2 Timothy 3

Yoo dono ngê u ngwo wa pyaa dmi

Timoti a tp꞉ee, ala kópu ḻama choo a ya. Dini ghi n꞉ii ngê kuwókuwó wéni adî dyimêdyimê, yoo dono ngê wa pyaa dmi. Yi ngwo yi chóó yi kópu knî yi p꞉uu adnyi nuw꞉o, nté ndapî yi mb꞉aami ngê wa pyaa dmi, yi chóó yi pi dmi adnyi kmîmî dé, adnyi chaa, yoo yi pi dmi adnyi dyede dé, yi pye mî knî ye daadnyi ng꞉aa, nmî Mî daadnyi kwunokwuno, myedaadnyi chââchââ. Pi ka vyuwo yi lama daadî ya, pi ye daadî ch꞉anêch꞉anê, adnyi pi p꞉uu danê, gheteghete u yoo ngê adnyi ya, numo p꞉uu adnyi l꞉êê, kópuni mb꞉aamb꞉aa dé, daa yi nuu u kópu ngê adnyi ya. Adnyi pi dódó, daa nuw꞉o mbêmê adnyi m꞉ii, adnyi mbodo ndîî mbodo ndîî, yi chóó yi pi dmi adnyi kmîmî dé. Yi chóó yi pono adnyi vyápê, nmî Mî u nuu ghi dnyinté yi nódo adî ya. Yi komo knî y꞉oo nmî Lémi adnyi chaa kîgha, ngmênê u wêdêwêdê yi gha vy꞉o daadî ya. Yinté yéli ye kpeme dpî yey. Yinté pini knî ngmê p꞉o p꞉o dpî lee dmi, pyââ knî ngmê yi pee dpî kaa t꞉oo. Pyópuni yi pee dpî kaa t꞉oo, nuw꞉o yi mênê daa tóó, yi dono yilî yi p꞉uu a nuw꞉o nyédi, dono kópu yilî yi nuu u kópu ngê a pyede. Yi pyópu yoo dye ghi yintómu a ndiye nyédi, ngmênê doo u ntââ ndê kópu dyuu yi lama daawa yââ. Yichip pi miyó, Njanes pini dê Njambîdes, pipi kópu mbêmê mbwudu ngma a chaa ngópu, Mósisi p꞉uu u ngwo ntee dnya a d꞉uu, pi dódó pyu yoo yinté ndê kópu dyuu p꞉uu mye d꞉uu nyédi. Dnyinté a nuw꞉o té, nmî Lémi ka daa kêlîmî té. U yi y꞉e a kwo, Pi yintómu nmî pee nmî kaa té, ngmênê wa dêê dmi, mu kópu u dîy꞉o pi yintómu knî y꞉oo yi l꞉êê ghi dmi wa m꞉uu t꞉oo, awo, Yi mbodo dmi podo dé. Njanes pini dê Njambîdes Mósisi ka mbwudu chapî ngê ntee daa nî knopwo, yi yéli yinté wamye dêê dmi. - 1 1Timoti 4꞉1* - 2 Lóma 1꞉29-31* - 5 Mátiyu 7꞉15,21, Taitas 1꞉16*

Póól ngê Timoti ka u ngwo a vyu, D꞉aa pi dódó pyu, pi dódó pyu ngê kidangê pyódu

10 Ḻama kîyedê tóó, d꞉aa pi dódó pyu ngmê. Dye ghi daadîî ṉgópu noo a dpodo, yoo myenoo a ndiye kîgha dé. Kópuni u l꞉êê dîy꞉o n꞉aa dpodo yédi, ḻama wunê a yaa wo. Ḻama kîyedê tóó, nmî Lémi ka ntênê n꞉aa kêlîmî, yoo yi nuu ghi dmi a nódo mye tóó. Ḻama kîyedê tóó, nmî Lémi p꞉uu dpodo têdê dono yilî noo a vyîmî, u dpodo u wépi dîpî puwâ. 11 Kópuni dono Antiyóka, Yikóniyêm, Lisitîda a nga a pyaa dniye, ḻama kîyedê pyede. K꞉omo tpile yi dono kópu ndîî a nga a pyaa dniye, ngmênê nmî Lémi ngê yi kêlê mêdê dyé noo. 12 Nyââ, n꞉ii ngê u yi adî kwo, Yesu Kédisu u yoo vy꞉o nî ghê, Yesu ntee pini ngê nî pyódu, yi pini p꞉uu yoo adnyi d꞉uu, p꞉uu adnyi dono. 13 Pi dono yoo, pi dódó pyu yoo yi k꞉ii, kópu dono yilî adnyi d꞉uud꞉uu, y꞉ay꞉a wa pwiyé dmi, Setan ngê adî dódó dé, yoo u nkwo adnyi dódó. 14 Timoti a tp꞉ee, yinté pini ngê kidangê pyódu. Kópuni nyinê ndê too, yi kópu knî ye nyi kêlîmî mbê wo, ndê kópu ngê ṉga dny꞉oo ya, mu kópu u dîy꞉o yélini yi k꞉ii nmee a ndiye kîgha ngi, dpîp꞉o dóó nyoo, k꞉omodanê kópu ṉga dpîp꞉o vyu. 15 Ṉuw꞉o mê diyé we, dini ghi n꞉ii ngê tp꞉ee têdê ngê nyoo a ya, nmî Mî u kópu dyuu p꞉uu nyoo a ndiye. Yi kópu dyuu ngê nmî Mî ka maa nmo yinê dpo kêma, Yesu Kédisu ka u ngwo nmo kêlîmî té, u l꞉êê dîy꞉o kóó k꞉oo wa kaa nmo. 16 Yi kópu yintómu nmî Mî u wêdêwêdê mbêmê a d꞉êê tumo. Yi kópu dyuu mbêmê yoo nmo ndiye kîgha too, yélini dnyinté a nuw꞉o nyédi, yi kópu dyuu mbêmê nmo wátiwáti too. Yi kópu dyuu mbêmê yoo yi dyââpe myino pwapî too, maa mb꞉aa p꞉uu nmo kapî too. 17 Pini n꞉ii nmî Mî p꞉uu a dpodo yédi, yi kópu dyuu choo a kpââ, kópu mb꞉aa yilî yintómu, u ntââ yi pini ngê u ngwo adî d꞉uud꞉uu dé. - 11 Dpodo 13꞉50, 14꞉5,19-20* - 12 Njon 15꞉20* - 14 2 Timoti 2꞉2* - 16 2 Pita 1꞉21*

Copyright information for `YLE