Ephesians 4

Kinda kalo-tawana tamâta tamo tatogo Kirisi kie-mbalau mine

Mine kala miki kaloŋo sondo ŋga. Naŋa uru aveta wurâta pa Maro Ŋalae, aku ŋana duvi ŋine kâ naŋa amo luma sakamao ilo. Mine kala naŋa atu apaŋo ilomi kalomi, ŋana miki ma kapaveta kuku vetâŋa arara nâ, ikura Maro Kindeni ipatea pami lâ zo ŋinde isarâwa pami tu kao nemi kalo-tawana ilâ papa i.

Ikura zo zo miki taitu-taitu ma kapatawa warakami tinimi, aku kamo mwasa nâ kunzi nimi-nambwe kalo-tawana tamâta. Miki ma wisimi nâna walele panzi ŋana vetâŋa soki siveta pami, mine ndimo. Miki ilomi ndo ikeno panzi; mine nde miki ma kazavaru nenzi vetâŋa soki ŋinde piti lâ. Koroani Sapâŋa ikura tu ivetami kamo ilomi kalomi taitu nâ. I ne wisi-pisi nde imo kumi, aku wisi-pisi ŋinde itogo wâlo ŋana ipa miki kamo ŋgu taitu. Mine nde ara ŋana miki ma kaveta wurâta kaika ŋana kamo ilomi kalomi taitu mine.

Kinda kalo-tawana tamâta tamo see ŋgu taitu nâ, aku Koroani Sapâŋa taitu nâ imo. Aku mine nâ, Maro Kindeni ilo tu miki ma kamâ taitu ku kao tinimi pa i tu ma iveta kie ara pami, ikura muŋga itula pwataki mine, lâ zo ŋinde isarâwa pami tu kalomi tawana i. Maro Ŋalae taitu nâ imo, aŋga kalo-tawana taitu nâ ikeno, aŋga lââ-liliŋa taitu nâ ikeno. Aku Maro Kindeni taitu nâ imo, ina kinda tamâta rârâni Tamânda. Ikai maro pa kinda rârâni wa, imo isala kinda rârâni wa, imo kinda rârâni ilonda wa.

Taitu Maro Kindeni io ne wisi-wisi ŋalae ŋinde imâ pa kinda taitu-taitu ŋana taveta wurâta pinde, ikura Kirisi iwae pa kinda mine. Ŋana duvi ŋinde kâ, Maro Kindeni kawa ŋgua ikeno lâ pepa tini mine tu,

“‘Ikâki ilâ imo âta ndo, aku lâ zo ŋinde ikainzi ne kazâŋa tamâta soka muli silâ, kinzi ŋinde muŋga ipolenzi lâ paraŋa ilo ku wâlo nâ ipanzi kaika lâ. Andeta iwae wisi-ara panzi ne tamâta.”
(Ŋgua ikeno mine tu, “Ikâki ilâ imo âta ndo”, aku ŋine itula pwataki tu Kirisi muŋga indue ilâ tâno ilo pa lâmbu ndo. 10 Mine kala kinda tasama tu Kirisi muŋga indue imâ, aku muli inani kala ikâki ilâ kilo. Ikâki ilâ imo nia maa ikeno âta ŋinde kulu. Mine kala ikura ŋana imo nia ndoni.) 11 Aku inani muŋga ipatea wurâta panzi ne tamâta. Ipateanzi tamâta pinde ŋana ma simo i ne pâri-tamâta, aŋga ipateanzi tamâta pinde ŋana ma simo ŋgua-tulâŋa tamâta. Ipateanzi tamâta pinde ŋana soka silâ lawea lawea situla pâri ara, aŋga ipateanzi tamâta pinde ŋana sikai poe panzi i ne kalo-tawana tamâta ŋgu wa sipanananzi wa. 12 Kirisi ne vetâŋa ŋinde ne duvi nde mine; i ilo tu Maro Kindeni ne tamâta rârâni ma sikura tu siveta wurâta sondo papa i, ŋana i ne ŋgu ŋinde nenzi kalo-tawana ma ikeno kaika nâ. 13 Kinda ma taveta wurâta mine lee, ikura lâ zo muli ŋinde kinda ma naonda rege nâ tao nenda kalo-tawana ilâ mao nâ papa i. Lâ zo ŋinde, kinda ma tasama Maro Kindeni Natu kilala sondo. Ŋineŋga kinda ma tamo tatogonzi tamâta sondo, aku Kirisi kilala ma ipipi ndo lâ ilonda kalonda.

14 Lâ zo ŋinde, kinda ma tamo tatogonzi lâlu puro-puro kilo, ande tia. Mine kala kinzi laŋeŋa tamwatanzi ma sikura tu siveta ŋgua kaŋa mona-mona ku silaŋe kinda kilo, ande ma tia. Kinzi uru siporo ŋgua laŋeŋa ku siyaula tamâta pinde nenzi kalo-tawana. Taitu lâ zo muli ŋinde, ande ŋgua kaŋa mine ma ikura tu itiŋgi kinda talâ wa tamâ wa, itogo lawea itiŋgi wâŋga isakoko potomule mine, ande ma tia. 15 Andeta ara ŋana kinda ma taporo ŋgua mao nâ, ŋana tu ŋine ma itula pwataki tu kinda tininda mwasa nâ panzi tamâta. Ambo kinda ma taveta mine, ande kinda ma tatumbu lee ku muli ŋga ma tapaipa ndo kuku Kirisi, ina kala imo kulu-kâmba panzi kalo-tawana tamâta ŋgu. 16 Kinda tamo Kirisi ne tamâta, aku tamo tatogo i kie-mbalau mwasina. Kinda karaenda ne tini pinde-pinde rârâni nde sipaseŋge lâ taitu, aku tukânda rârâni nde sisuka karaenda tu imandi kaika. Aku mine nâ, Kirisi imo kulu-kâmba pa i ne ŋgu kinda, aku iseŋge kinda rârâni tamo taitu. Mine kala miki kaloŋo ŋga; ambo kinda rârâni taitu-taitu ma tininda mwasa nâ panzi kalo-tawana tamâta wa kasukanzi wa taveta wurâta ikura Kirisi ipatea pa kinda wa, ande nenda kalo-tawana ma ikeno kaika ndo.

Kinda kalo-tawana tamâta ma taveta vetâŋa wasaseki

17 Mine kala naŋa atu aporo ŋgua toŋge pami. Naŋa akai Maro Ŋalae kawa ku aporo kaika mine tu miki ma kapaveta kuku kinzi tinikoa nenzi vetâŋa kilo ndimo. Kinzi nenzi ilo-kalo nde kelekele kaa nâ. 18 Kinzi ilonzi kalonzi nde pasâsâe ndo lâ, aku ŋine itogo kinzi simo lâ kondoma ilo. Kinzi ilonzi kalonzi tia ndo, aku tininzi pwâka tu sikai ilo-kalo ara kâ. Mine kala kinzi simo piti ndo ŋana via mao ŋinde Maro Kindeni ilo tu ilanzi tamâta rârâni. 19 Kinzi mainzi ŋana vetâŋa uru siveta ŋinde, ande tia ndo. Kinzi sipatambira warakanzi silâ ŋana siveta vetâŋa sakamao nâ, aku ilonzi nde igagatinzi ndo ŋana sipalulua warakanzi tininzi potomule nâ.

20 Naŋa asama tu miki kaloŋo Kirisi parina marumbu lâ. Miki kapono muli papa i lâ, aku kapanâna sondo ndo ŋana Yesu ne ŋgua mao kâ. Aku naŋa asama tu kinzi kalo-tawana tamâta ŋandai sipananami ŋana kapaveta kuku tinikoa nenzi vetâŋa sakamao ŋinde ŋga. 22 Kinzi sipananami ŋana kapu mulimi pa ilo-kalo siŋga ne vetâŋa. Ilo-kalo ŋinde nde uru ilaŋenzi tamâta, aku iveta ilonzi kâki ŋana siveta vetâŋa sakamao kâ, kala sipayaula. Mine nde kinzi kalo-tawana tamâta sipananami ŋana kapile ilo-kalo siŋga ŋinde, 23 aku kasâu pa Maro Kindeni tu iveta ilomi kalomi ipâŋga wasaseki ndo. 24 Aku sipananami ŋana kapono muli pa ilo-kalo wasaseki, ilo-kalo ndainani Maro Kindeni iveta ipâŋga itogo i tamwata kilala mine. Ambo tamâta toŋge ma ipono muli pa ilo-kalo ara ŋinde, ande tamâta rârâni ma simora pwataki tu ikai via mao marumbu lâ, ŋana tu i ma iveta vetâŋa rârâni sondo ku ara ndo lâ Maro Kindeni nao.

25 Mine kala naŋa aporo kaika tu miki ma kapile nemi mâsi ŋana kaporo ŋgua laŋeŋa kâ, aku miki rârâni ma kaporo ŋgua mao nâ panzi nimi-nambwe kalo-tawana tamâta, ŋana tu kinda rârâni tamo see ŋgu taitu. 26 Ambo noko wisi nâna, ande kupakatona sondo ŋga. Tia ma kuveta kiesaka. Ambo noko wisi nâna lee kari indue mbo, ande ŋinde ara tia ndo. 27 Ambo noko wisi nâna ikura zo luandondo, ande ŋine itogo noko pwai nzâla piti pa Sadana ŋana ma imâ ilaŋeno ŋana kuveta kiesaka kâ. 28 Aŋga miki panaweŋa tamwatami, miki ma kapanâwe kilo ndimo. Ara ŋana miki ma kaveta wurâta mao lâ warakami mbaumi. Ambo miki ma kaveta mine, ande miki ma kagona mbumbu pinde, ŋineŋga ma kakura ŋana kasukanzi sugorai tamâta.

29 Miki ma kawami kaporo ŋgua soki kie-kie ndimo. Ŋgua ara nâ ma ipâŋga lâ kawami, ikura ŋana isukanzi tamâta ea siloŋo nemi ŋgua ŋinde. Ambo miki ma kaporo ŋgua ara, ande ŋinde ma ivilanzi tinimi pinde. 30 Ambo miki ma kaporo ŋgua soki panzi tamâta, ande ŋinde ma iveta Koroani Sapâŋa ilo malia. Aku ŋinde ma ara tia ndo, ŋana tu Maro Kindeni muŋgani io Koroani Sapâŋa imâ pami itogo i kilala mine, aku i uru itula pwataki tu miki kamo Maro Kindeni ne tamâta sondo. Mine nde miki kasama tu muli ŋga Maro Kindeni ma ikaimi kataulo kamâ kamo ara ndo kuku i. 31 Miki ma kapile vetâŋa sakamao kie-kie mine; mâsi ŋana ilomi makisa kâ, aŋga mâsi ŋana wisimi nâna kâ, aŋga mâsi ŋana kapawa ŋgua kâ, aŋga mâsi ŋana kaporo ŋgua pavaligiŋa kâ. Miki ma kapaveta kuku vetâŋa potomule ndimo. 32 Ara ŋana miki ma kalomi sukâŋa mao nâ panzi nimi-nambwe kalo-tawana tamâta, aku kaveta kemi ara nâ panzi. Ambo noko ninambwe toŋge iveta soki pano, ande noko ma kuzavaru vetâŋa soki ŋinde piti lâ. Miki kalomi ŋgere sondo ŋga; miki kalomi tawana Kirisi lâ, aku ŋana nemi kalo-tawana ŋinde kâ Maro Kindeni muŋgani izavaru warakami nemi kiesaka piti mine nâ.

Copyright information for `XSI