c18:1-4Eke 2:21-22; Taiya 7:29

Exodus 18

Yetlota ya꞉ doko Moses natila puale

Epapele dulu dla Mosestapo ka꞉yapa mo-powataliya ya꞉llu Sipola mate epo ya꞉ akimlala dapiyamte mate ya꞉ doko Yetlo hala dla taiya diyo. Moses yami ka꞉yapa itapu hamale hiye Gesom
18:1-4 Gesom hi ya꞉ dulu kokoye asepe oplami demama apopo.
diyo. Adipalati, Mosesta epo atlaiyo, na꞉ye mo hema asepe puwapo. Epame yami hale hiye Eliyesel
18:1-4 Eliyesel hi ya꞉ dulu kokoye Godye na꞉ gadlalopo demama apopo.
diyo. Adipalati, Mosesta epo atlaiyo, “Na꞉ a ya꞉ Godta na꞉ gademama Pelota siyaladle tle alikili a꞉ma seme woyamuwapo,” diyo. c 

Epeleye Moses ya꞉ doko Yetlo iye Midiya mo dla alinepi poyupo God dla hapilalo oplami halaiyo. Epapeleye ya꞉tapo Godta Moses mate epo Isalael so mate dla gademama yia꞉ye eleme Isip mo tle alikili dla woyamale kokoye dalepame natila puaiyo.

Epedeme ya꞉ pumama ya꞉ doko Moses watle yu hamimama epo atlaiyo, “Na꞉ wa꞉ allu mate epame wa꞉ akimlala dapiyamte mate eleme wa꞉ natila puma,” diyo. Epammama yia꞉tapo Moses mate epo Isalael so mate ala dalupa dulu dla God ya꞉ tamali mateka꞉pi dla kimpo popa꞉lati edla puame woyamaiyo.

Epalati Mosesta ya꞉ dokota pula natipame ya꞉ dla tame heodepame ya꞉ye hamame huliyo. Epame namkale dle yu atlepame yia꞉ye ya꞉ kimna꞉ya dla elemtuwaiyo. Epame Mosestapo ya꞉ doko watle Godta Isalael so yilo Pelo dla epo Isip so dla koko halomhalale hapulomaye esemaiyo. Epame yia꞉tapo Isip mo tle alikili dla woyapo pumama pasakalo kokalle dulu dla pulati Godta yia꞉ gademhalale mape esemaiyo.

Epapeleye ya꞉ doko Yetlotapo yu i dalepame siyemama epo atlaiyo, “ God hi di dla ta꞉diya! Adipalati, ya꞉tapo wua꞉ye Pelo mate epame ya꞉ opa mate yia꞉ do dulu tle eleme alikili a꞉ma woyamuwapo. 11 Epapedeme na꞉ wata malama, wua꞉ Godtapo god hapulomaye tla꞉mtame halapo. Adipalati, ya꞉tapo Isalael soye Isip sota itiyamale tle elepame alikili dla woyamuwapo,” diyo. 12 Epammama ya꞉tapo alinepi poyupo God watle hamimama namkale dle alisisi opi mate halopi-iyo. Epalati A꞉lon mate epo Isalael so dokopala so opa opi mate yimkata puame ya꞉ mate God mila꞉pi tle popa꞉mama daya deiyo.

Koko gladlalo so hohomale koko

13 Epame Mosesta utulalati sila꞉time opa koko gladlowedeme ya꞉ta pollalo dla pollati Isalael sota ya꞉ hala dla pumhalaiyo. Adipalati, yia꞉ solotamaiyo, yia꞉ dulu dla yu topulolle koko mate epame upiyele koko mate hutiyemyaye Mosesta ka꞉depo gladlepo depame. Epammama opatapo utulalati kotiyapame Moses hala dla ta demha꞉ha꞉mama tamila꞉la dla tame gudemdiyo. 14 Yia꞉ta epammha꞉ha꞉lati Moses ya꞉ doko Yetlota koko i natipame ya꞉ watle epo atlaiyo, “Wa꞉ opa hapuloma iwolo natine. Yia꞉ alila hapuloma wa꞉ dla puame alupo koko gladlowedeme utulalati kotiyapo tame tamila꞉la dla gude demha꞉ha꞉po. Epapedeme wa꞉ adipalati mowolo koko iye hamhalema꞉?” diyo.

15 Amasiyama Mosestapo ya꞉ watle epo atlaiyo, “Opatapo yia꞉ dulu dla yu topulolle koko mate epo upiyele koko mate hutiyelati Godta solotamale koko dlallepo depame gadle yilo na꞉ hala dla pumulumama ammdepo. Epalati na꞉tapo yia꞉ kokoye gladepame yia꞉ watle God ya꞉ aiyalma kokoye imdepo,” diyo.

17 Amasiyama Moses ya꞉ dokotapo epo atlaiyo, “Wa꞉ koko iye woloma ka꞉dle api tle po-ammhalasema. 18 Adipalati, wa꞉ mate epame opa wa꞉ natilowa depo pumhalale so mateye sikemte susukalemama hohopeyalimelepe. Ame adipalati, oko eye pta pato, oplami hatlota haloweye po-ala꞉na. 19 Epedeme na꞉tapo wa꞉ye woloma molo atlati Godtapo wa꞉ mate hallepe. Epapele dulu dla wa꞉tapo opa yilo God mate yukamhalaye pta ka꞉pi, epame wa꞉tapo yia꞉ watle God ya꞉ aiyalma dolumha꞉ha꞉mama woloma ka꞉depo ha꞉ha꞉lowe koko imhalaye e ma pta ka꞉pi. 21 Amasiyama wa꞉ opa opiye huhulumane, yia꞉tapo wa꞉ta opa koko glademhala oko ipiye yia꞉ta halepo depame. Epapele dulu dla wa꞉ opa ewolo hohomama woloma God wowota꞉lalo so tlo hohomelepe. Epame mani yilo yimkadulo koko gladlowa depo malamalalo soye pohohomolowa. Amasiyama woloma ikadepe koko halomalalo so tlo huhulupame hohomelepe. Epame alumale meyelope meyelope dle dla ipila꞉mtamama opitapo 10 opa epapele omha꞉ha꞉, epame opa opitapo 50 opa epapele omha꞉ha꞉, epame opitapo 100 opa epapele omha꞉ha꞉, epame opitapo 1000 opa epapele omha꞉ha꞉demtelepe. 22 Epapedeme opa iwolotapo koko gladlalo so ha꞉ha꞉lepe. Amasiyama koko patoto tlope wa꞉ hala dla gladlowedeme pua demha꞉ha꞉lepe. Epapele koko tle yia꞉tapo wa꞉ oko ipiye gademha꞉ha꞉lati wa꞉tapo posukallowa. 23 Epapedeme koko iye Godta solotamale kokopo. Epapele dulu dla wa꞉ta koko i hamhallepiye, eta wa꞉ posukallowa. Epalati opatapo yia꞉ kokoye ka꞉depo gladla natipame sisiyele mate ma ilamtademha꞉ha꞉lepe.”

24 Epalati Mosestapo ya꞉ dokota molo atlale yu dalepame koko eye ka꞉dena demama me-haiyo. 25 Epammama ya꞉tapo alumale meyelope meyelope dle omha꞉ha꞉mtlowe opa ka꞉ka꞉dle hohomaiyo. 26 Epame yia꞉tapo opa koko glademha꞉ha꞉mdiyo. Amasiyama isikimi koko patoto tlo Moses hala dla halopo pumdiyo.

27 Epapele dulu dla koko ita tame gudlati Moses ya꞉ dokotapo ya꞉ saliyome ma me-ya꞉ mo dla taiyo.

Copyright information for `XLA