Hebrews 6

Di mikadepe dle so amko dla ipapele koko imdepo. Eye polowe dla elemtlalo batalimale koko tle malamale meyelope depame God dla mikadepe dlowe koko mate, epame yú tulluwe koko mate, epame dota dokopala dla hohopo inoma sumolowe koko mate, epame palli tle ma silliwe koko mate, epame kokó ellalo koko gladle koko mate. Amasiyama dia꞉ mikadepe dle dulu dla ala amkoteta꞉le so epapele some poha꞉ha꞉sema. Epedeme di ka꞉dena, dita mikadepe dle dulu dla ma a꞉ma tamalemama mikadepe dle dulu dla mo-opa depo ha꞉ha꞉ so epapele some ha꞉ha꞉loweye. Epedeme Godta ka꞉dena dlepiye, di epapolowepo.

Opata mikadepe dle tle alikili a꞉ma tlala depame molo atlale

Epapele dulu dla di mikadepe dle dulu tle ma alikili dla potale soye ma adipo hohopa꞉, yia꞉ta ma malamale meyelope depo God dla heheletimelepo depame? Adipalati, yia꞉ye Godta hela꞉dle kokoye mo-malapame Pepele dimo koko ma ma-dla natiwapo. Epame Hela꞉dle Soko ma ma-hamuwapo. Epame yia꞉ye God yu ka꞉dle ma ma-hauwapo. Epame Godta alotle ta꞉lamo amko mita꞉plowe oloma edla ya꞉ta itiyamaleta puluwe koko ma mo-malamuwapo. Epapele tlope yia꞉ye yia꞉ta mikadepe dleye melepame ma alikili dla potauwapo. Epedeme ipapele soye ma malamale meyelope depo God hala dla elempuluweye pta kokalena. Adipalati, yia꞉tapo God Yamiye mamisika꞉ dali di dla gogodemha꞉ha꞉mama opa inoma dali dla ya꞉ dla wota꞉le hapimha꞉ha꞉po.

Epele dulu dla opa opiye ta꞉la ka꞉pi epapele some ha꞉ha꞉po. Tiyota ta꞉la dla hellati dlowe alisisita ka꞉pi matapame dlomoko milimalati yo emalalo oplamita hauwalemdiye, epapele some ha꞉ha꞉po. Epapedeme Godye epapele ta꞉la dla sikemte siyemhalapo. Amasiyama opa opiye ta꞉la batalimale epapele some ha꞉ha꞉po. Ta꞉la edla osamokolo batalimale siyapota matapame Godta kasilamale isili dla tula yakomhalapo. Epalati Godtapo ta꞉la eye mosukulu alila dla dlapata misteli demhalapo.

Mikadepe dle so namkadulo, na꞉ mikadepe dema, na꞉ta yu ipo atlamale dulu dla na꞉ wua꞉ koko po-atlamasema. Adipalati, na꞉malamana, wua꞉ye God tle pasakalo gadle halowe so opata koko halomalalo epapele some halomha꞉ha꞉po. 10 Adipalati, wua꞉ta God yilo oko sikemte halomha꞉ha꞉uwaye, ya꞉ e powelimhalasema. Epame wua꞉ta ya꞉ye sikemte malamama mikadepe dle soye woloma gagademha꞉ha꞉uwaye, ya꞉ e ma powelisema. Epedeme wua꞉ta yia꞉ye ala me-gagademha꞉ha꞉ye ya꞉ me-malahalapo. 11 Epapele dulu dla di sikemte solotama, wua꞉ta yimkadulo sikemte malamha꞉ha꞉ye duka dla gudemiya. Adipalati, eta wua꞉ta Godta pasakalo gadlowe dla dalemha꞉ha꞉mama itiyamale mate mosukulu dla tame gudlepe. 12 Epedeme wua꞉ta ipapelepiye, eta wua꞉ta mikadepe dle dulu dla hohopeyalimale mate poha꞉ha꞉lowa. Amasiyama wua꞉ mikadepe dle tle God dla pasakalo halowedeme dalemha꞉ha꞉mama omha꞉ha꞉ sota koko halomha꞉ha꞉ natipame dolumaiya.

Godta yu itiyapo himili dla mikadepe dlowe ka꞉pi

13 Oplami haletapo Godye potla꞉mtame halasema. Epedeme Godtapo me-ya꞉ hi mate aiyalma sepame A꞉iblaham mate yu itiyapo himimama epo atluwapo,

14 “Na꞉tapo wa꞉ gademama wa꞉ mamadulo pasataleye hapilowepo,” duwapo.
15 Epalati A꞉iblahamtapo sadle mate Godta yu itiyapo himili dla omhaluwapo. Epame ya꞉ta epo omhalepo gudlati Godtapo ya꞉ watle hamili depo yu himili kokoye ya꞉ watle hamiwapo.

16 Epedeme opatapo aiyalma solowedeme apelepiye, yia꞉ye yia꞉ tla꞉mtame hala oplami hi sepame aiyalma semdepo. Epame yia꞉ta aiyalma ipo semdetapo yia꞉ta yu itiyapo himili kokoye kokalemdepo. Epalati opata koko e natimama yu poballowa. 17 Epammama Godtapo ya꞉ opa gadlowedeme yu itiyapo himiwapo. Epedeme opatapo ya꞉ta atlama koko dla mikadepe dlepo depame ya꞉tapo itiyamale mate aiyalma ma ma-sauwapo. Epapedeme Godtapo di watle ya꞉ yu itiyapo himili koko mate epo aiyalma solowe koko mate hapiwapo. Koko dapiyamte iye ma meyelope dloweye po-ala꞉na. Adipalati, Godye isikimi pomala-atlasemde. Epapedeme dia꞉ dla wota꞉le pe-elasema. Epame ditapo Godta dia꞉ dla pasakalo hamilowe dla omha꞉ha꞉mama gadle yilo God hala dla ullumpumuluwapo.

19 Epedeme Godtapo di watle pasakalo hamilowe koko itapo di pasakalo dla koata halemyelala depame deata dali dla himomelemhalemdiye, epapele some halapo. Epapeleye dea eye pta sikemte sesemomama kestloweye po-ala꞉na. Epame dea eye Pepele dimo aiyalma aya dulu dla tlukata komale seme tle tuwame himomelemhalapo. 20 Mo iye Yesutapo ya꞉ tatle itapu mo-ulatuwapo, dia꞉ gadlowedeme. Adipalati, ya꞉ye Melkisedek some halemama God ka꞉ epo di ka꞉ duka dla kokó halepo hallalo halapo.

Copyright information for `XLA