Galatians 6

Póól ngê u ngwo yepê, Numo ngêêpî kmêle

A tîdê mbwó yoo, nmyi vy꞉o pini ngmê ngê angmê kn꞉aadi knomomê, yélini nmî Mî u Ghê Dmi pono a vyápê té, yi yéli y꞉oo yi pini moo wáti y꞉e. Gheteghete ngê u kwo nangmê mbwólu, nmyi chóó nmye myedmyina a vyuwo, yinté kópu kîdmyengmê d꞉uu ngmê. Pini n꞉ii ka kópuni dîngîdîngî ngê adî pyodopyodo, dmyinê ngêêpî, Yesu Kédisu u dêêpî kópu u ngwo anmyi chââchââ. Yi kópu ala, nmyi nuu ghi dmi numo nódo dny꞉oo ya. Pini n꞉ii ngê dê vyi knomomê, Nê pi ngmê, ngmênê u pi têdê, yi pini ngê chóóchóó dpî dóó. Nmyi chóó nmyi l꞉êê ghi dmi ntênê dmyinê mumu dé, kn꞉aa yéli yi dono knî yi mbêmê nmyi chóó nmyi pi dmi namê kmîmî dé. N꞉ii u l꞉êê ghi dmi mb꞉aamb꞉aa dé, vyîlo yi pini ngê choo tpapê, Nê pi mb꞉aa. Pi ngmê ngê kîngê vyi, Yoo yi dono ndîî, a dono têdê, Chóó Lémi ngê daawa kpada nê. Kêle, nmyi l꞉êê ghi dmi mb꞉aamb꞉aa ngê dny꞉oo ya, u ngwo daawa kpada nmyo.

N꞉ii knî y꞉oo nmî Lémi u kópu dyuu nmye a tpapê ngópu, dmyinê yeedeyeede dé.

Ntênê dmyinê nuw꞉o. Doo u ntââ Chóó Lémi daanmyi dóó ngmê. Ntini n꞉ii anyi ntówo, vyîlo yi ntini nt꞉u yuu kaalî. Pini n꞉ii nuw꞉o dono u pono a vyápê yédi, nt꞉u dini ghi n꞉ii ngê wa kaalî, Chóó Lémi ngê wa dyênê. Pini n꞉ii nmî Mî u Ghê Dmi u pono a vyápê yédi, nt꞉u dini ghi n꞉ii ngê wa kaalî, ghê kamî wa a pyw꞉oo, ghéni n꞉ii chedê ngê daawa pyódu. Kópu mb꞉aa d꞉uud꞉uu kîdmyengê yé ngmê, doo u ntââ nmo d꞉uudpî diya, mu kópu u dîy꞉o kópu mb꞉aa n꞉ii nmo ntówo too, yi nt꞉u dmi dini ghi n꞉ii ngê wa kaalî, mb꞉aamb꞉aa u ngwo anmo pyw꞉oo. 10 Yi kópu u l꞉êê dîy꞉o yélini yi k꞉ii Yesu ka nmo kêlîmî té, mb꞉aamb꞉aa ngê dmyinê ngêêpî dé, wo yéli myedmyinê ngêêpî dé. Ala pi ngêêpî u dye ghi. - 1 Mátiyu 18꞉15* - 2 Lóma 15꞉1-2* - 4 2 Kódin 13꞉5* - 5 Lóma 14꞉12* - 6 1 Kódin 9꞉11,14* - 8 Njon 3꞉6, 6꞉63, Lóma 8꞉13* - 9 2 Tes 3꞉13, 1 Kódin 15꞉58*

Kuwókuwó kópuni Póól ngê chóó kîlî d꞉êê ngê

11 A tîdê mbwó yoo, a kuwókuwó kópu a chóó d꞉a d꞉êê. A d꞉êê ndîî nga a m꞉uu yó. 12 Yélini knî y꞉oo u yi a kwo, Ala yéli yi too pee p꞉uu Chóó Lémi u l꞉ii nmî t꞉oo, u yi y꞉e a kwo, Nju tpémi ye yoo mb꞉aa ngê u ngwo nmî pyaa dmi. Nmî lama ka tóó, Kópuni Yesu Kédisu ngê u kîdosi ńedê d꞉uu ngê, yi kópu ka kêlîmî mu ngmidi mbêmê nmî Mî kóó k꞉oo anm꞉uu ghê dmi. Yi yéli y꞉oo yi kópu nmye wodnye tpapê, ye Nju tpémi y꞉oo pî kpaka tumo. 13 K꞉omo tpile Chóó Lémi u l꞉ii yi too pee p꞉uu a t꞉a, ngmênê u dêêpî kópu dyuu daa chââchââ tumo. U yi y꞉e a kwo, Chóó Lémi u l꞉ii ala yéli yi p꞉uu nmî t꞉oo, mu kópu u dîy꞉o u yi y꞉e a kwo, Nmî pi dmi ndîî ngê u ngwo paa pyaa we. 14 A chóó a pi dînî kmîmî ngê, ngmênê kópu ndîî mu ngmidi pi knî ye n꞉aa tpapê ngê, kópuni Yesu Kédisu ngê kîdosi ńedê d꞉uu ngê. Yi kópu u l꞉êê dîy꞉o dyámê u kópu dé têdê kópu ngê a ka pyaa dniye, myenté dyámê mbêmê tpémi ye k꞉omo tpile ngê nî pyodo. 15 K꞉omo tpile Chóó Lémi u l꞉ii nmî p꞉uu a t꞉a, ó daa t꞉a, yi kópu daa ndîî kópu, ngmênê Chóó Lémi ngê kamî ngê mê pyódu nmoo, yi kópu yi ndîî kópu. 16 N꞉ii yoo yi nuw꞉o dmi yinté a pyede, Chóó Lémi ka dny꞉oo ch꞉anêch꞉anê, kóó k꞉oo dpî kaa téne, u yoo yintómu knî yi k꞉ii.

17 A kuwókuwó kópu ala. U ya a nga daa kwo, Pi ngmê ngê a kópu dyuu u wépi a pwaa ngê, mu kópu u dîy꞉o Yesu u l꞉êê dîy꞉o kwéli a p꞉uu yilî a t꞉a. Yi kwéli knî yi l꞉êê dîy꞉o nmyi lama choo a ya, Nê Yesu p꞉uu ndêndê ngê a dpodo.

18 A tîdê mbwó yoo, nmî Lémi Yesu Kédisu nmyi ghê dmi knî ye mb꞉aamb꞉aa ngê choo a vyuwo.

Wu u dî. - 12 Nkal 5꞉11, Pilipay 3꞉18* - 14 Luukî 14꞉27, Nkal 2꞉20-21* - 15 2 Kódin 5꞉17* - 17 2 Kódin 4꞉10*

Copyright information for `YLE