Revelation of John 18

Babilon mo patoye batalipo hamastale

Epedeme koko ita tame gudlati na꞉ matle banakaka oplami haleta sikemte itiyamale hame pepele di tle malla natiwa. Epame ya꞉ta hela꞉dletapo ta꞉lamo pato mate hela꞉depo maluwa. Epame ya꞉tapo sikemte yu teta꞉le mate epo atluwa,

“Babilon mo patoye mo-batalipo hamastlati
opata ma mo edla poha꞉ha꞉sema. Mo siyapo pomoluwapo.
Epalati bataliya yimlalatapo ma mo edla ha꞉ha꞉po.
Epame opata posolotamalalo wekele tea ma edla ha꞉ha꞉po.
Adipalati, ta꞉lamo so hapulomatapo ya꞉ batalimale kokoye kawata yú some mo-dlopo yiyilalimsiyamduwapo.
Epame ta꞉lamo dokopala so hapulomatapo ya꞉ mate mo-hutiyemduwapo.
Epame ya꞉ batalimaletapo alisisi aya watalo soye ma-alisisi poposatilimale so demduwapo.”
Epame na꞉ matle yuta pepele di tle epo atla daluwa,

“Na꞉ opa, wua꞉ Babilon dulu tle alikili dla woyamaiya,
wua꞉tapo ya꞉ mate batalimale koko pohalalo wekelepo depame.
Adipalati, wua꞉tapo ya꞉ mate batalimale koko halomelepiye,
wua꞉ mape ya꞉ta ya꞉ batalimale asiyama wotiyalle halati wua꞉ mate halomelepe.
Ya꞉ batalimale kokotapo kolumhetamama pepele di umula yakomapo.
Epalati Godtapo ya꞉ batalimale asiyama hamiloweye powelisema.
Ya꞉tapo batalimale koko opa opi dla hamhaluwaye ma asiyama ya꞉ watle hapiya.
Epame ya꞉tapo opa opi dla batalimale koko halomhaluwa asiyama ya꞉ watle hapimama tla꞉mtame hapiya.
Epame ya꞉tapo ya꞉ batalimale koko mate opa opi dla kawata yú some ilimhaluwaye ma asiyama ya꞉ watle imama tla꞉mtame iya.
Ya꞉tapo ya꞉skamu di dla hamhetamhalemama alisisi pasatepo haluwa,
e mate ala꞉le asiyamaye wotiyalle mate dupa kolle mate ya꞉ dla hapiya.
Adipalati, ya꞉tapo ya꞉skamu epo atlemduwapo,
‘Na꞉ye podupulapi, na꞉ye dokopala a꞉yapo. Epedeme dupa kolle kokota na꞉ dla populuwa,’ demduwapo.
Epapedeme pakasiyamalalo wotiyalle koko ipapeletapo ya꞉ dla pulupe,
polowe koko mate epame dupa kolle koko mate epo daya ta꞉le koko mateta ya꞉ dla pulupe.
Epame dlapatapo ya꞉ye hamdepo hamastlepe.
Adipalati, ya꞉ koko gladlalo Lod Godye sikemte itiyamalepo.”
Epalati ta꞉lamo dokopala so ya꞉ mate hutiyelalo sotapo dlapata ya꞉ hamdemhala namileta hetla natipame ya꞉ yilo dupa kolemama a꞉lemyelepe. 10 Epame yia꞉ta ya꞉ta wotiyalle ha koko e natipame wowota꞉mama pateka꞉mu tle omha꞉ha꞉mama epo atellepe,

“Woiyo, Babilon mo pato ya꞉mkale!
Wa꞉ pta itiyamale mo haluwapo.
Epapele tlope alila kiyele dulu hema pakasiyamalalo koko gladle kokotapo wa꞉ dla mo-woyamapo,” dlepe.
11 Epame ta꞉lamo hema alisisi aya watalo sotapo ya꞉ yilo dupa kolemha꞉ha꞉ma a꞉lemha꞉ha꞉po. Adipalati, oplami haletapo ma yia꞉ tle alisisi ipapele pohalomolowa. 12 Eye goldpo, epame silbapo, epo ka꞉ka꞉dle ewala yimlala, epame molipo. Epame tluka ka꞉ka꞉dle mila꞉pi meyelope meyelope dle mate, epo dali ullu ka꞉depo pamalalo mila꞉pi meyelope meyelope dle mate, epame alisisi opi mila꞉pi meyelope meyelope dle elota mimita꞉ple, epo dali ka꞉dleta mimita꞉ple, epo blons ewalata mimita꞉ple, epo olita mimita꞉ple, epame ewala kamaleta mimita꞉ple. 13 Epame daya dla goudepo dlalo alisisi mila꞉pi meyelope meyelope dle mate, epo ka꞉depo seyamale pamalalo alisisi mate, epame osokolo mate. Epame wain yú mate epame olipi ope mate, epo palawa daya mate, epo bulumkiyawa mate epo sipi aliya mate, epame hos aliya mate epo aliya koa mate, epame asiyama pa꞉le dla oko halomha꞉ha꞉lalo so opa mate.

14 Epame yia꞉tapo Babilon watle epo atellepe, “Babilon, ka꞉ka꞉dle alisisi wa꞉ta sikemte solotamalalo hapulomatapo wa꞉ tle mo-haodlepo. Epo wa꞉ta daya ka꞉ka꞉dle demhalemduwa mate epo alisisi pasatepo halemduwa mateta wa꞉ tle mo-pa꞉po. Epedeme wa꞉ matle alisisi iye ma ilame pohalomolowa,” dlepe. 15 Opa iwolotapo yia꞉ alisisiye Babilon watle halopimha꞉ha꞉mama mani sikemte poposatilipo ha꞉ha꞉mduwapo. Amasiyama ya꞉ta wotiyalle hala natipame yia꞉tapo pateka꞉mu tle omha꞉ha꞉mama wowota꞉mha꞉ha꞉lepe. Epame yia꞉ta dupa kolle mate a꞉lle mate ha꞉ha꞉mama epo atlamha꞉ha꞉lepe,

16 “Woiyo, Babilon mo pato ya꞉mkale,
mo-batalimapo!
Ya꞉tapo tluka omteka꞉pele sikemte ka꞉ka꞉dle didiyemhalemama
mani patota halomale gold alisisi mate epo ewala yimka꞉sikili ka꞉ka꞉dle mate epo moli mate sokolomale didiyemhalemduwapo.
17 Epapele tlope ya꞉tapo pakasiyamalalo alila kiyele dla ya꞉ alisisi ka꞉ka꞉dle hapuloma eye mo-haodlepo.”
Epalati yú koa patoto halopo siyamalalo so mate epo yia꞉ opa mate pateka꞉mu tle ha꞉ha꞉mama Babilon mo omha꞉ha꞉lepe.
18 Epo yia꞉ta Babilon mota hamdemhala dlapa namile patota hetla natipame epo atellepe, “Ta꞉lamo pato dulu hema Babilon mo pato ipapele hale hawa ikadepe,” dlepe. 19 Epame yia꞉ta ya꞉ yilo dupa kolle mate a꞉lemyemama yia꞉ dokopala dla apuputa kukutimyemama epo atlamyelepe,

“Woiyo, Babilon mo pato ya꞉mkale,
mo-batalimapo!
Koa watalo so ditapo ya꞉ alisisi yemha꞉ha꞉mama mani patoto halomduwapo.
Amasiyama alila kiyele dulu hema pakasiyamalalo Godta ya꞉ye batalipo hamastapo,” dlepe.
20 Amasiyama Pepele di dla ha꞉ha꞉lalo so mate epo God ya꞉ opa mate epame Taiya dle so opa mate epo God tle yu hapame molo atlamalalo so mate wua꞉ sisiyeiya. Adipalati, Babilontapo wua꞉ dla wotiyalle hapimhaluwa e ya꞉ asiyama Godtapo ya꞉ye yumama batalipo hamastapo.

21 Epalati banakaka oplami hale sikemte itiyamaletapo ewala patoye hame kaula pato duka dla hamastamama epo atluwa,

“Babilon mo patoye ipo hamastlati ya꞉tapo matle pohallowa.
22 Epedeme Babilon, wa꞉ dulu dla opatapo woiyo yu mate
epo hulu yu mate epo sala sale mate matle podallowa.
Epame opatapo matle wa꞉ dulu dla oko pohalomha꞉ha꞉lowa.
Epame wa꞉ dulu dla wola꞉tapo daya ma poyulumha꞉ha꞉lowa.
23 Epame tuloma wa꞉ dulu dla hela꞉depo ha꞉ha꞉mduwatapo
matle hela꞉depo ha꞉ha꞉la ponatilowa.
Epame opata wola꞉ halomha꞉ha꞉mama
sisiyemha꞉ha꞉mduwa yuye matle podallowa.
Epame wa꞉ alisisi aya omha꞉ha꞉lalo sotapo ta꞉lamo pato hema sikemte itiyamale mate ha꞉ha꞉uwapo.
Epame wa꞉ osolo kokotapo ta꞉lamo so hapulomaye alikili dla me-eleme tauwapo.
24 Epapedeme Godtapo Babilon mo dla ya꞉ batalimale asiyamaye ma-hamipo.
Adipalati, ya꞉tapo God tle yu hapame molo atlamalalo so mate epame God ya꞉ opa mate epame ta꞉lamo pato dulu dla opa opi mate mo-potimduwapo.”
Copyright information for `XLA