Romans 16

Polota mikadepe dle so dla namkale dle yu atlale

Epedeme di nana Poibeye Kenekeleya mo dla dikon oko ka꞉pi halalo a꞉yapo. Epapedeme a꞉ya itapo wua꞉ hala dla pulati wua꞉tapo ya꞉ye Lod hi tle namkale dle mate sepame ya꞉ye woloma ka꞉pi gadlepe. Adipalati, ya꞉tapo na꞉ye koko opi tle woloma ka꞉pi gademhalemama opa opi mape ya꞉ta sikemte gademhalemduwapo.

Epame na꞉ta namkale dle yuye Plisila dla epo ya꞉wolali Akwila dla hamiya. Adipalati, yia꞉ Yesu Keliso dulu dla na꞉ oko ipi halalo sopo. Epame yia꞉tapo na꞉ pasakalo tlo sikemte ka꞉pi gademama asiyama yia꞉ tlo wotiyalle hamama mo-palila yakomuwapo. Epapele koko tle na꞉tapo namkadulo po-Yu so mikadepe dle so mate yia꞉ye sikemte malama. Epame yia꞉ aya dulu dla inoma sumha꞉ha꞉lalo so dla ma na꞉ta namkale dle yuye hamiya.

Epame namkale ikadepe Epainetus dla mape na꞉ta namkale dle yu hamiya. Adipalati, ya꞉tapo Asiya mo pato dulu dla ya꞉ tatle Keliso dla mikadepe duwapo.

Epame Meli dla mape na꞉ta namkale dle yuye hamiya. Adipalati, ya꞉tapo wua꞉ yilo oko pato hauwapo.

Epame na꞉ asiyadulo Andlonikus mate epo Yuniyas mate dla mape na꞉ta namkale dle yuye hamiya. Adipalati, yia꞉tapo na꞉ mate yimkata amtuwale aya dulu dla ha꞉ha꞉uwapo. Epapele dulu dla Taiya dle so opa dulu dla opa dapiyamte iwoloye sikemte i-itiyamale sopo. Yia꞉ye na꞉ ala Keliso dla pomikadepe dlalo hallati yia꞉ tatle mo-powataliya mikadepe depo ha꞉ha꞉uwapo.

Epame namkale Lod dulu dla hallalo Ampiliyatus dla mape na꞉ta namkale dle yuye hamiya.

Epame diamkale Lod dulu dla oko halalo oplami hale Ulbanus dla mape na꞉ta namkale dle yuye hamiya. Epo namkale Stakus dla mape na꞉ta namkale dle yuye hamiya.

10 Epame Apeles dla mape na꞉ta namkale dle yuye hamiya. Ya꞉tapo wotiyalle dulu medla halemama Keliso dla me-mikadepe depo haluwapo. Epame Alistobulus dla epo ya꞉ aya dulu dla ha꞉ha꞉lalo so mate dla na꞉ta namkale dle yuye hamiya.

11 Epame na꞉ asiya dulu dla hallalo oplami hale Helodiyon dla mape na꞉ta namkale dle yuye hamiya. Epo mikadepe dle so Nalkisus aya dla ha꞉ha꞉lalo so dla mape na꞉ta namkale dle yuye hamiya.

12 Epame a꞉ya Tlupaina mate epo ya꞉la Tluposa mate dla na꞉ta namkale dle yu mape hamiya. Adipalati, wola꞉ iwolotapo Lod yilo oko pato hamha꞉ha꞉po. Epo namkale ikadepe Pelsis dla mape na꞉ta namkale dle yuye hamiya. Adipalati, ya꞉ mape Lod dulu dla oko ka꞉pi halalo a꞉yapo.

13 Epame Lod dulu dla hallalo oplami Lupus dla mape na꞉ta namkale dle yuye hamiya. Epo ya꞉ wai dla mape na꞉ta namkale dle yuye hamiya. Adipalati, ya꞉tapo na꞉ wai epapele some halemama na꞉ye woloma ka꞉pi gademhaluwapo.

14 Epame na꞉ta namkale dle yuye Asunklitus dla epo Plegon dla epo Helmes dla epo Patlobas dla epo Helmas dla epame mikadepe dle so opi yia꞉ mate yimkata hatlope demde dla hamiya.

15 Epame Pilologus mate dla epo Yuliya mate dla epo Neleus mate dla epo yotumala mate dla epo Olumpas mate dla epame mikadepe dle so yia꞉ mate hatlope demde mate dla na꞉ta namkale dle yu mape hamiya.

16 Epedeme wua꞉ Keliso dulu dla ha꞉ha꞉mama namkale dle mate asiyama huhulama asiyama huhulama demha꞉ha꞉iya. Epame mo hema ha꞉ha꞉lalo mikadepe dle so hapulomatapo yia꞉ta namkale dle yuye wua꞉ dla hamima.

Polota mosukulu molo atlale yu hamili

17 Epapedeme mikadepe dle so namkadulo, wua꞉ dulu dla opa duka hukullalo so mate epo mikadepe dle soye alikili a꞉ma elemtlalo so mateye woloma natiya. Adipalati, yia꞉tapo ikadepe koko wua꞉ta dalepame hamuwa kokoye yia꞉ e podolumasemde. Epedeme yia꞉ tle alikili a꞉ma potame ha꞉ha꞉iya. 18 Adipalati, epapele sotapo Lodta solotamale kokoye podolumha꞉ha꞉sema. Amasiyama miyelo solotamale koko tlo dolumha꞉ha꞉mama yu sikemte o-opalli koko tle koko yeitamale soye batalimale koko dla elemtulumha꞉ha꞉po.

19 Epapedeme mikadepe dle so opa hapuloma ma-yia꞉malamana, wua꞉tapo Lod dla sikemte mikadepe depame salladepo siyama kokoye. Epedeme epapele kokotapo na꞉ dla siyele hamimhalapo. Amasiyama na꞉ sikemte solotama, wua꞉ta isikimi ka꞉ka꞉dle koko siyapo halomolowe tlo malastepo ha꞉ha꞉mama asiyama ma batalimale koko halomolowe dla kokotipo ha꞉ha꞉lepo depame.

20 Epame sadle hampulalo Godtapo Saitenta itiyamaleye yumpame Saitenye wua꞉ hete sitali dla himilipe. Epedeme di Lod Yesuta bokotiyapo malamaletapo wua꞉ta hapuloma mate dla hallepe.

Polo ya꞉mkadulota Loum so dla namkale dle yu hamili

21 Na꞉ mate oko halalo oplami Timoti mape ya꞉ta namkale dle yuye wua꞉ watle hamima. Epo na꞉ asiyadulo Lukiyus mate epo Yason mate epo Sosipate mateta yia꞉ta namkale dle yu mape wua꞉ watle hamima.

22 Epedeme Polo ya꞉ yu ilimalalo oplamiye Teltiyus na꞉po. Na꞉ mape Lod hi tle wua꞉ dla namkale dle yuye hamima.

23 Epame na꞉ta hallalo aya ya꞉ a Gaiyus mape ya꞉ta namkale dle yuye wua꞉ watle hamima. Aya dulu hema mikadepe dle so hapulomatapo yimkata inoma sumdepo. Epame Kolin mo pato dulu dla mani ompollalo oplami Elastus mape ya꞉ta namkale dle yuye wua꞉ watle hamima. Epo di ei Kuwaltus mape ya꞉ta namkale dle yuye wua꞉ watle hamima. 24 Epedeme di Lod Yesu Kelisota bokotiyapo malamaletapo wua꞉ta hapuloma mate dla hallepe.

Polota yu mosukulu atlale

25 Epapedeme God hi di dla ta꞉diya. Adipalati, ya꞉tapo na꞉ta atlamsela꞉ ka꞉dle yu itle wua꞉ta mikadepe dle itiyamale hamiloweye ala꞉na. Ka꞉dle yu Yesu Keliso koko iye ka꞉yapa mo-powataliya hemele hatiyomeleme eluwapo. 26 Amasiyama kokó halepo hallalo Godtapo yu hamiwapo, ka꞉dle yu iye God tle yu hapame molo atlamalalo sotapo buka dla ilimelepo depame. Epapuwa koko tle watapo ka꞉dle yuta ma-haliyamale dla botomastepo elapo, opa hapulomatapo Keliso dla mikadepe depame ya꞉ yu dla salladepo siyamelepo depame. 27 Epedeme Yesu Keliso tle ka꞉depo dinapolalo God hatlo ya꞉ hi tlo alila hapuloma di dla ta꞉demha꞉ha꞉iya. Eye ikadepepo.

Copyright information for `XLA