1 Corinthians 3

Kolinti wewenasi Omaimidana yowanu wela lolo iki minabo.

Wewenanele motakuse, nemoya edimotoka wodanaki, Omaimidana weuna oluhoki minabo wewenasida lo bekaka nobo nesa leko lo libamoe. Edimoya monokauya elewole iki Jisesida oluhola namunakidana iki minayoko, nemoya Omaimidana weuna oluhoki minamabo wewenasida lo bekaka nobo nesa leko lo liboe. Nemoya dukamidana elewole nodenesala maya bamoko aha amidalagoya libobo maya ne. Dukamidana elewole nodenesala maya nena nena iki natane. Ito olotiya elewole nodenesa natabo wewenakidanaya minamae. Edimoya hapa weutipokiya aha minae. Edimoya maloka wewenamuya ma sa-etudawolae liki dukau yowi hilikiki lowa moila hiki hetoka wewenakidana iki hapa weutipokiya aha li-minikaka niae. Edimoya Poloda wewenala minune, ito aposolosida wewenanipole minune liki likaka niabo nenako, yamidana wewenaya monoka elamabo wewena minae loko lolibetakoloe.

Edimoya lemodamuya nenaha iyoko mini maloka maloka ikaka niae. Apolosile Polole lemoya aha yatoka Omaimidana elekele oluhola We napalimo yowanu ga lo limiboto monoka ga wetome oko lo libekaka noiyoko, Jisesikumuya elewole iki elikaka niabo wewena minae. Nemokahoya dukauya le yuha obo maya ne. Apolosikahoya niseko dukauya ohu lilihawa maya asutokaka iboya, Omailimo aya nesa maya le dowa lokaiyoko ihilawa jekaka noiye. Sa-onenako, le yuha okaka noibo wemuya lametune. Ito ohu liliha asutokaka noibo wemuya letudawo nehekala, aya nesahena le lalo okaiyoko ihilawa jekaka noibo wemugoya letune. Le yuha okaka noibo weki ito liliha asutokaka wekiya makoko aweyaha oko minoiye. Sa-ominoinako, meinawaya yowanutelimo letiboto makoko aweyaha oko lekoloiye. Lemoya Omaimidana yowanu wela maya minoiye. Ito edimoya Omaimidana mijala maya minae.

Ito edimoya Omaimidana numudala ebala maya minae.
10 Omailimoya nemodaya yowanu le ohenetaibomuye loko numuda vokaka we laloya mika liyeko le laloko ahodawa heko numuda yawaya hoe. Sakoyoko yalo maya maloka wewenasiya koliki numudaya vikaka niae. Sakiya numuda vikaka wewena maya eli wehe li-miniki vitayo. 11 Nemoya ahodawa heminoboya Jisesi Kalaestida maya aku kilekoko aito le moloko hekaka nesa minamiye. 12 Ito ahodawa mupilaloya we makolimo, ito siluwalotihe meinawa yoweko netibo nesalotihe, ito ya aumelotihe, menihalotihe, ja naladunuya ayamidana nesaloti vetiboya, minoko numuda vibomidana monawa maya 13 onawa napaloya soto pekolaiye. Sakoya soto pitibo onawalo maya jo napa-napa lekolaiye. Ya jolimoya numuda viki yowanu lebomidana monawama loko le soto molakolaiye. 14 Wewena makomidana yowanulalo jo lametibo wewena maya meinawa lalo nesa lekolaiye. 15 Ito wewena makomidana numudala jolimo letiboya aya wewenamidana esewa voetoko ilime maloka molatiboya, meinawa lametibo ne.

16 Edimoya Omaimidana monoka numudala maya minae. Ito Omaimidana weuna oluholimoya dukau minokaka noibo maya elamahe. 17 Wewena makolita Omaimidana monoka numudala maya le lahelamibo lolo etadawoya, Omailimo asako emodaya ilime lahelamibo lolo etibo ne. Omaimidana monoka numudala maya eto oko ne, ito Omaimidana monoka numudalaya edimoya minae. 18 Edimoya dukatipomidana okepa jamilo. Edimokuti wewena makolimo eleko ele wehe lokaka nobo we minoe loko letibo maya aya ga maya ele hulikoko muki wewenasida domudaloya nei weya minokoko Omaimidana omudaloya ele wehe lokaka we minakolaiye. 19 Mikauka ga maya wehe lone liki litabo gamuya Omailimo elitiboya wehe lamekolaiye. Aya nesamuya ga mako Omaimuya sa-liki luhuwa ji-minabo ne:

Edimo eli wewesikaka niabo wewenasiya ele wehe lominune liki saina-painahena lolo niaboya elehuya vobetokaiyoko nenako, wiki epauya hilikaka niae.
20 Ito ga mako sa-loko ne:

We napalimoya ele wehe lominune liki likaka niabo wewenasi data nikebo gaya aha nesa lolo okaka noiye loko elene.
21 Sa-oneyoko, yamuya edimoya wewenasida dupa maya liki yowamilo. Muki nesahenaya edimokumuye loko mololibetokaiyoko neyo. 22 Lemo Polole Apolosile ito Pitaleya edimokumuye loko ujapa weya huloletokaiyoko minuniyo. Ma mikauka muki aha omuda leko minokaka nesahe, ito helekaka nesahe, oloti nebo nesahe, ito alika soto pitibo nesahena mukiya edimo nesatipogo lolo iye. 23 Edimoya Kalaestida oluhola maya minae. Ito Kalaestiya Omaimidana oluhola maya ne.

  • 2 Hib 5:12-134 1 Kol 1:126 Apo 18:4-11; Apo 18:24-28
  • 16 1 Kol 6:19; 2 Kol 6:1619 Job 5:1320 Sam 94:11
Copyright information for `YBY