Psalms 122

Wâŋgiŋa ŋana sindekana Jerusalem lawea

Daviti isia wâŋgiŋa ŋine

Kinzi sipai naŋa mine tu, “Ayo, toka talâ pa Yova Kindeni ne luma sapâŋa.” Kinzi siporo mine, kala iloŋgu ndeka ndo. O Jerusalem lawea, kala ŋine maka kamâ kapâŋga lâ, aku kamandi noko ne ŋgumbi ilo.

Mao nâ, kinzi siveta Jerusalem ipâŋga lawea kaika ku ara ndo. Yova Kindeni ne tamâta rârâni uru silâ pa lawea ŋine ŋana siporo kawanzi ndaŋge ilâ pa i, ikura muŋga itu tukuŋa panzi Isrel ŋgu tu ma siveta mine. Ikura mbwera mbwera, Isrel ne koipu ŋalae uru imo lawea ŋine, aku isaŋona ŋgua nia ŋana itu tamâta nenzi ŋgua sondo kâ.

Miki naneŋgu ŋgu, ara ŋana miki ma kano pa Yova Kindeni tu ma ivetanzi tamâta simo lawea ŋine tu simo ara nâ. Miki ma kakai noŋa mine, “Kinzi tamâta ea tininzi mwasa pa Jerusalem lawea, ande naŋa iloŋgu tu kinzi ŋinde ma simo ara nâ. Ŋana tu naŋa iloŋgu tu kinzi tamâta ma sisaŋona sondo ndo lâ Jerusalem lawea ne ŋgumbi ilo, ŋana kazâŋa toŋge ma ikura tu isânda kulunzi tia. Aku naŋa iloŋgu tu koipu ŋalae tavanzi tamâta mbâna-mbâna rârâni kala ma sisaŋona sondo mine nâ.” Aku naŋa iloŋgu ŋananzi niŋgu-nambwe wukale wa neŋgu mete kinzi simo Jerusalem lawea tona. Mine nde naŋa ma aporo panzi tamâta ŋinde simo Jerusalem lawea mine tu, “Naŋa iloŋgu tu miki ma kamo ilomi kalomi taitu nâ.” Naŋa iloŋgu tu nenda Maro Yova Kindeni ne luma sapâŋa ma ikeno ara nâ. Mine kala naŋa ma ano pa i tu ma iveta kie ara nâ pa Jerusalem lawea.

Copyright information for `XSI