Mark 16

Iesu i tovoi-vaitugana wafayega.

Inala i simwanuya nika me Diu yadi 'Aiata Veawai i 'a'ava, begaidi vevine 'adi 'aitonu i nagoi bunama magaina 'atumaina i kimwanei Iesu tomogona faifaina. Vevinenidi Meli 'atamana Magidala 'wainega, wata tamu Meli Iemesa inana, wata Salome. Tafalolo wiki 'ana 'aiata 'eba velamu 'waineye, i 'atai 'awa'awaiogose inala be'ama i vulaoga, vevinenidi i tovoi i nagoi taumaseye. I nunagoi 'edeye 'aise'avadi i vonavona i vo, Aitoi kileu bwaikaotogina i na ketoi taumata 'awanega?” Siwe i 'isanago i 'iseni kileu ketoketona. Vevinenidi i maia i luku taumata nageneye tamu tubuau i 'iseni ma 'ana talauma 'avu'avuna 'atagiega i miabui nika i kololo-'afo'afo. Tubuaunina i vonedi i vo, Kebu 'wa na kolologa, a 'asetami Iesu tomogo Nasaledi bagase i tutufwaseniga 'ai lagalagana 'waineye 'wa lulualeni siwe 'akonadi i tovoi-vaitugana. De'e bei kebu i da miamiaga. 'Wa 'iseni 'ana 'ivi'ava. We'e 'omi 'wa na nagoi yana tovetutuyamavo wata Fita taiadi 'wa na vonedi 'wa na vo, Iesu i kumekumeta 'awalawa Galili, 'omi bei 'wa na nagoi 'wa na veluagai, basenadi i vonemiga bani'odi.” Vevinenidi i nogayeni taumatayega i souyedi i dega ma yadi tatava wata ma yadi nuavogana. Kebu tamu aitoi 'waineye i da lu'ivonaga fai i kololo.

  • S7 Mak 14:28

Iesu yana souyagi Meli 'waineye.

[
Tutuyanina Iesu i tovoi-vaitugana 'awa'awaiogose wiki 'ana 'aiata 'eba velamu 'waineye nagami i souyeni Meli 'atamana Magidala 'wainega 'waineye. Vavinenina basenadi yaiaina 7 i agei siwe Iesu i vona i 'awa'a'ia. 10 I 'iseni i 'a'avana, i mimai enavo i na vonedi siwe i le'wa i 'isedi i vevemogai. I vonedi i vo, 'Wa ve'wada, Iesu 'akonadi i tovoi-vaitugana, yau taiadi a veluaga.” I nogai siwe kebu i da ve'awamogitana.

  • S9 Luk 8:2

Iesu yana tovetutuyamavo 'adi 'ailuga taiadi i veluaga.

12 Mulieta Iesu yana tovetutuyamavo 'adi 'ailuga i nunagoi wala'aiamo, 'edeye Iesu i souyeni 'ana 'isa tulina. 13 I 'iseni wata taiadi i veifufu, mulieta i viladi 'ifwaidi ediavo 'waidie i lu'ivona siwe taunidi wata kebu i da vetumaganediga.

Iesu yana tovetutuyamavo yadi folova i veledi.

14 Tamu 'aiata Iesu yana tovetutuyamavo 11 i 'ani'ani 'awasasadie Iesu i souyeni i vonedi i vo, Awale nuami i 'amalakibu? Egavo i 'iseku a tovoi-vaitugana siwe yadi vona kebu 'wa da vetumaganedi.”

15 Wata i vonedi i vo, 'Wa na nagoi tomia fwayafwaya matatabuna 'waidie, Vala 'Atumaina faifaiku 'wa na lu'ivona 'waidie. 'Ai'edi aitoi ma yana vetumagana taunina i na tauyeni 'waikuye i na bafitaiso, Yaubada i na 'ita'ita'ieni. We'e 'ai'edi aitoi kebu i na vetumaganeku, Yaubada i na veimea vematavuloga i na veluagai. 17 'Ai'edi egavo i na vetumaganeku veimea a na veledi, bega 'eba 'isa toketokedi i na 'i'idewadi tomotoga fuedi i na 'isedi nika Valaku i na vetumaganeni. 'Aku wagavayega tovetumagananidi i na vona yaiaina 'waidie i na 'awa'a'idi wata 'adi fata i na vonavona bonanidi basenadi kebu i da 'asetadiga 'waidiega. Wata 'ai'edi 'o'olo kasikasisidi i na 'abitonovidi, kebu i na ovadiga, wata 'ai'edi aitoi ufa kasikasisidi
Ufa kasikasisidi bani'odi tuva.
i na veyemudi, kebu i na wafaga. We'e toviga i na 'abitonovidi i na ve'atumai.”

  • S15-16 Fol 1:8S16 Fol 2:38, 16:31-33
  • S17 Fol 2:4, 8:7, 28:3-6 Luk 10:19

Iesu i laka abame.

19 Iesu yana veifufu i 'a'ava tovetutuyamavo 'waidie, mulieta Yaubada i vagavaia i laka abame ma yana veimea 'ana 'atagiega i miabui.

20 'Akonadi Iesu i 'iawedi tovetutuyamavo i yavula 'atamana matatabuna 'waidie i lau'age. Yadi 'Auvea yana toketokena 'wainega i folofolova bega yadi folova ma 'adi 'eba 'isa toketokedi, tomotoga fuedi i 'isedi i ve'awamogitana yadi lau'age faifaidi.]

  • S19 Fol 2:33-34 Efe 1:20S20 Fol 14:3 Ibu 2:3-4
Copyright information for `YML