2 Corinthians 11

Faulo i veifufu tove-vekavekali faifaidi.

Fai tauniku a awa'ai'aiku yaku vona 'ana nogaya 'wa da vo sai'afo a da ve'wava'wava, siwe nuanuaku 'wa na tokemaiga. 'Wa na tokemaigemiga, nuanuaku bwaikina yaku nuanua a na lu'ivona 'waimie. Yaubada i ve'unumagigi faifaimi, nuanuana 'omi 'aiseotogina yana tomotoga, yau wata bani'odi a ve'unumagigi faifaimi. Nuanuaku Keliso 'aiseotogina 'wa na nuakalikalieni, 'wa da vo 'omi tamu vavine ne'e'elina bani'odi, kebu tamu yana sakonaga. A veakutagonimi Keliso 'aiseotogina faifaina, 'omi bani'odi yana vavine 'atumai'avami. Siwe a venuafouviga faifaimi. Basenadiotoga Seitani 'o'olo i agei bega 'aseta-vekavekali 'wainega Ive i vekaliedi i sakona, wata bani'odi 'omi faifaimi a venuafouviga i na nunago tomotoga 'ifwaidi i na vekaliemi Keliso 'wa na baileni. Basenadi ma yami nuakalikali taunimi 'wa tauyemi Keliso 'aiseotogina 'waineye, kebu nuanuaku tamu aitoi nuami i na 'ewai 'wa na damana 'waineye. A venuafouviga fai tove-vekavekali i waiga 'waimie, ma yami sosoana taunimi 'wa tauyemi 'waidie. Basenadi Iesu Valana 'Atumaina 'a lau'age 'waimie, 'wa vetumagana nika 'Anu'anunu 'Atumaina i agemi. Mulieta tove-vekavekalinidi i waia 'waimie tamu Iesu faifaina i lau'age, kumanina 'ima kebu faifaina 'a da lalau'agega. Yadi ve tulina siwe ma yami sosoana 'wa nogai 'wa vetumagana 'waineye wata taunimi 'wa tauyemi tamu 'anu'anunu tulina 'waineye.

Tovenidi igodi yami tomata'aulele bwaikaotogidi, we'e yau a nuani kebu i da vebwaika-'iaweku. Voke yaku vona 'ana nogaya kebu 'eba nua'ewa tovenidi bani'odi, 'wa da vo kebu a da luku sikulu 'waineye, siwe a vonavonaga ma yaku 'aseta. Tutuya matatabuna yaku 'aseta 'a sisivemageseni 'waimie nani tulina tulina faifaidi.

Basenadi a wai Yaubada Valana 'Atumaina a lalau'age 'waimie, kebu tutula faifaina a da nuanua, mani 'alo 'ani'ani 'waimiega a da 'ewa'ewadi. Tauniku a kiaobuyeku ma'itufa 'omi a kialakaimi. Fai kebu a da lukakademi tutula faifaina, 'wa da nuani, a sakona matamie? A folofolovaga 'waimie tovetumagana 'aila'a fuedi i 'i'ivaiseku mani 'wainega, 'wa da vo a da vavainago 'waidiega a na 'ivaisemiga faifaina. Tutuyanina taiadi ta miamia nani 'ifwaidi 'waidiega a ve'ale'usa, siwe kebu tamu vita a da velemiga talavelu'uiega. We'e mogitana edavo i maia Masidoniayega, naninidi 'waidiega a ve'ale'usaga i miedi. Basenadi wata 'awaie kebu tamu sai'afo nuanuaku vita a na velevelemi 'aku 'isave'avina faifaina. 10 Keliso yana nuanua tonovidi i 'eno'enovi 'waikuye begaidi a na vonemi. Tutuyanina Keliso Valana 'Atumaina a lalau'age 'waimie kebu tamu nani nimamiega a da 'ewai. Kebu tamu ava'ai a da 'ewa'ewai 'waimiega, faifaina tutuya fuedi tauniku a awa'ai'aiku yami 'awalawa Gulisi matatabuna nageneye, siwe kebu tamu aitoi 'ana fata i na talabodeku a na 'ailove. 11 Awale a vonavona a vo, Mali tovetumaganavo i 'ivaiseku we'e 'omi kebu?” 'Alo 'omi kebu a da nuakalikaliemiga? Kebu, Yaubada 'aku to'aseta, i 'asetaku a nuakalikaliemi. Wata kebu a da vo, A na vetalavologa bega mani i na veleku.”

12 Tutuya de'e a folofolovamo kebu tutula faifaina a da nuanua, wata 'awaie bani'odi a na folofolovamo bega tomotoganidi igodi yami tomata'aulelevo kebu 'adi fata taunidi i na awa'ai'aidi. Tomotoganidi i lulukakademi mani 'wa veleveledi yadi nuanua i vo, 'Ima Yaubada yana tomata'aulele, Faulo yana folova wata 'ima yama folova i vesala.” Siwe kebu, yau kebu mani faifaina a da nuanua, begaidi kebu i da lubwainedi taunidi i na awa'ai'aidi i na vo, 'Ima 'a vesala Faulo taiadi.”

13 Tomotoganidi kebu tomata'aulele mogitana, tovekali. Yadi folova vekali wata yadi sauluva i vetuli ta na 'isedi ta na vo 'ako, Mogitana Keliso yana tomata'aulelevo.” 14 Kebu nuami i na voganidi 'wa na vekoi fai yadi toveimea Seitani 'ana fata i na vemaigisivilavila 'ana 'isa 'wa da vo anelose mataududulina. 15 Fai Seitani 'ana fata i na vetuli anelose bani'odi, bega kebu nani vitana yana tofolovavo 'waidie, wata 'adi fata i na vetuli 'wa da vo nuanua tonovidi 'adi tofolovavo. 'Eba ve'a'ava 'waineye 'adi tutula i na veluagadi yadi sauluva sakoidi 'adi 'isa'isa bani'odi.

  • S2 Efe 5:26-27S3 Nag 3:4,13S4 Gal 1:8-9S6 Efe 3:3-4S8 Fil 4:15-18S13 Fil 3:2

Vitanidi Faulo i veluagadiga Keliso faifaina i veifufuyedi.

16 Wata yaku vona a na luvaitugani. Kebu i da lubwaineni tamu aitoi yana nuanua i na vo, Faulo taunina i awa'ai'aia, yana vona 'ana nogaya i ve'wava'wava.” 'Ai'edi yami nuanua bani'odi, 'wa na tokemaigemi sai'afo a na awa'ai'aiku 'wa na nogai, bani'odi 'wa totokemaiga tomotoganidi i ve'wava'wavaga 'waidie. 17 Yaku awa'ai'ainina kebu 'Auvea yana nuanua bani'odiga, 'wava'wavadi yadi sauluva a na saladi. 18 Tomotoga fuedi taunidi i awa'ai'aidi 'adi 'aivaita fwayefwayeye faifaina wata yau a na saladi. 19 'Ami 'isa, igodina 'omi to'aseta siwe 'wa tokemaiga tove-vekavekali 'waidie. Tovenidi yadi vona 'ana nogaya i ve'wava'wava siwe ma yami sosoana taunimi 'wa tauyemi 'waidie. 20 'Ai'edi aitoi i na lukakademi yana veimea fuedi 'wa na vevematayakeyakedi, 'alo yami kukua i na elomi, 'asa'aiana 'wa tokemaiga. 'Alo 'ai'edi givagivayega i na vekaliemi nuanuana yana nuanua 'wa na 'i'idewadi, 'alo i na awaobuobuyemi, 'alo maigimi i na tutubodadiga, 'asa'aiana 'wa sosoanamo. 21 Fai 'ima kebu bani'odi 'a da vesauluva sakoina 'waimie, yau 'wa da vo mweaku, igodi a bunumayaga.

'Ai'edi tamu aitoi i na vetoketoke taunina i na awa'ai'aia nani 'ifwaidi faifaidi, yau wata bani'odi 'aku fata tauniku a na awa'ai'aiku naninidi faifaidi. A 'asetai yaku awa'ai'ai 'ana nogaya a ve'wava'wava, siwe wata a na vonemi.
22 'Ai'edi tomotoganidi i na vo, 'Ima me Ibeliu,” yau wata tomogo Ibeliu. 'Ai'edi i na vo, 'Ima wauma Isileli,” yau wata bani'odi. 'Ai'edi i na vo, 'Ima Ebelamo tubunavo,” yau wata bani'odi tamu tubuna. 23 'Ai'edi i na vo, 'Ima Keliso yana tofolova,” we'e yau mogitana yana tofolova. A nuani yaku awa'ai'ainina 'ana nogaya 'wa da vo a da ve'wava'wava, siwe wata a na vonemi. Yaku folova vitadi wata Keliso faifaina vanuga 'eba yogona 'waidie i yatoyatoku 'waidiega tomotoganidi a vetoketoke-'iawedi. Tutuya fuedi Keliso 'ana tovedumwe'ai'ai i toke i nikenikeku, wata tutuya fuedi sai'afoga i da luluvewafaku, we'e tomotoganidi kebu bani'odiga. 24 Fai a folofolova Keliso faifaina, tutuya 5 yaku tomotoga me Diu i toke i fitaliku bulava metametanina 'wainega, tutuya 'aitamogana 'aitamogana 'aku 'ainike matatabuna 39 me Diu yadi sauluva bani'odi. 25 Tutuya 'aitonu me Loma i toke i nikeku fulumaiega, tamu tutuya i lukileuku igodi nuanuadi i na luvewafaku. Tutuya 'aitonu yama waka i tula i tutuwealema, tamu tutuya a kayokayo malaveseye 'aiata wata lovana matatabuna. 26 Tutuya fuedi yaku lauvivila 'waidie ilagi a veveluagadi sai'afoga a da wafawafa weyagata 'waidie. To'ainike 'waidiega, yaku tomotoga me Diu 'waidiega wata mali tomotoga taunidi kebu Diu 'waidiega. Wata bani'odi ilagi a veveluagadi 'atamana bwaikidi 'waidie, wala'aie, malaveseye wata tovetumagana-vekavekali 'waidiega. 27 Tutuya fuedi a toke a folofolova, lovana fuedi kebu a da 'enodewa, a laselase wata 'anigoku i lalala, tutuya fuedi a veve'ale'usa 'ani'ani wata kaleko 'waidiega, wata a vevekaukau. 28 Vita fuedi a veluagadi, 'ifwaidi a 'inanadi, 'ifwaidi kebu, vitanidi 'waidiega yami tove-vekavekali a vetoketoke-'iawedi. Siwe wata tamu vita bwaikina a vevebaeku tovetumaganavo faifaimi 'awalawa tulina tulina 'waidie, 'aiata 'aitamogana 'aitamogana a vevenuafouviga faifaimi voke yami vetumagana Keliso 'waineye fa'alina 'alo kebu. 29 'Ai'edi tamu aitoi yana vetumagana i na mwea, 'aku vebae 'wainega a na lutonovi. 'Ai'edi tamu aitoi sakona nuana i na 'ewai i na be'uga, yau a na venuafouviga faifaina.

30 'Ai'edi aitoi i na vo, I lubwaineni Faulo taunina i na awa'ai'aia nika tomotoga i na 'asetai taunina tomogo toketokena.” Siwe kebu nuanuaku, nuanuaku 'aku vitanidi wata naninidi 'waidiega tomotoga 'adi fata i na 'asetakuga yau tomogo mweaku, 'aisedi faifaidi a na vonavona. 31 Yaubada 'aku to'aseta, i 'asetaku kebu a da vevekali. Taunina 'ada Toveimea Iesu Tamana wata yana Yaubada, i lubwaineda tutuya fuedi ta na subisubiai, kebu i na 'a'avaga, i na 'eno-vagata. 32 Yau tomogo mweaku, a na veifufuyeni nika 'wa na 'asetai. Basenadi Kini Aletasi tamu gabemani bwaikina i venua'ivineni 'atamana Damasiko i 'isave'avini. 'Atamananina matatabuna kalikalina, kalinina i toke i didigi i laka. Bei a miamia toveimeanina nuanuana i na 'ive'aviniku bega tolugaviavo i vonedi 'awa i tovibodadi. 33 Siwe lovane ekwavo i naweku walisaveye a luku, tutubwekaneamo i ve'ioyoku a obu a dega.

  • S22 Fil 3:5S23 Fol 16:23S24 VeL 25:3S25 Fol 16:22, 14:19
  • S26 Fol 9:23, 14:5S32 Fol 9:23-25
Copyright information for `YML