1 Corinthians 12

'Ada veuveuta tulina tulina 'Anu'anunu 'Atumaina yana 'anivelena.

Ekwavo, tutuya de'e a na veifufu 'Anu'anunu 'Atumaina yana 'anivelena faifaidi, kebu nuanuaku faifaidi 'wa na bavubavu. 'Akonadi 'wa 'asetai basenadi Iesu kebu 'wa da 'asetaiga yaubada-vekavekali i veveimeyemi. Seitani nuami i 'ewadi bega i vevekaliemi 'wa 'odu'odu yaubada-vekavekali 'waidie, naninidi kebu 'adi fata i na welava. Fai basenadi 'waidie 'wa 'odu'odu wata fai 'Anu'anunu 'Atumaina 'wa bavuyeni, nuanuaku 'Anu'anununina faifaina a na awave'ede'edemi. 'Ai'edi aitoi Iesu i na yagaia 'eba 'isa 'Anu'anunu 'Atumaina kebu i da ageiga wata 'Anu'anununina kebu i da vonavona tomogonina 'wainega. We'e 'ai'edi aitoi i na vo, Iesu mogitana 'aku Toveimea,” 'eba 'isa 'Anu'anunu 'Atumaina i agei, yana 'alavelevelena 'wainega i vonavona.

'Ada nuakalikali tulina tulina 'Anu'anunu 'Atumaina i veutada, siwe nuakalikalinidi 'adi to'anivelena 'aitamogana. Yada folova 'adi 'eda'eda tulina tulina siwe matatabuda ta folofolova 'ada Toveimea 'aitamogana faifaina. Yaubada, toketokena tulina tulina i veleda bega ta folofolova faifaina, siwe matatabuda yada toketokena lamudi 'aitamogana.

'Anu'anunu 'Atumaina taunina i sivemageseni 'ida tovetumaganavo 'aitamogana 'aitamogana 'waideye 'ada veuveuta 'waidiega, bega Keliso yana 'Aila'a ta na ve'ivaivaita. 'Anu'anunu 'Atumaina yana 'anivelena tamu tomogo 'ana veuveuta, ma yana 'aseta Yaubada yana nuanua i na lulu'ivona 'waideye. We'e tamu tomogo 'ana veuveuta 'Anu'anununina 'wainega, 'aseta nani tulina tulina faifaidi i veleni bega 'ana fata i na awave'eda'eda 'waideye. Tamu tomogo 'ana veuveuta yana vetumagana toketokena, we'e tamu tomogo i na 'i'ive'atumai toviga 'waidie, veuveutanidi 'Anu'anununina 'aitamogana yana 'anivelena. 10 Tamu tomogo 'ana veuveuta 'eba nuavogana wata 'eba nua'ewa i 'i'idewadi, tamu tomogo 'ana veuveuta Yaubada yana Vona i na lulu'ivona 'waideye, wata tamu tomogo 'ana veuveuta i veleniga 'ana fata i na venua'ivina 'atumaina tamu tomogo yana lu'ivona faifaina, voke i mai 'Anu'anunu 'Atumaina 'wainega, 'alo taunina yana nuanuayega 'alo yaiaina i agei bega i vona. Tamu tomogo 'ana veuveuta 'Anu'anunu 'Atumaina yana 'alavelevelena 'wainega i vonavona, bonanidi kebu i da 'asetadiga 'waidiega, siwe taunina kebu i da 'asetai ava'ai i vonevoneyeni. Mulieta tamu tomogo 'ana veuveuta bonanidi kebu i da 'asetadiga i na sisiviladi nika Yaubada yana vona 'ana 'aseta i na souyeni 'waideye. 11 Veuveutanidi matatabuna 'adi to'anivelena 'aitamogana, taunina 'Anu'anunu 'Atumaina, 'aisena yana nuanua 'wainega i 'a'anivelena tomotoga 'aitamogana 'aitamogana 'waideye.

  • S7 1 Kol 14:26

'Ida Keliso yana 'Aila'a 'alo Tomogona.

12 Tomogoda 'aitamogana, siwe du'u fuedi. Du'u fuedi siwe i luvetubama tomogo 'aitamogana i souyeni. Wata bani'odi 'ida Keliso 'ana tovetumagana fueda, siwe ta luvetubama bega 'ida Keliso Tomogona i souyeni. 13 Fai Yaubada i bafitaisoda 'Anu'anunu 'Atumaina 'wainega 'ida Keliso yana 'Aila'a 'alo Tomogona 'aitamogana. Avinodi 'ifwaida me Diu, 'ifwaida mali tomotoga, 'ifwaida tofolova-maimaiga, wata 'ifwaida kebu 'ada toveimeaga, siwe Yaubada 'Anu'anunu 'Atumaina i tauyeni, 'Anu'anununina 'aitamogana matatabuda i ageda.

14 Tomogoda kebu du'u 'aitamogana, du'u fuedi. 15 'Ai'edi tamu tomotoga 'agena ma 'awanaga bega i da vona i da vo, Yau kebu nima, begaidi de'e tomogonina yau kebu tamu du'una,” yana vonanina 'wainega kebu i da 'awa'idia. 16 Wata 'ai'edi tomogonina tanigana ma 'awanaga bega i da vona i da vo, Yau kebu mata, begaidi de'e tomogonina yau kebu tamu du'una,” yana vonanina 'wainega kebu i da 'awa'idia. 17 'Ai'edi tomogoda matatabuna mata, ava'aiega ta na nogaya? Wata 'ai'edi tomogoda matatabuna taniga, ava'aiega ta na yaoga? 18 Siwe Yaubada kebu tomogoda bani'odi i da 'idewadi. Tomogoda du'una tulina tulina i yatodi yana nuanua i lubwaineniga bani'odi. 19 'Ai'edi du'u 'aitamogana, ava'ai 'ana 'atumaina? Kebu 'ana fata du'u 'aitamogana 'wainega tomotoga i na souyeni. 20 We'e mogitana, du'u fuedi, i luvetubama bega tomotoga 'aitamogana.

21 'Ai'edi tamu tomotoga matana ma 'awanaga kebu i na vo, 'Omu nima, kebu nuanuaku, nani matatabuna 'akonadi 'aku fata.” Wata 'unu'ununa kebu i na vo, 'Omu 'age, kebu nuanuaku, nani matatabuna 'akonadi 'aku fata.” 22 We'e mogitana, du'udanidi yada nuanua 'waidie ta vo, Mweadi,” siwe yadi folova bwaikidi, 'ai'edi kebu i da 'eno'enoviga 'ako yada mia i da vita. 23 Wata du'udanidi yada nuanua 'waidie ta vo, Nani-'avo'avovo,” siwe ta 'i'isave'avina-dewadi wata du'udanidi kebu nuanuada ta na sivemagesediga, ma yada ve'ililibu ta givegivedi. 24 We'e du'u 'adi 'isa 'atumaidi, 'waideye kebu 'eba bunumayaga, kebu ta da babaniumadiga. Yaubada tauniotogina du'u i luvetubamidi bega du'unidi ta nuani nani-'avo'avovo 'alo 'adi 'isa kebu 'atumaidiga ma 'adi ve'ililibu, ta 'i'isave'avinidi. 25 Fai Yaubada tomogoda i luvetubami bega kebu 'ana fata tamu du'u 'aiseotogina i na mia'eni, we'e mogitana du'u tulina tulina ma ediavo i na ve'ivaivaita. 26 'Ai'edi du'u tamu ilagi i na veluagai, du'u 'ifwaidi taiadi vitanina i vebaedi, wata 'ai'edi du'u tamu 'ana subia i na veluagai, du'u 'ifwaidi taiadi i na sosoana.

27 Yaku vonanina 'ana 'aseta side bani'odi. 'Omi 'aila'animi 'asa'aiana Keliso Tomogona, we'e 'aitamogana 'aitamogana du'una 'omi. 28 Keliso Tomogona 'alo yana 'Aila'a nageneye, Yaubada folova tulina tulina i veutada side bani'odi.

Folovanina i 'edakumetaga tomata'aulelevo,

'Ana veluga, Yaubada yana Vona 'ana tolu'ivonavo,

'Ana vetonu, Yaubada yana nuanua tonovidi 'adi tovevo,

'Ifwaidi i venua'ivinedi bega 'eba nuavogana wata 'eba nua'ewa i na 'i'idewadi,

'Ifwaidi toviga i na 'i'ive'atumaidi,

'Ifwaidi i venua'ivinedi i veto'aivaita ediavo tovetumaganavo 'waidie,

'Ifwaidi i veto'edakumeta Keliso yana 'Aila'a 'waideye,

'Ifwaidi i venua'ivinedi bega 'Anu'anunu 'Atumaina yana 'alavelevelena 'wainega i na vonavona, bonanidi kebu i da 'asetadiga 'waidiega.

Side bani'odi Yaubada yada folova tulina tulina i veutada.
29 Yaubada tomogoda i 'idewadiga kebu taniga'ava 'alo mata'ava, wata bani'odi 'ida Keliso Tomogona yada folova tulina tulina. I veutadaga kebu matatabuda ta da vetomata'aulele, kebu matatabuda ta da vetolu'ivona, wata kebu matatabuda ta da vetove. Kebu 'ana fata matatabuda 'eba nuavogana wata 'eba nua'ewa ta na 'idewadi, kebu 'ana fata matatabuda toviga 'waidie ta na 'i'ive'atumai, kebu 'ana fata matatabuda 'Anu'anunu 'Atumaina yana 'alavelevelena 'wainega ta na vonavona, bonanidi kebu ta da 'asetadiga 'waidiega, wata kebu 'ana fata matatabuda bonanidi ta na siviladi bega 'adi 'aseta mogitana i na souyedi. 31 'Ada veuveuta 'Anu'anunu 'Atumaina 'wainega tulina tulina, siwe i lubwaineda ma yada dumwebika ta na tokemaigeda bega yana 'anivelena kumekumetadi ta na 'ewadi.

Siwe tutuya de'e a na veifufu tamu sauluva 'atumaiotogina faifaina, sauluvanina 'ada veuveutanidi i vebwaika-'iawedi. Sauluvanina 'ana wagava nuakalikali

  • S12 Lom 12:4-5S13 Gal 3:28S27 Lom 12:5S28 Efe 4:11-12
  • S31 1 Kol 14:1
Copyright information for `YML