1 Thessalonians 3

Kópuni u l꞉êê dîy꞉o Póól ngê Timoti Tesalonika dy꞉ââ ngê

A tîdê mbwó yoo, dini ghi n꞉ii ngê Aténi noo a ya, noo a nuw꞉onuw꞉o nmyo, nmyi l꞉êê dîy꞉o tpyóó ngê y꞉a y꞉a nê pwiyé wo, doo u ntââ ngê a ka pyodo. Dini ghi n꞉ii ngê Timoti a ka a loo, nmye nê dy꞉ââ ngê, a mo Aténi noo a ya. Nmyi lama kîyedê tóó, nmî mbwó Timoti k꞉ii nmî Mî p꞉uu nipi nye dpodo nódó, Yesu Kédisu u kópu dyuu nipi nye tpapê too. Nmye nê dy꞉ââ ngê, kwonê, Yi kêlîmî p꞉uu nyi wêdêwêdê kalê té. Kwonê, Nmî Lémi u maa p꞉uu dononi wunê vyîmî tumo, yi dono knî yi l꞉êê dîy꞉o yi máádi kîdangê kuwo ngmê. A tîdê mbwó yoo, nmyi lama kîyedê tóó, nmî Lémi ngê p꞉uu ndiye pyu knî ye yepê, Pi dono knî y꞉oo adnyi kpakakpaka nmyo. Dini ghi n꞉ii ngê nmyi vy꞉o nmee a kwo, munmyenê, Adnyi kpakakpaka nmyo. Nmyi lama kîyedê tóó, vyîlo yi kópu nmye yidoo pyodopyodo. Yi kópu u l꞉êê dîy꞉o noo a nuw꞉onuw꞉o nmyo, nê, Lónté wunê kêlîmî té. Nê, Apê Setan ngê dpodombiy꞉e da tókó té, nmî Lémi u maa da kuwo ngmê, yi vy꞉o módó nmeen꞉aa dpodo. U ya a nga doo kwo, Nmyi p꞉uu kópu ngmênî ny꞉oo, u l꞉êê dîy꞉o Timoti nmye nê dy꞉ââ ngê.

U kuwó dini ghi ngê Aténi nê kuwo ngê, ala ngwo Kódin anîmo dpodo. Dini ghi n꞉ii ngê Timoti pini dê Sailas y꞉oo al꞉ii mînê pyw꞉ee noo, a gha mb꞉aamb꞉aa ngê pyódu ngópu. Timoti ngê a ka pê, Nmî Lémi ka ntênê kîyedê kêlîmî té, myenté yi nuu ghi dmi numo nódo mye tóó. A ka pê, Kîyedê chââchââ ngi. A ka pê, U yi ṉga ntee a kwo, N꞉uu m꞉uu té, a ka pê, yinté u yi y꞉e myewunê kwo, Nmî m꞉uu. A tîdê mbwó yoo, yi kópu u l꞉êê dîy꞉o a nuw꞉o kîmêd꞉a l꞉âmo. K꞉omo tpile dono vy꞉o anî kwo, ngmênê dini ghi n꞉ii ngê nmyi kêlîmî p꞉uu n꞉aa nuw꞉o yédi, a gha mb꞉aamb꞉aa ngê dpî pyódu. Nmî Lémi ka dnyinté anmyi kêlîmî knomomê, ye anî nuw꞉onuw꞉o nmyo, a ya dono ngê wa pyódu. Nmyi l꞉êê dîy꞉o nmî Yâpwo Chóó Lémi dpodombiy꞉e n꞉aa kwunokwuno ngê, mu kópu u dîy꞉o w꞉aa ndîî a ka a kpo. 10 W꞉êênî mgîdî vy꞉o dpodombiy꞉e n꞉aa ngêpê yédi, u ya a nga a kwo, N꞉uu m꞉uu nmyo. Kópuni knî yi l꞉êê dîy꞉o nmyi kêlîmî doo u ntââ ngê da pyaa dmi, u ya a nga a kwo, Ndîî ngê n꞉uu pyódu té.

11 Nmî Mî Chóó Lémi ka nmo ngêpê nyédi, myenté nmî Lémi Yesu ka myeno ngêpê nyédi, nmî maa y꞉oo wa yé ngmê, nmye u ngwo anmo lee dmi. 12 Nmyi l꞉êê dîy꞉o myeno ngêpê nyédi. U yi nmo a kwo, Nmî Lémi ngê nmyi pi ka vyuwo ndîî ngê a pyódu ngê. Nmyi nuu ghi dmi ntee nmî nódo wunê tóó, yoo yi nuu ghi dmi yinté nmyi nódo myechoo a ya, myenté nmyi nuu ghi dmi numo nódo ntênê dny꞉oo ya. 13 U yi nmo a kwo, Nmî Lémi Yesu ngê a wêdêwêdê kalê nmyine. Wéni n꞉ii ngê wa a diyé, u yoo wa danê té, nmî Mî Chóó Lémi ngîma nipi wamî kaa nmo. U yi nmo a kwo, Yi ngwo dyââpe nmyi p꞉uu daapêdê pyw꞉ee ngê. - 1 Dpodo 17꞉15* - 2-3 Dpodo 16꞉1, 2 Timoti 3꞉12* - 4 Dpodo 14꞉22* - 5 Pilipay 2꞉16* - 6 Dpodo 18꞉5* - 13 Pilipay 1꞉9-10*

Copyright information for `YLE