Psalms 149

Wâŋgiŋa ŋana tandekana Maro Kindeni

Tapanea Yova Kindeni tasuka i ŋa kâki! Lâ zo ŋana miki Yova Kindeni ne tamâta kapasau ŋana kawâŋgi pa i kâ, ande ara ŋana miki ma kawâŋgi wâŋgiŋa wasaseki papa.

Mao nâ, miki Isrel tamâta, miki kalomi ŋgere tava ndekâŋa ŋana Yova Kindeni, inani nanayoni ivetami kapâŋga i ne ŋgu. Miki ŋine kamo Saion lawea, miki kandekana nemi koipu ŋalae! Miki kawâŋgi wâŋgiŋa, aku kaki kapanea i ŋa kasuka kâki! Kara nemi wâŋgu kie-kie, ku kandekana i. Ŋana tu Yova Kindeni uru ilo ara nâ ŋananzi ne tamâta. Aku tamâta ea sipatawa warakanzi tininzi ku simarerea i, ande i ivilanzi tamâta ŋinde ŋana sipole paraŋa kâ.

Ara ŋana Yova Kindeni ne tamâta ma sindeka pâta, ŋana tu kinzi sipole paraŋa lâ. Ikura kari wa mbo wa, ande ara ŋana kinzi ma sindeka ku siwâŋgi wâŋgiŋa papa i. Ara ŋana kinzi ma sisuŋa kawanzi kâki sipanea Maro Kindeni, ŋineŋga sikai nenzi pila ŋana kazâŋa kâ mata ruru ndo ku silâ sipare nia panzi tinikoa ŋgu. Kinzi ma situ ŋana ŋgu ŋinde nenzi vetâŋa soki-soki, ku ma sizavarunzi wa sitawanzi ndue ndo lâ. Kinzi ma sipa wâlo kaika lâ ŋgu ŋinde nenzi koipu ŋalaŋala tininzi wa nenzi katonâŋa tininzi wa. Ŋineŋga kinzi ma sizavarunzi ŋgu ŋinde ndo, ikura Maro Kindeni ne pateâŋa mine. Kinzi Maro Kindeni ne tamâta rârâni ma sipolenzi kazâŋa tamâta mine nâ. Mine nde tapanea Yova Kindeni tasuka i ŋa kâki!

Copyright information for `XSI