a14:221Kol 10:1-2; Hib 11:29

Exodus 14

Omteka꞉pele Kaula ulli koko

 Godta ma Moses watle epo atlaiyo, “Opa watle yu iye atlamane, yia꞉ ma ilame Pihahilot mo dla ta diya. Mo eye Bal Sepon mo mateka꞉pi, Migidol ka꞉ epo kaula ka꞉ duka dla halapo. Epedeme yia꞉ tame kaula pili dla kimpo ha꞉ha꞉lepo. Adipalati, Pelota malamelepe, Isalael soye dalupa dulu dla tloweye api yeitamama wowota꞉msiyamayo dlepe. Amasiyama na꞉tapo Pelota malamaleye mamisika꞉ kokalepo mellowepo, ya꞉tapo ya꞉ opa mate wua꞉ye ma hohomala telepo depame. Amasiyama na꞉ta yia꞉ watle halowe kokotapo opa hapuloma dla na꞉ta itiyamale kokoye nati-iliwepo. Epalati Isip sotapo na꞉ye ikadepe God mleni dlepe,” diyo. Epalati Isalael sotapo God yu i dalepo dolumaiyo.

Epapele dulu dla Pelo mate epo ya꞉ oko so mateta Isalael sota ma ilame popumullalo ma a꞉ma potale halla dalepame epo atlamyaiyo, “Wua꞉ natiya, Isalael soye di asiyama pa꞉le oko halalo sopo. Epedeme di yia꞉ye adipalati alikili a꞉ma woyamaiya duwa?” demyaiyo. Epalati Pelotapo ya꞉ aliya koa hame ya꞉ opa mate Isalael soye alotle dodolomtaiyo. Ya꞉ta tamama 600 aliya koa ka꞉ka꞉dle mate epo aliya koa hapuloma mo dulu dla siyamalalo mate elepame taiyo. Epele dulu dla aliya koa hapuloma di edla opatapo mo-popa꞉mtaiyo. Epapeleye Godta Pelo dupa malamale kokalepo mellati ya꞉tapo ya꞉ opa mate Isalael soye dodolomtamallati Isalael sotapo sisiyele mate kaula mateka꞉pi dla ellalo Pihahilot mo dla mala tamalaiyo. Yia꞉ edla tulume kimtimha꞉ha꞉mama alo dla natilati Pelotapo ya꞉ opa mate epo ya꞉ aliya koa hapuloma mate alotle pumulla natiyo. Epalati yia꞉tapo sikemte wowota꞉mama gadle yilo God dla a꞉liyo. 11 Epame Moses dla epo atlamyaiyo, “Wa꞉ adipalati dia꞉ye Isip mo tle hema elempuwa? Epame wa꞉ di Isip mo dla palilati hatiliwe wabasi hawa hallati dia꞉ye dalupa dulu hema pallipo depame elempuwa? 12 Epame ditapo wa꞉ watle ma-atlamduwapo, ‘Wa꞉ di memelene. Di Isip mo medla asiyama pa꞉le oko halomha꞉ha꞉lowama,’ demduwapo. Epapele dulu dla di asiyama pa꞉le oko dulu medla ha꞉ha꞉matiye, di dalupa dulu hema puame popalima,” demyaiyo.

13 Epalati Mosestapo epo atlaiyo, “Wua꞉ ase sikemte wowota꞉miya. Woloma kokalepo ha꞉ha꞉iya. Adipalati, wua꞉ wata Godtapo wua꞉ gadle kokoye natilipe. Ame adipalati, wua꞉tapo Isip so iwolo yia꞉ mila꞉piye matle ponatilowa. 14 Epapedeme wua꞉ isikimi omha꞉ha꞉iya. Epalati Godta wua꞉ yilo nalatimelepe,” diyo.

15 Epalati Godta Moses watle epo atlaiyo, “Wa꞉ adipalati gadle yilo na꞉ dla otele himhalema꞉? Wa꞉ opa atlamane, kaula pili dla tulume popa꞉lepo depame. 16 Epame wa꞉ dali ku hapame kaula pato di dla dlokomane. Epalati kaula patotapo meyelo duka gladlati wa꞉ mate epo Isalael so mate ta꞉la sekelle tle seme dla ulumtelepe. 17 Epame na꞉tapo Pelo mate epo ya꞉ opa mate yia꞉ dupa malamaleye kokalepo mellati yia꞉tapo wua꞉ alotle dodolomelepe. Amasiyama na꞉ta yia꞉ watle halowe kokotapo opa hapuloma dla na꞉ta itiyamale kokoye nati-iliwepo. Epalati Isip sotapo na꞉ye ikadepe God mleni dlepe.”

19 Epalati God ya꞉ banakaka mate epo wuala mateta itapu tle api imtamalaleye matle alo dla tulume Isalael so ka꞉ epo Isip so ka꞉ duka dla halemama Isalael so dla hela꞉dle hamimama asiyama Isip so watle amtuwale hamiyo. Epammama yia꞉tapo Isalael so hala dla puluweye amtuwaleta api himomeleme halaiyo.

21 Epalati Mosestapo ya꞉ dali ku hamhalemama kaula pato di dla dlokomaiyo. Epalati Godtapo salita matlalo tiyama tle mosisi pato hamilati mosisitapo utula꞉la patoye hotlomhalemama kaula yú patoye duka gladiyo. 22 Epalati yúta duka gladepame duka dla ta꞉la sekelleta woyamellati Isalael sota etle seme dla ulumha꞉ha꞉iyo. Yia꞉ kaula patoye ta꞉la sekelle tle ulumha꞉ha꞉mama natilati yútapo seme mate seme mate dla kosukulli some halaiyo. a 

23 Epalati Pelo ya꞉ opata koko e natipame yia꞉ aliya koa mate Isalael sota ulli alotle kotiyapame uliyo. 24 Epapeleye ma alallowe mateka꞉pi dla hallati Godtapo wuala dulu tle epame dlapa ulli aloweli dulu tle Isip so natipame yia꞉ dla yeitamale hamiyo. 25 Epame yia꞉ aliya koa heteye bobtalipo mellati yia꞉tapo a꞉ma tloweye memeliyo. Epapala natipame yia꞉tapo yia꞉skamu yia꞉ dulu dla epo atlamyaiyo, “Di itle ma ilame tamali dla tlowa. Adipalati, Godtapo Isalael so yilo dia꞉ mate nalatimama aposema,” demyaiyo.

26 Epalati Godtapo Moses watle epo atlaiyo, “Wa꞉ dali ku mamisika꞉ ta꞉depame kaula di dla dlokomane. Epalati yúta ma ilame puame godemama Isip so mate epo yia꞉ aliya koa mateye gola꞉dlepe,” diyo. 27 Utulala ikadepe salita mo-matlati Mosesta ya꞉ dali ku di dla ta꞉depo halemama kaula pato dla dlokomaiyo. Epalati yútapo ma ilame mo-godla puaiyo. Isip sota epela natipame ma ilame potlati yia꞉ mate epo yia꞉ aliya koa mateye yúta hapuloma gola꞉demama potimaiyo. Epapedeme ipapele koko tle Godtapo Isip so hapulomaye potimama oplami haletapo alikili a꞉ma po-ulataiyo.

29 Epedeme alila oloma edla Godtapo Isalael soye Isip so do tle eleme alikili a꞉ma woyamaiyo. Adipalati, ya꞉tapo kaula patoye duka gladepame yúta seme mate seme mate dla kosukulli some hallati Isalael sotapo ta꞉la sekelle tle seme dla uliyo. Asiyama Isip sotapo ullati yú patota ma godemama poyuiyo. Epalati Isalael sotapo Isip so palli motoye yú peleyama dla hutiyemyelati tlamaiyo. 31 Epapele dulu dla yia꞉tapo Godta ya꞉ta itiyamale nati-imama Isip so dla wotiyalle hamili koko natipame God dla sikemte wowota꞉le mate ya꞉ dla mikadepe demama ma ya꞉ oko oplami Moses dla mape mikadepe diyo.

Copyright information for `XLA