John 18

Iesu 'ana 'ive'avina.

Iesu yana velu'ui i 'a'ava, mulieta yana tovetutuyamavo taiadi Ielusalema i 'iaweni i nagoi i obu Ufa Kidiloni i damani no'o bega i laka. Bei welavi fuedi i tabo, nagedie i luku. Iudasa, taunina Iesu 'ana to'etogiluva, 'awalawanina i 'asetai fai tutuya fuedi Iesu ma yana tovetutuyamavo bei i nunagoi. Mulieta Iudasa 'ifwaidi tolugaviavo taiadi i maia 'awalawanina 'waineye. Tolugavianidi 'ifwaidi vanuga 'eba velu'ui 'ana to'isave'avinavo, i maia tovelomu 'adi to'edakumetavo wata Falisi 'waidiega, siwe ma yadi 'ibadi wata kefata i laudukala i maia. Iesu 'akonadi i 'asetai ava'ai sai'afoga i na souyedi 'waineye begaidi tutuyanina Iudasa tolugaviavo taiadi i le'wai, Iesu i vaganago 'waidie i velutoliedi i vo, Aitoi 'wa lulualeni?” Tolugaviavo i vo, Tomogo Nasaledi 'ana wagava Iesu.” Iesu i vo, Yau side tauniku.” Tutuyanina Iesu i vonedi i vo, Yau side tauniku,” tolugaviavo i vemuliuga i nagoi i be'u i ve'ufo'ufobala. Wata Iesu i velutoliedi i vo, Aitoi 'omi 'wa lulualeni?” Tolugaviavo i vo, Tomogo Nasaledi 'ana wagava Iesu.” Iesu i vo, 'Akonadi a vonemi a vo, Yau side 'asa'aiana tauniku.” Fai nuanuami yau, de'e yaku tovetutuyamavo 'wa na vonedi i na nagoi.” Iesu i vonaga i vo, 'Wa na vonedi i na nagoi,” nika yana vonanina basenadi 'ana mogitana i souyeni fai i vo, Tamaku, tomotoganidi 'u velekuga 'waidiega kebu tamu aitoi a da baileni a 'i'isave'avinidi.” 10 Saimoni Fita ma yana kefata, i yo'ei tovelomu bwaikina yana tofolova igodi i da nikei, taniga'avana 'ana 'atagiega i tutuomuya. Tofolovanina 'ana wagava Maleko. 11 Iesu Fita i talabodeni i vo, 'Asa'aiana, yamu kefata 'u dodogi 'ana 'eba 'aidodoga 'waineye. I lubwaineku vita wata wafa a na veluagadi fai Tamaku nuanuana, we'e 'omu yana nuanuanina 'u tatalabodeni.”

12 Tolugaviavo ma yadi toeva biola, wata vanuga 'eba velu'ui 'ana to'isave'avinavo taiadi, Iesu i 'ive'avini i yogoni. 13 Mulieta i 'ewai i naweni Anasa 'waineye. Anasanina natuna yadi lamoga tovelomu bwaikina malamalanina 'waineye, 'ana wagava Kaiafa. 14 Kaiafa kumanina basenadi me Diu to'edakumetavo i vonedi i vo, I lubwaineni Iesu i na wafa bega tomotoga fueda ta na mia 'atumaina.”

  • S1 Mad 26:36S9 Ion 17:12S11 Mad 26:39S14 Ion 11:49-51

Fita Iesu i ve'eweni.

15 Saimoni Fita wata tamu tovetutuyama Iesu i yogo'waili. Ma fuedie i le'wai tovelomu bwaikina yana vanuge, vanuganina kalikalina, nageneye i luku tamu 'awasasa 'waineye. Fai tovelomu bwaikina tovetutuyamanina i 'asetai begaidi Iesu taiadi i luku. 16 We'e Fita i tovotovoi tanotanoge kali 'ana 'awa lilivaneye bega iana, kumanina tovelomu bwaikina i 'asetai i vilai i mai vavine ne'e'elina 'awa 'ana to'isave'avina i voneni Fita i tauyeni i luku. 17 Vavinenina ne'e'elina Fita i voneni i vo, Voke 'omu kumanimu no'o tomogonina tamu yana tovetutuyama.” Siwe Fita i ve'ewa i vo, Yau tuliku.”

18 Fai kaukau, tofolovavo wata tolugaviavo 'ai i levai mula'wayega bei i vevevala. Wata Fita i nago lilivadie i tovoi ma fuedie i vevevala.

  • S17 Ion 13:38

Tovelomu bwaikina Iesu i velutolitolieni.

19 Vanuganina nageneye tovelomu bwaikina Iesu i velutolitolieni yana tovetutuyamavo wata yana ve faifaidi. 20 Yana vona Iesu i tutuli i vo, Yau tutuya fuedi mageseye a veveifufu 'aila'a matadie. Kebu a da givagiva a da veve, yaku ve matatabuna vanuga 'eba velu'ui nageneye wata 'eba miava'auta 'waidie me Diu fuedi matadie. 21 Awale 'u velutolitolieku? Nuanuamu velutoli, tomotoganidi yaku vona i noganogaidi 'waidie 'u da velutoli. Ava'ai a voneyediga i 'asetadi, 'adi fata i na lu'ivona 'waimuye.” 22 De'e bani'odi Iesu i vonevoneyediga, tamu tolugavia i 'ainike Iesu maigineye wata i vo, Awale we'e bani'odi 'u voneyedi yada tovelomu bwaikina 'waineye, kebu 'u da ve'ililibuyeniga.” 23 Tolugavia yana vona, Iesu i tutuli i vo, 'Ai'edi a vekaliga, 'u na lu'ivona tomotoga 'waidie, we'e 'ai'edi a vona tonovina, awale 'u nikeku?”

24 Anasa yana velutoli i 'a'ava, Iesu yogoyogonina i vetunei i nago tovelomu bwaikina tamu 'ana wagava Kaiafa 'waineye.

  • S20 Mad 26:55 Ion 7:26

Fita Iesu i ve'ewa-vaituganeni.

25 Fita bola i vevevala, 'ifwaidi tomotoga i voneni i vo, Voke 'omu no'o tomogonina tamu yana tovetutuyama.” Siwe Fita i ve'ewa i vo, Kebu, yau tuliku.” 26 Tovelomu bwaikina yana tofolova, kumanina Fita tanigana i tutuomuya we'e iana tamu wata taunina tofolova i vona Fita 'waineye i vo, 'Asiau 'a waia Iesu 'a 'ive'avini voke a 'isemu Iesu taiadi.” 27 Wata Fita i ve'ewa i vo, Kebu,” nika kamukamu i kwage.

  • S26 Ion 18:1,10S27 Ion 13:38

Iesu i tovoi Failato mataneye.

28 'Awa'awaiogose Kaiafa yana vanugayega me Diu to'edakumetavo Iesu i vagavaia i naweni Loma gabemani 'adi to'edakumeta yana vanuga bwaikina 'waineye 'ana wagava Failato. Taunina kebu tomogo Diu, begaidi me Diu i vo, 'Ai'edi ta na luku yana vanuge, ta na veyoke Yaubada mataneye bega kebu 'ada fata Uvi'agalatagona sakalina ta na 'ani.” 29 Fai nuanuadi i na miamiani tanotanoge, begaidi Failato i souyeni yana vanugayega i mai i velutoliedi i vo, Ava'ai faifaina tomogo de'e 'wa vevitai?” 30 Me Diu yana vona i tutuli i vo, 'Ai'edi kebu yana sakonaga, 'ako kebu 'a da mieniga.” 31 Bega Failato i vonedi i vo, 'Wa naweni i na vonayavuga matamie. 'Ai'edi ma yana sakona taunimi yami veimea 'waidiega vematavuloga 'wa na veleni.” Me Diu to'edakumetavo Failato i voneni i vo, Nuanuama i na wafa yana sakona faifaina, siwe 'omi me Loma 'wa talabodema. Nuanuama 'u na vona i na wafa 'ai lagalagana 'waineye.” 32 Basenadi Iesu i vona-vagata 'awaie i na wafa 'ai lagalagana 'waineye, tutuyanina me Diu i vo, Nuanuama 'ai lagalagana 'waineye i na wafa,” nika Iesu yana vonanina 'ana mogitana i souyeni. 33 Failato i vilai i luku yana vanuge, tomotoga i vonedi Iesu i naweni 'waineye i voneni i vo, 'Alo 'omu kumanimu me Diu yadi kini.” 34 Iesu Failato i voneni i vo, Yamu vonanina, 'omu yamu nuanua 'alo mali tomotoga i vonemuna bani'odi 'u voneyedi?” 35 Wata Failato i vo, 'Alo yau tomogo Diu bani'odi a da voneyedi. Taunimu yamu tomotoga wata yamu tovelomu 'adi to'edakumetavo i 'anivelenemu 'waikuye. Siwe ava'ai yamu sakonaga?” 36 Iesu i voneni i vo, De'e bei fwayefwayeye kebu yaku 'Eba Veimea i da 'eno'eno. We'e 'ai'edi yaku 'eba veimea fwayefwayeye i da 'eno'enoga, 'ako yaku tofolovavo i da 'ikasikasisieku me Diu yama to'edakumetavo taiadi i da vetalaga 'aku 'ita'ita'i faifaina. Yaku veimea lamuna kebu fwayafwaya 'wainega.” 37 Bega Failato i velutoli Iesu 'waineye i vo, 'Alo 'omu kini?” Iesu i vo, 'U vonaga yau kini, 'u vona mogitana. Faifaina yau a mai fwayefwayeye a tubuga, a vevetolu'ivona Yaubada yana nuanua tonovidi. Egavo nuanuadi sauluva tonovidi, yaku vona i noganogaidi.” 38 Failato i vo, Ava'ai nuanuaga tonovidi?”

Mulieta Failato i vilai i obu tanotanoge me Diu i vonedi i vo, Kebu 'aku fata a na veimea i na wafa fai kebu tamu yana sakona a da veluagai.
39 Siwe yami sauluva malamala 'aitamogana 'aitamogana Uvi'agalatagona 'ana sakali 'waineye 'wa vonavona tamu tomogo a 'e'etoyavuya vanuga 'eba yogona 'wainega. Bega nuanuami me Diu yami kini a na 'etoyavuya?” 40 I vegolegole i vo, Kebu, kebu kumanina yama nuanuaga. Nuanuama Balaba 'u na 'etoyavuya.” Balabanina taunina tovainago wata to'ainike.

  • S31 Ion 19:6-7S32 Ion 12:32-33S37 1 Tim 6:13
Copyright information for `YML