2 Corinthians 6

Omai le wati wati noibo weya lemo aha ula moloko sa-loko lo libekaka noiye. Omaimidana nasahilila libibomuye loko woko aha nesa lolo amideyo. Edimoda nasahili olibetaibomuya Omailimo ga mako sa-loko lone:

Nemokaho dilipe lalo etubo onawalo maya gatipo ele-minobo ne. Ito dilimekaka onawalo maya dilime lalo obo ne.
Eli-minahe. Olotiya onawa laloya ne, ito lilimekaka onawaya asako olotigoya ne. Lemoya asako yowanu lekaka noudawomuya osele ga likatae loko monokautikiya limi jitabo nesa ma lolo amune. Lemoya Omaimidana yowanulalo wewena minudanako, yamidana monawa le soto moloko sako minokaka noune: Miluma eleko asowalaki nesamidana ulau minudanaki abu-nabu oko eha jekaka nesamidana ulau minune. Seida oijoloti jili jili iki nala numuku hulilimikayoko minokaka noudanaki wavu-liki wewenasi li nupa iki kohalelakilaboku minokaka udawo ne. Sakoya miluma yowanu lekaka oko udamoko sino-minudanaki nodenesaya ma le lukau jeko namudanaki minokaka uniyoko, Omaimidana yowanulalo we minudawomidana monawa maya sakoya soto pekaka iye. Lukau ijopa loko elekakamidana minoko muluteuya eha jiyoko minudanaki wewenatele nasahili obetokaka udanaki, Omaimidana weuna oluholaki minoko luka lalogo bekaka noune. Sakoya ga wehe loko wati gago loko Omaimidana abuha-wowola le-minokaka noune. Lihimate minamibo minokaka noudawolimoya ile imisamite lolo okaiyoko ladeuya le-minokaka noune. Sakoya ulite li sawa jikakaku ito liki mumusopa jikakakuya minokaka noune. Ito lepoka likaka ito liwi letiwi ilimikakamidana alauya minoko ito Omaimidana yowanulalo wewena minudawomidana monawa maya sakoya soto pekaka noiye. Suwalo wewenae liki nililitaboya, suwa lamudawo minokaka noune. Sa-likiki monawatemuya ohu nijeboya, Omai makokolimo monawate ele suwone. Sa-okaiyoko, helekolo noudawo maya aha lomuda lekaka noune. Ito kohalelikayoko heludawo maya woko aha nesa lolo amune. 10 Ito miluma eludawo neboya, muluteu wati iyoko minokaka noune. Ito lemo uvaminate minamibo wewenalitaya muki wewenasida dilipe uvaminanipoki wewena lolo okaka noune. Ito lupago minudawo wewenaya lukamidana uvaminala waitoko nebo minokaka noune. 11 Kee, Kolinti wewenase, nukaneya edimotoka napalo libe-minoe. Sa-okoko nepautiya lo golotoko lo noliboe. 12 Nemoya nukadunuya elewole oko dilipe wehe lokaka noe. Ito edimosiya duka nimikaka niaboya lasolasi minokaiye. 13 Edimokumuya oluhonekidana elekoko ga maya lo libekoloyo, elilo. Yatoka nesaya pasiki edimodamu lata elekaka noudawomidana iki dukatipoya moli nemotoka ikadeko minadeyo.

  • 2 Aes 49:85 Apo 16:23

Omaimidana numudala minune.

14 Edimo monoka elamabo wewenasiya magoina oko moloko etudawomae liki lideko maya, edimolikaya lemoki makoko aweyaha oko minune liki dilipi dupaloka moliki koliki minamilo. Eli-minahe. Watimidanaki ito lahelamibomidanakiya nena nena iki kolatabo ne. Ito lamedaki lubukiya nena nena iki kolatabo ne. Ma kolamikilae. 15 Ito Kalaestiki ulalalo we olohakiya nena nena iki duka makokoto netiye. Ito lemo monokalo ele elewole udawo wewenaki ito monoka elamabo wewenakiya nena nena oko ouna jeko minatune. 16 Ito Omaimidana monoka numudala mijekoko emo monoka numudala napaki ito luweha nesamidana nesalakiya nena nena iki kolasaibo ne. Eli-minahe. Omai elewole oko minokaka wemidana monoka numudala maya lemoya minune. Yamuya Omailimo sa-loko lonebo ne:

Nemokahoya dukau minoko edimoki monekoloe. Ito Omainipo lolo okoyoko edimoya wewenanele yuha lolo itae.
17 Yamuya sa-loko lonebo ne:

Monoka elamabolawasidaya hulibitikiki eto iki minalo loko We napatemamo lokaiye. Ito nuwama wokaka nesakidana minabo wewenasida maya dupalo lamilo. Sa-ikadeko nemokaho ujapa olibetoko dilipe lalo olibetatuwe.
18 Sakokoya ahotipo lolo oko minatuwe, ito edimoya oluhone lolo iki minatae. Omai ode amode nesa lolo okaka wemamo sa-loko lonebo ne.
  • 16 1 Kol 3:16; 1 Kol 6:19; Liv 26:12; Iji 37:2717 Aes 52:11
  • 18 2 Sam 7:14; Aes 43:6; Jel 31:9
Copyright information for `YBY