Romans 10

Epedeme mikadepe dle so namkadulo, na꞉tapo na꞉ dupa dulu tle Isalael so yilo sikemte inoma sumale pato himhalemde, yia꞉tapo pasakalo gadle halepo depame. Isalael so yia꞉ sikemte solotamde God dolumtlowedeme, amasiyama dulu edla yia꞉ ikadepe api tle God dolumtloweye poyia꞉malamana. Epapedeme yia꞉ mape Godta meyelo opaye ya꞉ mila꞉pi tle ullu pa꞉talo so demhalaye poyia꞉malamana. Amasiyama yia꞉ miyelo itiyamale tle God mila꞉pi tle ullu pa꞉talo so dlowa depo yia꞉ aiyalma dolumha꞉ha꞉ta yia꞉ pogadesema. Epapele koko tle yia꞉tapo ikadepe God mila꞉pi tle ullu pa꞉talo so depo ha꞉ha꞉lowe koko haloweye posolotamasema. Adipalati, Kelisotapo aiyalmata halopo puwa koko hapulomaye dia꞉ yilo ma-ala꞉po guduwapo. Epapedeme oplami antapo Keliso dla mikadepe dlepiye, asiyama Godtapo ya꞉ye ya꞉ mila꞉pi tle ullu pa꞉le oplami dlepe.

Ka꞉dle yutapo pasakalo gadle kokoye hampuwapo

Epapedeme aiyalmata hampuale ullu pa꞉po hallowe koko dla Mosestapo epo atluwapo, “Oplami antapo me-pasakalo hali dlepiye, ya꞉ aiyalma koko hapulomaye woloma dolumhallepe,” duwapo. Amasiyama mikadepe dle kokota hampuale ullu pa꞉po hallowe kokotapo epo atlapo, “Poka꞉dena, opatapo Kelisota yia꞉ gadlepo depame Pepele dimo dla Keliso totamala hetloweye. Epame ma poka꞉dena, opatapo Kelisota yia꞉ gadlepo depame tame wabasi dulu dla ya꞉ totamsiyamoloweye,” depo. Adipalati, isikimi hatlo Keliso dla mikadepe dlowe koko siyapota pasakalo gadlowe kokoye hampumhalapo. Adipalati, God yu bukata epo atlapo,

“God ya꞉ yuye wa꞉ mateka꞉pi dla halapo.
Epame yu eye wa꞉ mati dla epo wa꞉ dupa dulu dla elapo.”
Epedeme mikadepe depo hallowe yu eye dita atlamsiyamapo.

Epedeme wa꞉ wa꞉ mati tle Yesuye Lodpo depo botomastapame ma ya꞉ye Godta ma powale tle ma pasakalo dle koko dla mikadepe dlepiye, wa꞉ye pasakalo gadle halepe. 10 Adipalati, wa꞉ dupa duluta mikadepe dle koko tle Godta wa꞉ye ya꞉ mila꞉pi tle ullu pa꞉le oplami demhalapo. Epame wa꞉ mati tle Yesuye Lodpo depo botomastlepiye, etapo wa꞉ye pasakalo gadle kokoye halepe. 11 Adipalati, God yu bukatapo epo atlapo,

“Oplami antapo Keliso dla mikadepe dlepiye, ya꞉ wota꞉le ponatimhallowa,” depo.
12 Ipapele koko dulu dla di natipo, Yu so mate epo po-Yu so mateye ma-hatlopepo. Adipalati, di Lod ma hatlopepo. Epapele koko tle ya꞉tapo ya꞉ watle otele himha꞉ha꞉ so dla ka꞉ka꞉dle koko hapuloma halopimhalapo. 13 Adipalati, God yu bukatapo epo atlapo,

“Oplami antapo gadle yilo Lod dla otele himhallepiye,
ya꞉ta pasakalo gadle kokoye halepe.”
14 Epapele dulu dla opata God dla pomikadepe dlalo wekematiye, yia꞉ adipammama pasakalo gadlowe yilo ya꞉ dla otele himpa꞉? Epame yia꞉tapo ya꞉ koko podlallalo wekematiye, yia꞉ adipammama ya꞉ dla mikadepe depa꞉? Epame ka꞉dle yuye yia꞉ dla po-atlamalalo wekematiye, yia꞉ adipammama God yu dalepo hapa꞉? 15 Epame ka꞉dle yu atlamalalo soye potaiya dlalo wekematiye, yia꞉ adipo God yu atlamsiyamelemo? Epapedeme God yu bukatapo epo atlapo,

“Ka꞉dle yu hamsiyamalalo sotapo ka꞉dle yu hame pula natiloweye pta ka꞉pi.”
16 Amasiyama dulu edla pase opa hapulomatapo pomikadepe dena. Yu iye Aisayatapo God yu buka dla epo atluwapo,

“Lod, di yuye opa anawolota mikadepe duwa?”
17 Epapedeme ka꞉dle yu Yesu Keliso koko dallowe kokotapo mikadepe dlowe kokoye hampuapo. 18 Epapele dulu dla Isalael soye adipapopa꞉? Yia꞉ ka꞉dle yu mo-daluwa? Yao, yia꞉ ma-dlaluwapo. Adipalati, God yu bukata epo atlapo,

“Ka꞉dle yu hamsiyamalalo sotapo ka꞉dle yuye ta꞉lamo pato dla tame
opa hapuloma dla ma-atlamtauwapo.”
19 Amasiyama Isalael sotapo ka꞉dle yu iye dalepame malamale hauwa? Yao, yia꞉ malamale hauwa tlope, woloma pomikadepe dena. Epedeme Mosestapo epo ilimuwapo,

“Godtapo epo atluwapo,
‘Na꞉tapo po-Yu so dla gadle himhallati
ma wua꞉tapo yia꞉ dla elle himha꞉ha꞉mama yia꞉ dla siyalasiyalademha꞉ha꞉lepe.’”
20 Epame Aisayatapo Godta atlamale yu iye wota꞉le pa꞉po epo atluwapo,

“Opa na꞉ pototamha꞉ha꞉lalo wekele sotapo na꞉ye ma-natiwapo.
Epame na꞉tapo na꞉ pototamalalo wekele so dla naskamu na꞉ kokoye nati-iwapo.”
21 Amasiyama Godtapo Isalael so dla epo atluwapo,

“Na꞉ alila hapuloma dulu dla wua꞉ elemolowedeme ma-dinapopo halemduwapo.
Amasiyama muwolo dupa kokalalimale koko tle na꞉ yu dla dalepo salladla allimduwapo.”
Copyright information for `XLA