Revelation of John 8

Yogoyogonanidi 'ana ve-7 i kiadabai.

Wata a 'isanago a 'iseni Yaubada yana Sifi Siaina lubulubu nunumina yogoyogona 'ana ve-7 i kiadabai, nika abame nani matatabuna kulukulu i lovogi bani'odi 'awasasa sai'afo.

I 'a'avana mulieta Yaubada yana anelose 7, kumanidiavo mataneye i tovotovoi a 'isedi, 'aitamogana 'aitamogana yadi evulega i veledi.

We'e tamu anelose ma yana 'aivoe golida vane faifaina, i maiga 'eba velomu lilivaneye i tovoi. Yaubada vane bwaikina i 'ewai anelosenina i veleni i na kabuni 'eba velomu golida 'waineye, 'eba velomunina i tovotovoi Yaubada yana 'eba miabui 'ai'aiwabuna mataneye. Vanenina i kabuniga Yaubada yana tomotoga yadi velu'ui 'ana 'imoso'i, lufwa magaina 'atumaina i laka velu'uinidi taiadi Yaubada mataneye anelose nimaneamo. Anelosenina 'ai 'ala'alaina i 'ewadi 'eba velomu 'wainega i vedodogi vane 'ana 'eba vedodoga 'waineye. I vedodogidi i 'a'avana i toke i taweni i obu fwayefwayeye nika tomuyoana i kianamali wata i duduya, butu'ai bwaikidi wata yoyoyo i yue.

  • S3-4 Ve 5:8

Evulega 7 i yuvedi.

'Ai 'ala'alaina i taweni i obu fwayefwayeye i 'a'ava mulieta anelosenidi 7 yadi evulega nimadie a 'isedi i na yuvedi.

Nagami, tamu yana evulega i yuveiga, 'ai 'ala'alaina, dayaga, wata 'wei mwadodoudi bani'odi aisi i avuta fwayefwayeye. Fwayafwaya vi'ai 'aitonu, vi'ai 'ailuga 'atumaidi we'e vi'ai 'aitamogana i 'alai, wata bani'odi welavi wata mosomoso.

Anelose 'ana veluga yana evulega i yuveiga, tamu nani 'ana 'isa'isa bani'odi 'oya bwaikina i lubeanunuga malaveseye i taweni. Eyaga vi'ai 'aitonu, vi'ai 'ailuga 'atumaidi we'e vi'ai 'aitamogana i yamota bani'odi dayaga, bega vi'ainina nageneye igana matatabudi i wafa wata waka i 'aniweawealidi.

10 Anelose 'ana vetonu yana evulega i yuveiga, tamu 'ubwana bwaikina i 'alata dukala bani'odi abamega i 'anita'ia ufa bwaikidi wata ufa-luluvuala 'ifwaidi 'waidie. Ufa vi'ai 'aitonu, vi'ai 'ailuga 'atumaidi we'e vi'ai 'aitamogana i vegolagola bani'odi 'alu bega tomotoga fueotogidi i yemuga i ve'alawafawafa. 'Ubwananina i 'anita'iga 'ana wagava Gola.

12 Anelose 'ana ve-4 yana evulega i yuveiga, inala, weta'i wata 'ubwana i 'isamata'weu'weu. Inala vi'ai 'aitonu, vi'ai 'ailuga 'atumaidi we'e vi'ai 'aitamogana i dudubali. Wata bani'odi weta'i wata 'ubwana bega fwayefwayeye lovana wata 'aiata yadi mageta i vesiai.

13 I 'a'avana a 'i'isadabaga nika a nogai manubutu butu'aina. Tabwaotogineye i luluvivila i toke i vegole i vo, Ieu, 'omi tomia fwayafwaya nuakalikalimi. Tutuyanina anelose 'adi 'aitonu 'aitamogana 'aitamogana yana evulega i na yuveiga, vita bwaikaotogidi tulina tulina i na sousouyedi 'waimie.”

  • S7 Ioe 2:30 Sou 9:23S8-9 Sou 7:20-21S13 Ve 9:12, 11:14
Copyright information for `YML