Matthew 14

Yoane Lââ-Liliŋa Tamwata imâte lâ

Malaka 6:14-29, Luka 9:7-9

Pa zo ŋinde, Koipu Ŋalae Herot ikai koipu panzi tamâta simo tâno ŋinde. Aku Herot iloŋo Yesu parina. Mine kala ipainzi ne wurâta tamâta tu, “Opopo, Yoane Lââ-Liliŋa Tamwata imandi sânda lâ mateŋa nianzi imo via kilo tâ, kala ikai walo ikura ŋana iveta mâsi kaika ŋinde.”

Herot ne ŋgua ŋine nde duvi mine: muŋga, i tai Pilip ikai taine toŋge, i ŋa tu Herodias, andeta muli ŋga Herot ikai taine ŋinde saŋe Pilip, aku rua sipakâe. Mine kala Yoane Lââ-Liliŋa Tamwata uru ilelea Herot mine tu, “Ŋana sâ kâ ŋga noko pwai taine ŋinde, a? Mâsi mine nde ara tia ndo!” Herot wisi nâna ŋana Yoane ne ŋgua ŋine, kala isupwanzi ne zugu tamâta sikai Yoane kaika ku sipa lâ wâlo kaika sio lâ luma sakamao ilo. Herot nde ilo tu ma ipu Yoane pâta imâte, andeta iruru ŋananzi Juda tamâta, ŋana tu kinzi kalonzi tawana tu Yoane nde ŋgua-tulâŋa tamâta.

Simo lee ku zo toŋge, ŋineŋga tamâta pinde silâ kuku Herot ŋana sindeka ku sika kâŋa-nuŋa ŋalae ŋana i ne zo muŋga tina ipagugua i kâ. Aku lâ zo ŋinde, i kaiwa Herodias natu taine ikina kiniŋa panzi tamâta ŋinde. Aku Herot ilo yosi pa taine taipa ŋinde. Mine kala Herot iveta ne ŋgua pâŋa kaika papa taine ŋinde mine tu, “Naŋa aporo mao pa âta, sâ kelekele toŋge noko ilo papa ku kuno naŋa, ande ma alano.” Andeta taine taipa ŋinde tina io ŋgua pinde lâ natu kawa, kala taine taipa ipai Herot tu, “Noko ma kuo Yoane Lââ-Liliŋa Tamwata kulu kâmba lâ kondo toŋge ilo, aku ŋine nâ kutula pa naŋa.”

Taine iporo ŋgua ŋine lâ, aku Herot ilo malia ndo. Andeta i ilo ŋana ne ŋgua pâŋa muŋga iveta lâ tamâta sisaŋona sika kâpwa kuku i ŋinde naonzi. Mine kala isupwanzi ne sambara tu siveta ikura taine ne ŋgua ŋinde. 10 Kinzi sambara ŋinde silâ luma sakamao ilo, aku sitoto Yoane ŋandola utu lâ. 11 Ŋineŋga sikai Yoane kulu kâmba sio lâ kondo toŋge ilo, aku sikai silâ situla pa taine taipa ŋinde. Ŋineŋga taine ikai ilâ itula pa tina. 12 Yoane ne pâri-tamâta siloŋo ŋgua tu Yoane ŋga imâte lâ, ŋineŋga simâ sikai i karae silâ sikea. Sikea lâ, ŋineŋga sikai pâri silâ siporo pa Yesu.

Yesu kâpwa ilanzi tamâne 5,000

Malaka 6:30-44, Luka 9:10-17, Yoane 6:1-14

13 Yesu iloŋo ŋgua tu Yoane Lââ-Liliŋa Tamwata nde imâte lâ, ŋineŋga ikainzi ne pâri-tamâta ku sipile lawea ŋinde. Aku soka paveâŋa nâ sikai wâŋga silâ ku sitoa lâ nia bilimu toŋge. Andeta kinzi tamâta ŋgu ŋalae siloŋo pâri tu Yesu ikai wâŋga ilâ pa nia ŋinde. Tia ku sipile nenzi lawea lawea ku soka nzâla silâ pa nia kala Yesu ilâ papa ŋinde. 14 Aŋga Yesu ilâ lee itoa tina tini lâ, ŋineŋga mata ilâ imoranzi tamâta ŋgu ŋalae simuŋga simâ kala simo ŋinde. Aku i kalo sukâŋa ŋalae ŋananzi, kala ivetanzi nenzi pukoŋa tamâta tininzi ara kilo.

15 Simo lee, ku kari indue lala lâ, ŋineŋga Yesu ne pâri-tamâta simâ kuku ku sipai tu, “Wa, kari ŋga indue lala lâ, aku nia ŋgaŋe ŋine tamâta simo tia. Mine nde kuonzi tamâta silâ, aku ma siroto ŋana nia wa lawea ŋana sipako kapwanzi sika.” 16 Andeta Yesu itu lâ kawanzi aku ipainzi tu, “Kinzi ma simo ŋaina nâ; miki warakami nâ kasuanzi.” 17 Ande kinzi siporo taulo tu, “Opopo, maka kapwama puroŋa lima ŋga iŋa rua nâ kala keno pama!” 18 Andeta Yesu ipainzi tu, “Kakai kâpwa ŋinde kamâ ŋai kalana.”

19 Sikai simâ silua Yesu, ŋineŋga Yesu ipainzi tamâta tu lambunzi ndue sisaŋona unza kulu. Sisaŋona lâ, ŋineŋga Yesu ikai puroŋa lima tava iŋa rua ŋinde kâki. Aku Yesu mata kâki pa samba ku kawa ndaŋge pa Maro Kindeni, ŋineŋga ipwataki puroŋa ilanzi ne pâri-tamâta, aku siwae panzi tamâta. Aku iŋa rua kala siwae panzi tona. 20 Aku kinzi tamâta rârâni sika lee kapwanzi pupuro lâ. Ŋineŋga kinzi pâri-tamâta sigona kâpwa pinde keno mo ŋai yo, kinzi tamâta kapwanzi pupuro kala sika tia, aku ikura ŋgâmo saŋao kanaŋo rua ilonzi pipi lâ. 21 Kinzi tamâne kala sika kâpwa ŋinde kambwaŋenzi nde ikura 5,000 mine. Aku nenzi taine wa lâlu nde sika kunzi tona.

Yesu iyoka lââ bwalika kulu

Malaka 6:45-52, Yoane 6:15-21

22 Sika marumbu lâ, ŋineŋga walele nâ Yesu ipainzi ne pâri-tamâta tu ma sikâki wâŋga kulu ku simuŋga simbwaliu silâ papa lââ bwalika tini pinde. Aŋga i tamwata nde itu ionzi tamâta mbo silâ ŋga. 23 Yesu ionzi tamâta rârâni silâ lâ, ŋineŋga i simbo nâ ikâki tuu toŋge kulu ŋana ikai noŋa kâ. Lala pararai lâ, aku Yesu simbo nâ imo tuu kulu. 24 Aŋga wâŋga nde ilâ lee ipâŋga lââ bwalika ŋgini, ŋineŋga lawea ŋalae imandi aku kâla itiŋgi wâŋga kaika. Mine kala kinzi pâri-tamâta simakâsa ŋalae ŋana sipoe sikundua lawea kâ. 25 Simakâsa sipoe lee, ku mbwale-mbwale kâ, ŋineŋga Yesu iyoka lââ bwalika kulu ilâ panzi. 26 Kinzi matanzi ilâ simora Yesu iyoka lââ bwalika kulu imâ panzi, kala tininzi ruru. Siruru pâta ku siporo tu, “Ŋine nde barâwe ma!”, aku sitara pâta kanaŋo. 27 Andeta walele nâ Yesu ipainzi tu, “Wa, miki tinimi kaika, karuru ndimo! Ŋine nde naŋani warakâŋgu!”

28 Ande Petero itu lâ kawa ku ipai tu, “Maro Ŋalae, ambo ŋine nde nokoni, ande kupai naŋa tu ayoka lââ kulu amâ pano.” 29 Aku Yesu ipai tu, “Kumâ!” Ŋineŋga Petero ipile wâŋga ku iyoka lââ bwalika kulu imâ pa Yesu. 30 Petero imâ lee, ŋineŋga mata indue imora kâla kâki ŋalae, aku iruru. Ŋineŋga imbwatuke tini mwata lâ lââ ilo. Iruru pâta kala isuŋa kawa ino Yesu tu, “Maro Ŋalae, kuvilana!”

31 Aku walele nâ Yesu io mbau ilâ isaŋa Petero, aku ipai tu, “Opopo, noko ne kalo-tawana nde mota mwata. Mana mana ŋga noko ilo rua-rua, a?” 32 Kinzi rua sisoŋga sikâki wâŋga kulu, aku ndainani nâ lawea kautu lâ. 33 Kinzi pâri-tamâta simo wâŋga kulu ŋinde nde matanzi simora mâsi ŋalae ŋinde, aku sipanea Yesu sipai tu, “Mao nâ, Maro Kindeni Natu kala nokoni!”

Yesu ivetanzi pukoŋa tamâta tininzi ara lâ Genesaret lawea

Malaka 6:53-56

34 Ŋineŋga Yesu tavanzi ne pâri-tamâta simbwaliu silâ sitoa Genesaret lawea. 35 Kinzi tamâta papa nia ŋinde sisama Yesu kilala lâ. Mine kala sipasupwa ilâ panzi lawea rârâni ikeno laiti, aku kinzi tamâta lâ lawea ŋinde sikainzi nenzi pukoŋa tamâta rârâni simâ pa Yesu. 36 Kinzi sino Yesu tu, “Noko ma kusâu panzi pukoŋa tamâta ŋine tu sio mbaunzi nâ ilâ sitaŋo noko ne pasawaŋa ŋgaŋe.” Isâu lâ, aku kinzi pukoŋa tamâta ea sitaŋo Yesu ne pasawaŋa ŋgaŋe ŋinde, ande kinzi ŋinde rârâni tininzi ara kilo.

Copyright information for `XSI