Luke 18

Iesu i vona-awatabai 'wabula wata toveimea faifaidi.

Mulieta Iesu vona-awatabaiega i ve tovetutuyamavo 'waidie bega tutuya fuedi i na vevelu'ui Yaubada 'waineye kebu i na 'ailove. Iesu i vo, Tamu vonayavuga 'ana toveimea kebu Yaubada i da ve'ililibuyeni we'e tomotoga faifaidi kebu i da nuanua. 'Atamananina 'waineye toveimeanina i miamiaga wata bei tamu 'wabula i miamia. Tutuya fuedi i nunago toveimeanina 'waineye i vevelu'ui i vo, Tamu tomogo i vesauluva sakoina 'waimeye, nuanuama yamu veimea 'wainega 'u na 'ivaisema. Tutuya manamanawena toveimeanina i baibaila kebu nuanuana i na 'ivaisedi, siwe mulieta i logi yana nuanua i sivilai i vo, Yaubada kebu a da ve'ililibuyeni we'e tomotoga faifaidi kebu a da nuanua, siwe vavine yadi mai-vaivaitugana faifaina a 'abiawa begaidi a na 'ivaisedi. 'Ai'edi kebu a na veimea bega 'aivaita i na veluagai, tutuya fuedi i na mimai-vebogi 'waikuye i na 'ivelogilogiku.”

Wata Iesu i vonedi i vo, 'Wa na nuani toveimeanina yana vona. Toveimea sakoina siwe vavine i 'ivaisedi, we'e 'omi mogitana 'aivaita 'wa na veluagai Yaubada 'wainega fai taunina 'atumaiotogina. 'Omi 'wa da nuani, Yaubada yana tomotoga lovana wata 'aiata i vevelu'ui 'aivaita faifaina, i na 'ivaita-matayo'oyedi 'alo i na 'ivogavogana? A na vonemi i na veimea yana nuanua tonovidi 'waidiega 'aivaita i na veluaga-matayo'oi. We'e tutuyanina yau a vetomotogaotoga a na vilaku a na mai tomotoga fuedi ma yadi vetumagana a na veluagadi 'alo kebu?”

  • S1 Kolos 4:2S4-5 Luk 11:5-9S7 Ve 6:9-11

Iesu i vona-awatabai Falisi wata tolaugogona faifaidi.

Tomotoga 'ifwaidi yadi nuanua i vo, 'Ima 'atumaima, mali tomotoga bani'odi nani-'avo'avovo,” begaidi Iesu i vona-awatabai faifaidi. 10 I vo, Tomotoga 'adi 'ailuga i luku vanuga 'eba velu'ui 'waineye i na velu'ui. Tamu totafalolo Falisi we'e tamu takesi tolaugogona. 11 Falisi i tovi'eni i velu'ui i vo, Yaubada a vekaiwa 'waimuye fai yaku sauluva kebu bani'odi mali tomotoga, taunidi toveumokai, vivinagodi wata tove'avula-'avo'avovo. Wata a vekaiwa fai yau kebu de'e takesi tolaugogona vivinagona bani'odiga. 12 Wiki 'aitamogana 'aitamogana nagedie 'aiata 'ailuga 'ailuga a veve'udigana 'ani matatabuna bega yaku velu'ui 'waimuye i na vetoketoke, wata mani a veveluagadi yaku folova 'wainega a 'e'etokwaudi 10, 'etokwau tamu a 'a'aniveleneni 'waimuye.”

13 We'e tolaugogonanina tulineye i tovoi kebu nuanuana i na 'isalaka abame ma yana bunumayaga i 'odu i velu'ui i vo, Yaubada, yau tosakona, 'u da 'isanuakalikalieku.”

14 Wata Iesu i vo, A na vonemi, tolaugogonanina yana sakona Yaubada i nuatuvunina i nago yana vanuge, we'e Falisi kebu. Egavo taunidi i na awa'ai'aidiga 'awaie Yaubada i na kiaobuyedi we'e egavo taunidi tonuaobu, 'awaie Yaubada i na kialakaidi.”

  • S9,14 Luk 16:15S11-12 Mad 23:23,28

Iesu yavayavava i nuakalikaliedi.

15 Tomotoga 'ifwaidi natudiavo i miedi nuanuadi Iesu i na 'abitonovidi wata i na vonanuakalikaliedi, siwe tovetutuyamavo i 'isedi i talabodedi. 16 Iesu yavayavavanidi i vonedi i na maia 'waineye wata i vo, Kwakwama 'wa bailedi i na maia 'waikuye, fai egavo taunidi tonuaobu yavayavava de'e bani'odi 'adi fata taunidi i na tauyedi bega Yaubada i na veveimeyedi. 17 A vona mogitana 'waimie, aitoi Yaubada i na vetumaganeni bani'odi yavayavava yadi vetumagana, Yaubada i na veimeyeni yana 'Aila'a nageneye, we'e 'ai'edi kebu, kebu 'ana fata.”

Tomogo 'ai'aiwabuna.

18 Tamu me Diu yadi to'edakumeta i velutoli Iesu 'waineye i vo, Tove 'atumaimu, nuanuaku a na 'asetai ava'ai a na 'idewai bega mia 'atumaina wata miamia-vagaina a na veluagai.” 19 Iesu yana velutoli i tutuli i vo, Awale 'u awave'atumaieku? Kebu tamu aitoi 'atumainaga, Yaubada 'aiseotogina 'atumaina. 20 Ve'etoboda 'akonadi 'u 'asetadi basenadiotoga Yaubada Mosese i veleni, kebu tamu aitoi yana vavine 'u na luobuyedi, kebu 'u na luvewafaga, kebu 'u na vainagoga, kebu 'u na vekali tamu tomotoga yana sauluva faifaina, tamamu wata inamu 'u na ve'ililibuyedi.” 21 Tomogo i vo, We'e ve'etobodanidi basenadi siaikuyega i maiga 'asiau a vevematayakeyakedi.” 22 Iesu i voneni i vo, Wata tamu nani 'waimuye kebu 'u da 'idewaiga. 'U na nago yamu kukua wata ava'ai ava'ai 'waimuye i 'eno'enoviga matatabuna 'u na vekimwaneyedi, tutulidi 'u na 'ewadi, egavo i vewekowekomaga 'u na 'ivaisedi nika 'omu 'akonadi 'u na ve'ai'aiwabu abame. 'U na 'anivelenedi i na 'a'avana 'u na mai 'u na vetutuyameku.” 23 Tomogonina Iesu yana vona i nogai, nuana i vita bwaikina fai yana 'ai'aiwabu fuedi, nuana i loloi kebu nuanuana i na 'anivelenedi.

24 Iesu i 'iseni tomogo ma yana nuavita maigina i 'anivivili begaidi i vo, 'Ai'aiwabu yadi luku Yaubada yana 'Aila'a 'waineye vitaotogina 'waidie. 25 Bawe yana luku aima mataneamo vitana, we'e 'ai'aiwabu yadi luku abame, 'waidie vitaotogina.” 26 Tomotoganidi Iesu yana vona i nogai i voneni i vo, Vetuma kebu tamu aitoi 'ana fata 'ita'ita'i i na veluagai sakona 'wainega.” 27 Iesu yadi vona i tutuli i vo, Tomotoga tauni'avadi kebu 'adi fata 'ita'ita'i i na veluagaiga, Yaubada 'aisena 'ana fata i na 'ivaisedi.”

28 Fita Iesu i voneni i vo, Maide 'ima nani matatabuna 'a bailedi 'a maia 'waimuye 'a vevetutuyamemu.” 29 Iesu i vonedi i vo, A vona mogitana 'waimie, egavo Yaubada yana veimea faifaina yadi vanuga i 'iawedi, yadi vevinevo, ediavo, tamadiavo, inadiavo 'alo natudiavo i 'iawediga, 'awaie naninidi 'adi tutula bwaikaotogina Yaubada i na veledi. 30 Naninidi 'ai'edi i na bailediga, tutuya de'e nani fueotogidi Yaubada i na veledi, wata 'awaie mia 'atumaina wata miamia-vagaina i na veluagai.

  • S20 Sou 20:12-16S22 Luk 12:33

Iesu yana vona 'ana vetonu yana wafa faifaina.

31 Iesu yana tovetutuyamavo i vonedi taiadi tulidie i nagoi i vonedi i vo, A na vonemi, ta nunagoi Ielusalema bei nani matatabuna basenadiotoga Yaubada yana tolu'ivona i kilumiga yau a vetomotogaotoga faifaiku, 'adi mogitana i na souyedi 'waikuye. 32 I na 'aniveleneku mali tomotoga taunidi kebu Diu 'waidie i na sidibidibieku, i na yagaiku, wata i na kiwaliku. 33 I na toke i na fitaliku mulieta i na luvewafaku, siwe 'aiata 'ana vetonu 'waineye a na tovoi wafayega.” 34 Siwe tovetutuyamavo kebu i da 'asetaiga yana vona 'ana nuanua. Yana nuanuanina Yaubada i giveni bega ava'ai Iesu i vonevoneyeniga kebu 'adi fata i na 'asetai.

Totalavelu'ui matana sakoidi Iesu i 'ive'atumaia.

35 Iesu ma enavo sai'afoga i na le'wai Ieliko nika tamu tomatasako i veluagai 'edeye i miabui i vevelu'ui mani. 36 Tutuyanina tomogonina i nogai 'aila'a bonadi i mimaia, i velutoli i vo, We'e ava'ai?” 37 'Ifwaidi tomotoga yana velutoli i tutuli i vo, Iesu tomogo Nasaledi i mai i nunago.” 38 Begaidi tomatasako i vegole i vo, Iesu, 'omu Kini Devida tubuna 'u da 'isanuakalikalieku.” 39 Tomotoganidi i tovotovoiga Iesu lilivaneye i yagaia i vo, 'U ve'wada.” Nika i toke i vegolegole i vo, Iesu, 'omu Kini Devida tubuna, 'u da 'isanuakalikalieku.” 40 Bonana i nogai Iesu i tovoi i vo, Tovegolegolenina 'wa mieni 'waikuye.” 41 Tutuyanina i mai 'waineye i velutolieni i vo, Ava'ai nuanuamu 'waimuye a na 'idewai?” I vo, 'Auvea, nuanuaku a da 'isala.” 42 Iesu i vo, 'Atumaina, 'u 'isala. Fai 'u vetumaganeku, 'akonadi 'u ve'atumai.” 43 Iesu yana voneye nika 'ana fata i na 'isadewa bega i tovoi, Iesu mulineye i nunago Yaubada 'waineye i vevekaiwa. Wata tomotoga fuedi i 'iseni Yaubada i subiai.

  • S37 Mad 2:23S38 Mad 1:1
Copyright information for `YML