Titus 3

Mikadepe dle sota ha꞉ha꞉lowe koko

Epedeme mikadepe dle so opa dla ipapele kokoye imhalane, yia꞉tapo yia꞉ omha꞉ha꞉lalo gamani dokopala so yu dla epame mo dokopala so yu dla heodemha꞉ha꞉lepo depame. Epammama yia꞉tapo ka꞉ka꞉dle koko halomolowe dla ma-dinapopo ha꞉ha꞉lepo depame. Epame yia꞉ poka꞉dena, ya꞉mkale yu balemha꞉ha꞉mama oplami hale dla batalimale koko atloweye. Amasiyama yia꞉ sadle mate bokotiyapo malamale dulu dla ha꞉ha꞉mama yimkadulo mate namkale demha꞉ha꞉lowe ka꞉pi.

Epedeme Taites, wa꞉ dita ka꞉yapa ha꞉ha꞉uwa pasakalo malamane. Di ala pomikadepe dlalo ha꞉ha꞉mama pasakalo batalimale dulu dla ha꞉ha꞉uwapo. Dita God yu dla posalladlalo ha꞉ha꞉lati batalimale kokota dia꞉ye elemsiyamuwapo. Epalati ditapo yimkadulo allimduwapo, epame yimkadulo alisisi natipame solotamama yia꞉ye elemduwapo. Epame opata dia꞉ dla allilati asiyama dita yia꞉ye allimduwapo.

Amasiyama God di pasakalo gadlalotapo ya꞉ta namkale dle koko mate epame yimkadulo malamolowe koko mateta dia꞉ dla woyamalati ya꞉tapo di pasakaloye gaduwapo. Epele dulu dla ditapo ka꞉ka꞉dle koko halomha꞉ha꞉lati po-apena. Amasiyama ya꞉tapo meyelo di bokotiyapo malamale tle apuwapo. Epame ya꞉tapo di batalimaleye howahalopame Hela꞉dle Sokoye di watle hamiwapo, ditapo ma opa amko so depo ha꞉ha꞉lepo depame. Godtapo Yesu Keliso di pasakalo gadlaloye dia꞉ dla malane duwapo, ditapo ya꞉ tle Hela꞉dle Sokoye hamama sikemte poposatlipo ha꞉ha꞉lepo depame. Epapedeme Godtapo dia꞉ye ya꞉ta bokotiyapo malamale tle ma ullu pa꞉talo so dlati asiyama ditapo kokó halepo hallalo pasakaloye halowedeme omha꞉ha꞉po. Epedeme yu iye ikadepepo. Adipalati, yu itapo opa hapulomaye gagademhalapo. Epedeme na꞉ solotama, wa꞉tapo koko iye mikadepe dle so dla woloma imhallepo depame. Epelepiye, yia꞉tapo woloma ka꞉ka꞉dle koko halomha꞉ha꞉mama opa gagademha꞉ha꞉lepe.

Amasiyama wa꞉ yimka꞉sikili koko dla yu topulollalo so tle alikili dla woyapo halane. Epame opatapo Yu so yia꞉ toto koko esemale mate epo Mosesta aiyalma hatitimale dolumolowe koko yilo yu topulolemha꞉ha꞉ natipame dolumiya. Adipalati, ipapele koko hapulomatapo opaye pogadesemde. 10 Epame oplami antapo biskapa imale hame sos dulu dla imsela꞉mama opa duka gladlepiye, epapele oplami dla humatlane. Epame ya꞉ta wa꞉ yu podallalo wekelati matle ya꞉ye humatlane. Amasiyama ya꞉ta ala wa꞉ yu podallalo me-imsela꞉lepiye, ya꞉ye alikili dla pomelene. 11 Ame adipalati, ya꞉ye batalimale oplamipo. Epedeme ya꞉ta koko halomhalatapo ya꞉ batalimaleye haliyamale dla ma-nati-ipo.

Mosukulu namkale dle yu atlale

12 Na꞉tapo Atemas epapele o Tikikus epapeleye wa꞉ dla tane dlowepo. Epame ya꞉tapo wa꞉ta hala dla tame woyamalati asiyama wa꞉tapo Nikopolis mo dla na꞉ye umula puane. Adipalati, na꞉ solotama, tene oloma dla wa꞉ mate edla yimkata ha꞉ha꞉lowedeme. 13 Epame gamani aiyalma koko malastale oplami Sinasi mate epo ya꞉mkale Apolos mateye gadene. Epame yia꞉ta mo hale dla tlowedeme ha꞉ha꞉lati yia꞉ watle yia꞉ta api duka dla tamama halopo tlowe alisisi ma-ala꞉leye halopine. 14 Epame ka꞉dena, mikadepe dle sotapo ka꞉ka꞉dle koko halomha꞉ha꞉lowe tlo malamha꞉ha꞉mama asiyama gade asiyama gade demha꞉ha꞉loweye. Adipalati, di opatapo mikadepe dle dulu dla ha꞉ha꞉mama isikimi ha꞉ha꞉lowe tlo poka꞉dena.

15 Epedeme na꞉ mate ha꞉ha꞉lalo so hapulomatapo wa꞉ dla namkale dle yuye hamipo. Epapedeme Taites, ma wa꞉tapo dita namkale dle yu iye wa꞉ mate ha꞉ha꞉ mikadepe dle so dla atlane.

Godta bokotiyapo malamale kokotapo wua꞉ mate alila hapuloma dulu dla hallepe.

Copyright information for `XLA