Romans 16

Muki wewenasida dupamu elaibo ga.

Monokau olute Peobekahoya Senikaleya numuto Jisesida wewenala yuha minabotoka monoka yowanu lekaka noibo menama maya luhuwa nesa leko woko edimotoka hetokadeko, monokauya nasahili itatae loko noloe. Omaimidana wewenala yuhasi lideko wehe letibo nesa liki We napamuye liki ilimi wati itae loko noloe. Aya menalimoya nemoki ito maloka wekiya elekele oletoko nebo nenako, yamidana mamidana nesamu eleko letibotoya maya eli mitae loko noloe.

Ito weunako menalako Pilisilako Akuilakosiya, Jisesi Kalaestida yowanulauya nilimi wati ikaka niaiye. Sa-ikaka niaibo nenako, dupamu nelaiyoko noloyo, yaloka wiki li bilo. Aya wego menagosiya nemokumu dupa li latila ikili aibo neyo. Aya wego menagosidaya nemoki ito muki numuto namato Jisesida hetoka wewenala mini-liki wiminaboki muluteu lalo elekaka noune. Ito numudanipouya monokalo nisiki li esa ikaka niabo wewena mukiya dupanipomu nelaiyo, wiki li bilo. Iwete Epenetusikahoya Esiya mika ilikaloka api oko Jisesida wewenala lolo ibo wemitokaya mulune obohane maya neyo, emodamukiya upamu nelaiyo, wiki li milo. Mena mako Melekahoya edimokumuye loko miluma yowanu libo nenako, ya menamuki upamu nelaiyo, wiki li milo. Adilonikasiko ito Juniyako maya lemo Juda wewena minudawokuti minaibo weya nemoki magoina nala numuku minudawo ne. Sa-udawo nenako, edimo dupamu nelaiyo, wiki li bilo. Edimosiya aposolosida luwawanipouya duliki we minaidanaki, nemoya aha minoyoko edimoya omutiki Jisesida unala ipala yuha lolo aiye. Emupiliyatusida monokamuye loko upamu nelaiye. Sa-iboya mulune obohaneya emotokaya neyo, wiki li milo. Jisesida yowanulau nilime wati ibo we Ubaneda ito nukane meminobo we Sitekisikumukiya eleminoyo, wiki li bilo. 10 Apelesida monawalamuya Jisesi Kalaestikaho eliyoko dowa lokaka noibo we nenako, emodamukiya upamu nelaiyoko noloyo, wiki li milo. Alisitobulusida elekele wewenalamukiya dupamu nelaiyo, wiki li bilo. 11 Juda we iwene Helodiyoni ito Nasisida elekele wewenalalekiya monokau minabo maya nenako, dupamu nelaiyo, wiki li bilo. 12 Talipenako ito Tiliposakosiya We napamidanamuye liki yowanu napa likaka niaiye. Ito nuka meminobo we Peyasikahoya We napamidanamuye loko miluma yowanu asako lekaka noibo maya nenako, dupamu nelaiyo, wiki li bilo. 13 Lupaya We napamidana wewenalautiya yoweko nebo we, ito dolakahoya wati oko nemo done lolo ibo nenako, yatoka wewena dupamu nelaiyo, wiki li bilo. 14 Asikilitole ito Palegole ito Helemele ito Patolobale ito Helemasekiyalesida iwenipoleki magoina dupamu nelaiyo, wiki li bilo. 15 Pilologasiko ito menala Juliyako, ito Neleyo ito atola Olipaya ito Jisesida wewenala yuha muki edimotoka magoina minabokiya dupamu nelaiyo, wiki li bilo. 16 Muki yatoka wewenalikaya monokauya wiki dapusa jiki ilitiki minalo. Kalaestida wewenala yuhaya mayalo minabosiya edimo dupamu delokaiyoko noloe.

  • 3 Apo 18:213 Mak 15:21

Ga maya lobetoko suwibo.

17 Iwenelika, dilipe momoga oko noloyo, dilipi opa-napa ikaka niabo wewenamuya ujapa ilo. Edimo dokepa aito aito netiye liki monokau wikaka niabo anu maya hiki li likadanaki, monoka api-napi obetudawo maya pelesa jikaka niabo nenako, sa-itabo wewenasida maya demesa bilo. 18 Yamidana wewenasiya We napate Kalaestida maya elekele itamiki edimo dupamo umu helibo nesamidana elekele itiki wewena ebilisida mulunipou hiki dilipi napa niayoko, wehe liki niahe liki nilaboya, dokepa jikaka niae. 19 Edimoya monoka elikaka niabomidana gawa maya muki numuto namato pou loko wokaiyoko, nemoya edimodamuya eloboya lahelepane adoha nelokaiyoko, elowa nojoe. Sa-noboya, mamidana iki minatae loko noloe: Saina lalomuya eli wehe liki minatayo, lahelametibo nesamuya delamideyo. 20 Omailimo hulumidana aholakahoya hana oko kolo mamideko, Olohamidana di heumawatipouya jeko kohatibo ne. We napate Jisesi Kalaestida nasahilila maya edimotoka minadeyo. 21 Makoko yowanu lekaka noibo we Timoti ito Juda we iwene Lukule ito Jusile ito Sosipatale dupamu delokaiyoko nilae. 22 Nemoya Tetiyusikahoya pepaloya Poloda gala maya luhuwa nojeko We napamidana omudaloya dupamu nelaiyoko loe. 23 Kaiyokahoya nasahili onetokaka noiyoko, nemokiya Omaimidana wewenala yuhakiya numudalauya le esa oko minoko monoka lokaka noune. Aya wekiya asako dupamu elaiyoko liye. Elasitoya kanisolesida ehadalo ujapa okaka noibo we ito iwete Kuatokiya ayamidana ikaka niaiye. 24 We napate Jisesi Kalaestida nasahilila edimotoka minadeyo. Yotokoe.

  • 21 Apo 16:123 Apo 19:29; 1 Kol 1:1424 2 Tim 4:20

Omaimidana epoka loko luhuwa je suwibo.

25 Omaimidana gala maya wehe loko lokoko, Jisesi Kalaestida gala maya le owo jekodanaki lo soto molokaka noe. Jisesida galaki ito Omailimo lo suna ibo gakiya makoko aweyaha oko ne. Emo suna ibo ga maya, hapa yeikala mino-loko woko nebo maya 26 oloti maya Omaimidana epalauti ga likaka wesi li soto molikayoko, muki numuto namato wewenasiya lepiki elitae liki monoka bukuguya luhuwa ji molikae. Omaiya elewole abuhalaki nebo wemamo lo hukonebo galo maya muki numuto namato wewenasiya elewole iki data elikiki Omaimidana eli mitae loko aya ga maya lepeko lo bekaka noune. 27 Dukamidana luhawala maya le etoha okaka wemidana aholada maya epoka letune. Jisesi Kalaestida yowanulamuya Omailimo eimolago ele wehe loko elenebo wemidanagoya epoka lo-loko woko minatune. Yotokoe.

Copyright information for `YBY