Hebrews 3

Yesuta Moses tla꞉mtame hala koko

Epedeme mikadepe dle so namkadulo, Godtapo wua꞉ye ya꞉ opa depame ma-sisilamuwapo. Epapedeme wua꞉ Yesu kokoye malamaiya. Godtapo Yesuye di watle ma-tane duwapo, ya꞉tapo di mikadepe dle so alumale dokopala oplami hallepo depame. Epapele dulu dla Mosestapo God ya꞉ opa gademama God yu dla hutullupo sela꞉uwaye, epammama Yesutapo ya꞉ tane dle God yu dla hutullupo sela꞉uwapo. Epedeme wua꞉ natiya, opatapo oplami haleta aya ka꞉pi hamhalla natipame ya꞉ watle atlemama, aya ka꞉pi halalo oplami, depame ya꞉ hiye di dla hamhetamdiye, epammama Godtapo Yesu tlo di ikadepe dla hamhetamama asiyama Moses tlo woya isili tiyama dla hamtuluwapo. Epapele dulu dla aya hapulomaye yo halalo so me-ha꞉ha꞉po. Amasiyama Godtapo koko hapuloma dinapolalo halapo.

Epedeme Mosestapo God ya꞉ opa yilo salladle oko ka꞉pi hauwapo. Ya꞉ oko etapo Godta alotle ya꞉ opa dla bobotimatimolowe kokoye imuwapo. Amasiyama God Yami Kelisotapo God ya꞉ opaye dokopala depo halemama oko ka꞉pi hamhalapo. Epedeme ditapo mikadepe dle dulu dla me-kokalepo ha꞉ha꞉mama dita dalemha꞉ha꞉mama omha꞉ha꞉ kokoye pomellalo wekelepiye, eta dia꞉ye ikadepe God ya꞉ opa dlepe.

Pomikadepe dle koko dla molo atlale

Epapedeme Hela꞉dle Sokotapo epo atlapo,

“Watapo wua꞉ God yu dalepame wua꞉ dupa kokalalimiya.
Adipalati, wua꞉ mamadulotapo dalupa dulu dla siyamama epo dupa kokalimduwa koko tle God dla allimduwapo.
Epedeme wua꞉ mamadulotapo 40 sokomoko dalupa dulu dla siyamama
na꞉ta yia꞉ watle koko patoto halomduwaye me-natimduwapo.
Epapele tlope yia꞉ na꞉ yu dallowe allimama
na꞉ dla siyaladle hapimduwapo.
10 Epapedeme na꞉tapo yia꞉ mate sikemte siyalademama epo atluwapo,
‘Yia꞉ye na꞉ tle alikili a꞉ma tamalapo.
Epame yia꞉ na꞉ kokoye pomalamasema,’ duwapo.
11 Epapele koko tle na꞉tapo siyaladle mate yu ipo itiyapo himiwapo,
‘Yia꞉tapo na꞉ta hedlowe mo dinapele dla po-u-ulapo tuluwa.’”
12 Epedeme mikadepe dle so namkadulo, wua꞉ wolomape. Batalimale malamale mate epo malamale tatlamale mateta wua꞉ye pasakalo halemhala God tle alikili dla elemta demiya. 13 Amasiyama batalimale kokotapo wua꞉ dupa kokalalimalala depame wua꞉ alila hapuloma dulu dla yimkadulo gadle yu mate asiyama gade asiyama gade demha꞉ha꞉iya. 14 Epapele dulu dla dita ka꞉yapa mikadepe depame itiyamale mate ha꞉ha꞉uwa me-emte mosukulu dla tame gudlepiye, eta dia꞉ye Keliso mate hatlope depo ha꞉ha꞉mama apelepe. 15 Epapele koko tle God yu bukata epo atlapo,

“Watapo wua꞉ God yu dalepame wua꞉ dupa kokalalimiya.
Adipalati, wua꞉ mamadulota epo dupa kokalalimduwa koko tle God dla allimduwapo.”
16 Epedeme dulu hema opa anawolotapo God yu dalla allimduwa? Eye Isalael so Mosesta Isip mo tle alikili dla eleme woyamale sota ammduwapo. 17 Epame 40 sokomoko dulu dla Godtapo opa anawolo dla siyaladle pato himhaluwa? Eye Isalael so batalimale koko halopame dalupa dulu dla palimpuwa sopo. 18 Epame Godta ma opa anawolo watle yu itiyapo himimama, “Wua꞉ na꞉ta hedlowe mo dinapele dla po-u-ulapo tuluwa,” duwa? Eye ya꞉ yu dla posalladlalo siyamale Isalael so dla atlemama apuwapo. 19 Epedeme di natipo, yia꞉ta mikadepe dle pa꞉le koko tle yia꞉ta Godta hedlowe mo dinapele dla po-u-ulapo tuwana.

Copyright information for `XLA