia꞉ watle epo atlaiyo, “Wua꞉ta Godta bokotiyapo malamale dulu dla ha꞉ha꞉ye, medla mepo ha꞉ha꞉iye,” diyo.

44Epo ma inoma sumalalo alila haleta mo so hapulomata Lod yu dalla pumulaiyo. 45Epalati Yu sota opa alumale pato natipame Polo mate Banabas mate dla elle pato himiyo. Epame yia꞉tapo Polota God yu atlemhallati sillipame Polo yu ipi tle isikimi koko atlemhalema demyemama Polo mate yu dlomaiyo.

46Amasiyama Polo mate Banabas mate powowota꞉lalo asiyama yuye yia꞉ watle epo atlamaiyo, “Ka꞉dlepo, wua꞉ tatle dita God yuye wua꞉ dla atlamoloweye. Amasiyama wua꞉ta pasakalo hallowe haloweye allipo. Epedeme di wua꞉ melepame ma po-Yu so watle God yu atlamsiyamolowepo. 47Adipalati, Lodta di watle ipo atluwapo,

‘Na꞉ta wa꞉ye hamuwapo, wa꞉tapo po-Yu so dulu dla hela꞉dlalo hallepo depame.
Epame wa꞉tapo pasakalo hallowe yuye opa hapuloma ta꞉lamo pato sukulu gugudle dla hamtelepo depame.’”
48Epalati po-Yu sota Polo yu dalepame sisiyemama Lod yuye ka꞉pi diyo. Epame yia꞉ dulu dla Godta pasakalo hallowe dla sesa꞉le so hapulomata mikadepe diyo. 49Epalati mo edla opa hapulomata God yuye dlalemtaiyo.

50Amasiyama Yu sotapo Polo dla elle pato himimama yia꞉ta tame God dla mikadepe dlalo po-Yu so patoto wola꞉ mate epo mo dokopala so mateta siyalasiyaladlepo depame Polo wolo kokoye yia꞉ watle mala-atlamaiyo. Epalati yia꞉tapo Polo woloye wotiyalle hapipame mo etle alikili dla dodolomsaliyo. 51Epapalati Polo mate Banabas mate ma Ikoniyom mo dla tlowedeme ha꞉ha꞉mama yia꞉ta Yu so dla alli koko nati-imama yia꞉ hete sokopeye Yu so opa inoma dali dla hihiyoliyo.

52Amasiyama mikadepe dle soye Hela꞉dle Sokota poposatilimalati sisiyeiyo.

Copyright information for `XLA