Psalms 61

Tamâta ino pa Maro Kindeni tu ma ikatona i

Daviti isia wâŋgiŋa ŋine

Maro Kindeni, kupaloŋo pa naneŋgu sarawâŋa. Kutambira taŋa sondo pa naneŋgu noŋa. Naŋa amo malawae ŋana naneŋgu lawea tina, aku iloŋgu malia ndo. Mine nde naŋa asarâwa pano tu kuvilana. Pwai naŋa alâ pa nia paveâŋa toŋge, ŋana kinzi kazâŋa tamâta ma sikura tu sizavaru naŋa tia. Ŋana tu noko simbo nâ uru pwea ŋanana. Noko simbo nâ kumo naneŋgu maramuŋa kaika. Mine nde naneŋgu kazâŋa tamâta sikura tu sipole naŋa, ande tia.

Naŋa iloŋgu ŋalae tu ma amo noko ne luma ilo ikura zo rârâni. Naŋa iloŋgu tu amo ara lâ noko tini laiti, itogo tatareko natunzi simo ara lâ tinanzi mbani kalo mine. Maro Kindeni, muŋga noko kuloŋo naŋa aveta ŋgua pâŋa pinde kuku noko. Aku vetâŋa arara noko kupambwâre tu ma kuveta panzi tamâta ŋinde uru simege ŋanano, ande noko kuveta vetâŋani ndaina pa naŋa tava.

Kala ŋine naŋa ano pano tu kuseŋge mbwera rârâ ilâ kuku zo ŋinde koipu ŋalae ma imo via lâ tâno kulu. Naŋa iloŋgu tu i ma imo mine ku imo nâ. Maro Kindeni, naŋa iloŋgu tu i ma imo koipu ŋalae lâ noko nao ikura zo rârâni. Noko ne tini-mwasa ikeno mine ku imo nâ, aku noko uru kuveta ikura ne ŋgua pâŋa rârâni. Mine nde ano pano tu pwatona i sondo ndo, ikura noko ne ŋgua pâŋa mine. Ambo noko ma kuveta mine, ande naŋa ma kari kari ao patarawâŋa imâ pano, ikura naneŋgu ŋgua pâŋa mine. Aku naŋa ma awâŋgi apanea noko ŋa ikura zo zo.

Copyright information for `XSI