1 Corinthians 10

Ara ŋana kinda ma tamandi kaika lâ samâŋa ne zo

Niŋgu-nambwe wukale, naŋa iloŋgu tu miki ma kalomi ŋgere kilo ŋana mâsi arara Maro Kindeni iveta panzi timbunda wukale lâ Mose ne zo. Lâ zo muŋgâŋa ŋinde, Maro Kindeni io take-take ŋalae toŋge tu ma ikea ŋananzi wa itula nzâla panzi wa. Mine nde kinzi rârâni soka mâsa-mâsa simbwaliu Tâi Ŋiŋi ŋgini silâ.

Mao nâ, kinzi soka take-take kalo wa tâi ŋgini wa, aku lâ zo ŋinde kinzi sipauwo warakanzi simo Mose kalo. Aku kinzi rârâni sika samba ne kâpwa wa, sinu samba ne lââ wa. Mao nâ, Maro Kindeni iveta lââ ŋinde isâko lâ mira sapâŋa ilo irere indue panzi kala sinu, aku mirani ndaina nde iyoka kunzi ilâ. Mira ŋinde nde Kirisi tamwata. Taitu Maro Kindeni wisi nâna panzi timbunda ŋinde rârâ. Mine nde kinzi sipamateteu lâ, aku karaenzi ikeno pwapwataki lâ nia bilimu ŋinde.

Ayo, ambo kinda ma kalonda ŋgere sondo ŋana mâsi rârâni ŋinde kâ, ande ŋinde ma igagati kinda ŋana tapu mulinda pa nenzi mâsi ŋana ilonzi yosi pa kelekele sakamao kâ. Kinzi pinde siwâŋgi sipaneanzi maro laŋeŋa, andeta kinda ma taveta mine ndimo. Maro Kindeni kawa ŋgua ikeno lâ pepa tini mine tu, “Kinzi sisaŋona sika wa sinu lâ, ŋineŋga simandi ku sikina kiniŋa sipanea maro laŋeŋa.” Aŋga pinde nde sipalulua tininzi potomule, andeta kinda ma taveta mine ndimo. Miki kaloŋo ŋga; Maro Kindeni wisi nâna ŋalae ŋana nenzi mâsi ŋinde kâ. Mine nde lâ kari taitu nâ ipunzi tamâta 23,000 pâta sipamateteu lâ. Aŋga pinde nde taŋanzi kaika pa Maro Ŋalae, andeta kinda ma taveta mine ndimo. Maro Kindeni wisi nâna ŋana nenzi mâsi ŋinde kâ, kala ionzi mwâta saka simâ panzi ku sikanzi sizavarunzi ndo lâ. 10 Aŋga pinde nde simboso kala siporo ilonzi ŋuru-ŋuru ilâ pa Maro Kindeni, andeta miki ma kaveta mine ndimo. Maro Kindeni wisi nâna ŋana nenzi mâsi ŋinde kâ, kala io Aŋelo ŋana Izavarunzi Tamâta kâ imâ ipâŋga panzi ku ipunzi pâta sipamateteu lâ.

11 Ambo kinda ma kalonda ŋgere ŋana mâsi rârâni ŋinde muŋga ipâŋga pa kinzi, ande ŋinde ma igagati kinda ŋana taŋgeŋge ŋana nenzi vetâŋa potomule kâ. Nanayoni tamâta pinde siŋgere tapâriŋa ŋinde lâ pepa tini ŋana ipanana kinda tamâta kala tamo lâ zo ŋine. Mao nâ, tâno ŋine ne zo ŋana marumbu kâ nde imâ ipâŋga pa kinda lâ. 12 Mine nde noko kalo-tawana tamâta ea ilo patea tu noko uru kumandi kaika nâ, ande kupakatona sondo ŋga. Tia ma noko patano kundue. 13 Mao nâ, samâŋa kie-kie nde imâ ipâŋga pami lâ, andeta samâŋa ŋinde ŋandai kelekele wasaseki ŋga. Ŋinde nde kie taituni itogo samâŋa uru ipâŋga panzi tamâta rârâni. Miki kaloŋo ŋga; Maro Kindeni uru iveta ikura ne ŋgua pâŋa rârâni, aku isama miki rârâni taitu-taitu nemi walo kilala pwataki. Mine nde aporo ŋgua pami mine; ambo noko ne walo ŋandai ipakura kuku samâŋa toŋge ŋga, ande Maro Kindeni ma isâu pa samâŋa ŋinde tu imâ ipâŋga pano, ande tia. Aku lâ zo ndia samâŋa ipâŋga pano, ande i ma itula nzâla pano ŋana kupole samâŋa ŋinde. Ambo noko ma pwoka nzâla ŋinde, ande samâŋa toŋge ma ikura tu ipoleno, ande tia.

Kinda ma taka simbi lâ maro laŋeŋa nenzi luma sapâŋa ilo ndimo

14 Mine nde niŋgu-nambwe wukale, miki ma kapu mulimi ndo pa mâsi ŋana kawâŋgi kapaneanzi maro laŋeŋa. 15 Miki nemi ilo-kalo nde ikeno pami lâ. Mine nde naŋa aporo ŋgua kaŋa mine pami, ŋana miki warakami ma kalomi ŋgere sondo ŋana ŋine kâ.

16 Lâ zo ŋana kinda taka Maro Ŋalae ne kâŋa-nuŋa kâ, ande kinda uru takai kâmba, kawânda ndaŋge pa Maro Kindeni, ku tanu. Ŋineŋga takai puroŋa, tapwataki, ku taka. Aku mâsi ŋinde itula pwataki tu kinda tamo seenda taitu kuku Kirisi, ina muŋga ipaliŋi see ku ipatarâwa tamwata ŋana ivila kinda kâ. 17 Kinda kambwaŋenda ŋalae, andeta kinda uru tapwataki puroŋa taitu nâ, ŋineŋga rârâni taka pinde pinde. Mine nde kinda rârâni tapasipa lâ taitu ku tapâŋga togo see ŋgu taitu mine.

18 Miki kalomi ŋgere sondo ŋana Isrel ŋgu nenzi mâsi kâ. Lâ zo ŋana sika simbi ŋinde muŋga simomo lâ Maro Kindeni ne patarawâŋa nia kulu, ande kinzi sipasipa warakanzi lâ taitu kuku i. 19 Taitu naŋa ŋandai aporo tu patarawâŋa ŋinde kinzi tinikoa siveta panzi maro laŋeŋa nde kelekele mao ŋga. Aku naŋa ŋandai aporo tu kinzi maro laŋeŋa nde maro mao ŋga. Tia ndo. 20 Naŋa aporo mine; kelekele ndia kinzi tinikoa uru sipatarâwa, ande ŋinde sipatarâwa panzi koroani saka nâ. Kinzi ŋandai sipatarâwa ŋinde pa Maro Kindeni ŋga. Aku naŋa tiniŋgu pwâka tu miki ma kapasipa lâ taitu kunzi koroani saka. 21 Miki ma kanu lââ ikeno Maro Ŋalae ne kâmba ilo, ŋineŋga kalâ kanu lââ ikeno koroani saka nenzi kâmba ilo tona, mine ndimo. Aku miki ma kasaŋona kaka kâpwa ikeno Maro Ŋalae ne peke kulu, ŋineŋga kalâ kaka kâpwa ikeno koroani saka nenzi peke kulu tona, mine ndimo. 22 Tiambo kinda ilonda tu taveta Maro Ŋalae ipadâda, a? Tiambo nenda walo nde ŋalae tina kala ipole i ne walo, a?

Kinda ma takura tu taka simbi rârâni tako lâ nââ nia

Rom 14:1-23

23 Tamâta pinde uru siporo tu, “Kinda takura tu taveta vetâŋa ndia rârâni ilonda tu taveta.” Ŋgua ŋinde nde mao nâ, ambo taitu vetâŋa pinde ŋandai sivila kinda tu tamo ara ŋga. “Kinda takura tu taveta vetâŋa ndia rârâni ilonda tu taveta”, ambo taitu vetâŋa pinde ŋandai sisuka nenda kalo-tawana ŋga. 24 Kinda ma ilonda tu tapavila warakânda nâ ndimo. Ara ŋana kinda ma ilonda tu tavilanzi tininda pinde tona.

25 Miki kakura tu kaka simbi rârâni uru sipako lâ nââ nia. Miki ma ilomi rârâ ku kakasoŋanzi ŋana simbi ŋinde kâ ndimo. 26 Ŋana tu Maro Kindeni kawa ŋgua ikeno lâ pepa tini mine tu, “Tâno ndoni nde Maro Ŋalae nâ ne, aku kelekele rârâni ikeno tâno kulu ande i ne tona.”

27 Aku mine nâ, ambo tamâta toŋge kalo tawana Kirisi tia, andeta ino pano tu kulâ kuka kuku, ambo noko ilo tu kulâ kuku, ande ŋinde nde ara. Noko pwura tu kuka kâpwa ndia rârâni ilano ŋinde, aku noko ma ilo rârâ ku pwasoŋa i tu ikai kâpwa ŋinde lâ nia ndia, mine ndimo. 28 Andeta kuloŋo ŋga; ambo tamâta toŋge ipaino tu, “Simbi ŋine nde muŋga sipatarâwa pa maro toŋge”, ande noko ma kuveta kie ara pa tamâta ŋinde, aku kupile simbi ikeno. Tia ma kuyaula i ne ilo-kalo, kala i ma ilo rua-rua ŋana noko ne vetâŋa kâ. 29 Naŋa aporo tu noko ne vetâŋa ŋinde ma iyaula tamâta ŋinde ne ilo-kalo, kala i ma ilo rua-rua. Naŋa ŋandai aporo tu noko ne vetâŋa ŋinde ma iyaula noko tamwata ne ilo-kalo ŋga, ŋana tu kinda takura tu taka kâpwa kie-kie rârâni. Ambo tamâta toŋge ilo rua-rua ŋana kâpwa toŋge, kala miki katu kandi kaika pa naŋa tu ma aka tia kâ, ande naŋa ma andeka ŋana ŋinde kâ, ande tia. 30 Ŋana tu naŋa uru kawâŋgu ndaŋge pa Maro Kindeni muŋga lâ, ŋineŋga aka. Mine nde ŋana sâ kâ ŋga miki katu kalelea naŋa ŋana aka kâpwa ŋinde muŋga kawâŋgu ndaŋge ŋana, a?

31 Mine nde kaloŋo ŋga; ambo miki katu kanu lââ toŋge tâku kaka kâpwa toŋge tâku kaveta vetâŋa toŋge tâku, ande miki ma kalomi ŋgere sondo muŋga lâ ŋga, ŋineŋga kaveta vetâŋa ndia ma igagatinzi tinimi pinde tu sipanea Maro Kindeni sisuka i ŋa kâki. 32 Ambo nemi vetâŋa toŋge ma iyaula Juda tamâta toŋge ne kalo-tawana tâku tamâta toŋge lâ tinikoa ŋgu ne kalo-tawana tâku Maro Kindeni ne tamâta toŋge ne kalo-tawana tâku, ande miki ma kapu mulimi pa vetâŋa mine rârâni. 33 Ara ŋana miki ma kapono muli pa warakâŋgu neŋgu vetâŋa, ŋana tu naŋa atogo tu aveta tamâta rârâni ilonzi ara pa naŋa. Ŋana duvi ŋinde kâ naŋa ŋandai aveta vetâŋa pinde ŋana apavila warakâŋgu ŋga. Aveta vetâŋa rârâni ŋana avilanzi tiniŋgu pinde, ŋana Maro Kindeni ma ikainzi piti lâ kondoma ilo.

Copyright information for `XSI