Romans 9

Faulo i venuafouviga me Isileli faifaidi.

Ekwavo, nuanuaku a na veifufu tamu nani faifaina, naninina 'eba nuavita bwaikaotogina 'waikuye. Yau Keliso yana tomotoga, bega ta 'asetai naninina a na voneyeniga vona mogitana, kebu a na vekaliemi. Wata a vebaeku 'Anu'anunu 'Atumaina i ve'awamogitana yaku nuanua 'waineye. Vona mogitana a nuavita bwaikaotogina wata ma yaku venuafouviga me Isileli faifaidi. A nuavitaga fai tomotoganidi yaku 'aila'a siwe Keliso i vedumwe'ai'aieni 'awaie vematavuloga i na veluagai Yaubada 'wainega i na wafaotoga. A vona mogitana siwe 'ai'edi i da lubwaineniga nuanuaku ekwavo me Isileli 'adi vematavuloganina a da evai wata nuanuaku Keliso i da 'awa'idia 'waikuyega ma'itufa me Isileli i da labinidi. Me Isileli 'adi 'aivaita i veluagadi Yaubada 'wainega, siwe kebu i da vematayakeyakeni. Basenadiotoga Yaubada i venua'ivinedi taunidi yana tomotoga mogitana i vonedi i vo, 'Omi natukwavo.” Yana mageta mataududulina i sivemageseni 'waidie, i veakutagonidi, wata ve'etoboda i veledi. 'Ana subia 'ana 'eda'eda mogitana i vedi, wata yadi mia i na ve'atumaiga faifaina 'waidie i vona'awaufaufa. 'Aila'anina i souyedi tomotoga bwaikaotogidi 'waidiega bani'odi Ebelamo, Aisake, Iakobo, we'e Keliso Yaubada 'ana Venua'ivina i vetomotogaotoga 'aila'anidi 'waidiega. Kelisonina 'asa'aiana Yaubada, taunina nani matatabuna 'adi Toveimea. I lubwaineda tutuya matatabuna 'waidie ta na subisubiai. Vona mogitana, yaku nuanua bani'odi.

  • S5 Mad 1:1-2 Ion 1:1

Yaubada yana tomotoga vevenua'ivinidi.

A vonaga me Isileli Iesu i vedumwe'ai'aieni faifaina, we'e kebu a da vo, Yaubada i vona'awaufaufaga me Isileli 'waidie yana nuanua wata i sivilai.” Me Isileli matatabudi, siwe kebu matatabudi Yaubada yana tomotoga fai yadi vetumagana kebu. Wata bani'odi Ebelamo tubunavo taunidi me Isileli, kebu matatabudi Yaubada yana 'aila'a fai basenadiotoga Yaubada kebu i da vona Ebelamo natunavo matatabudi faifaidi, Aisake 'aisena faifaina i vona i vo,

Natumu Aisake 'aisena 'wainega 'amu 'aila'a i na souyedi.”

Vonanina 'ana 'aseta Ebelamo tubunavo kebu matatabudi Yaubada natunavo fai yana vona'awaufaufa Ebelamo 'waineye side bani'odi i vo,

A vonevonemu tutuya de'e bani'odi wata a na mai, bei Sela i na venatuna.”

Fai bani'odi Yaubada i voneyedi ta 'asetai Ebelamo tubunavo mogitana, kumanidiavo i souyedi vona'awaufaufanina 'wainega.

10 Natunanina i tubuga i goleni Aisake, taunina me Isileli tubudi, mulieta i taulai Libeka taiadi i nagi. Sai'afoga natulugaluga i na venatunedi Yaubada i vonedi i vo, Tulaina i na vetofolova bwasiona 'waineye.” Bola kebu i da tubugaga Yaubada bwasiona Iakobo i venua'ivineni yana nuanua i na 'idewai, we'e tulaina Iso i na vetofolova taina 'waineye. Wata fai bola kebu i da tubugaga, bega kebu tamu ava'ai 'atumaina 'alo sakoina i da 'idewai, Yaubada Iakobo i venua'ivineni fai yana venua'ivina kebu tomotoga yadi sauluva 'waidiega, siwe taunina yana nuanua 'wainega. 13 Yana venua'ivinanina faifaina tamu yana vona i 'eno'eno yana Buki nageneye i vo,

Iakobo nuanuaku, we'e Iso kebu.”

14 Fai Yaubada tamu tomogo nuanuana we'e tamu tomogo kebu nuanuana, voke 'wa vo, Awale Yaubada yana veimea kebu tonovinaga?” Kebu bani'odi 'wa na voneyediga. 15 Yana venua'ivina 'ana 'aseta faifaina basenadiotoga Yaubada Mosese i voneni i vo,

'Ai'edi nuanuaku tamu aitoi a na 'isanuakalikalieniga, a na 'isanuakalikalienimo.

'Ai'edi nuanuaku tamu aitoi ma yaku nuakalikali a na vesauluva 'atumaina 'waineye, a na vesauluva-'atumaienimo.”

16 Fai bani'odi i voneyediga bega ta 'asetai Yaubada yana venua'ivina kebu tomotoga yadi nuanua 'wainega 'alo yadi sauluva 'atumaidi 'waidiega, we'e mogitana egavo Yaubada i na 'isanuakalikaliedi, tomotoganidi i vevenua'ivinedi. 17 Yaubada yana venua'ivina 'ana vona i 'eno'eno yana Buki 'waineye, vonanina 'wainega Mosese i vona me Itifita yadi toveimea bwaikina 'ana wagava Felo 'waineye. Yaubada i vo,

Yau a vona 'u ve-kini ava'ai a nuaniga faifaina.

Naninidi a na 'idewadi 'waimuye, 'waidiega yaku toketokena a na sivemageseni bega tomia fwayafwaya matatabudi i na 'asetaku yau Yaubada mogitana.”

18 Fai Yaubada bani'odi i voneyedi ta 'asetai 'ai'edi nuanuana tamu aitoi i na 'isanuakalikalieni, i na 'isanuakalikalienimo, we'e 'ai'edi kebu nuanuana tamu aitoi yana nuanua i na tauya-matayo'oyeni tamu nani faifaina, nuafouna Yaubada i na kiavefa'ali.

  • S7 Nag 21:12S9 Nag 18:14S11-12 Nag 25:21,23S13 Mal 1:2-3
  • S15 Sou 33:19S16 Tai 3:5 Efe 3:9S17 Sou 9:16

Yaubada yana nuakalikali wata yana nuasako Faulo i veifufuyedi.

19 Voke 'ifwaimi 'wa vonavona 'wa vo, Yaubada tomotoga 'ifwaidi nuafoudi i kikiavefa'alidi, vetuma awale i sakosakonaga i awavesakoyedi? Ava'ai Yaubada i nuaniga kebu tamu aitoi 'ana fata i na talabodeni.” 20 Ekwavo, 'omi 'wa da vo bwaikimi Yaubada 'wa 'uva'uvani. 'Ai'edi nau ma 'awanaga kebu i da lubwaineni i da vo, 'Omu 'aku to'abi, awale bani'odi 'u 'abiku?” 21 Nau 'ana to'abi ma yana veimea fwayafwaya 'waineye. Fwayafwayanina 'akonadi i 'idewaiga 'wainega 'ana fata tamu nau 'atumaina i na 'abia i na kilumi 'eba 'ani faifaina, we'e tamu i na 'abia ta'ula-'avo'avovo.

22 Yaubada nau 'ana to'abi bani'odi, 'ida tomia fwayafwaya i 'idewada bega ma yana veimea 'waideye. Tomotoga 'ifwaidi i 'idewadi bega yana toketokena wata yana nuasako i na sivemagesedi. Tomotoganidi i sakosakona i lubwainedi 'adi vematavuloga i da wafaotoga siwe Yaubada i tokemaiga kebu vematavuloga i da vele-matayo'odi. 'Ai'edi Yaubada nuanuana yana toketokena wata yana nuasako i na sivemagesedi tomotoganidi 'waidiega, we'e 'wa na 'uvani kebu i da lubwaineniga. 23 Yaubada i tokemaiga tosakonanidi kebu i da leodi tomotoga 'ifwaidi 'adi 'aivaita faifaina, kumanidiavo basenadiotoga i venua'ivinedi wata i 'idewadi bega i na 'isanuakalikaliedi. Nuanuana yana 'ai'aiwabu magemagetadi i na sivemagesedi 'waidie. 24 Tomotoganidi i venua'ivinediga, 'asa'aiana 'ida. Kebu me Diu 'aisedi 'waidiega, siwe wata mali tomotoga 'waidiega i venua'ivineda bega yana 'ai'aiwabu magemagetadi ta na veluagadi. 25 'Omi mali tomotoga kebu me Diu i venua'ivinemiga faifaina basenadiotoga tamu Yaubada yana tolu'ivona 'ana wagava Osea i kiluma. Yaubada i vona i vo,

Mali tomotoga taunidi kebu me Diu nagami kebu yaku tomotoga, siwe 'asiau a na vo, Yaku tomotoga.”

We'e 'aila'anina nagami kebu a da nuakalikaliediga, siwe 'asiau a na vo, A nuakalikaliemi.”

26 'Awalawanina 'waineye nagami a vonedi a vo, 'Omi kebu yaku tomotoga,” 'asiau 'awalawanina 'waineye a na vo, Yau Yaubada Miamia-vagaiku natukwavo 'omi.”

27 We'e basenadiotoga tamu Yaubada yana tolu'ivona 'ana wagava Aisea i vegolegole me Isileli faifaidi i vo,

'Ai'edi me Isileli 'adi 'aila'a i na vefue wala'ai 'ana 'ilukulukuta bani'odi, siwe 'adi 'aivia bani'odi 'ita'ita'i i na veluagai.

28 Kebu fuedi 'ita'ita'i i na veluagai fai tomia fwayafwaya matatabudi 'adi vematavuloga i na veluaga-matayo'oi 'Auvea 'wainega. Yadi sakona i na tutula-vagasedi.”

29 Wata bani'odi Aisea i vona-vagata me Isileli faifaidi i vo,

'Auvea Toketokeotogina i tauyeda 'ada 'aila'a 'ifwaidi ma yawaidi i miamiani,

'Ai'edi kebu, 'ako matatabuda i da leoda bani'odi basenadi me Sodoma wata me Gomola i leodi.”

  • S20 Ais 45:9S21 Iel 18:6S25 Ose 2:23S26 Ose 1:10
  • S27-28 Ais 10:22-23S29 Ais 1:9

Me Diu kebu nuanuadi i na vetumagana Keliso 'waineye.

30 Vonanidi a veifufuyediga 'adi 'aseta side bani'odi. Mali tomotoga taunidi kebu Diu kebu i da vetafewa 'adi 'ive'atumai Yaubada mataneye faifaina, siwe yadi vetumagana 'wainega Yaubada i 'ive'atumaidi. 31 We'e me Isileli i vetafewa nuanuadi taunidi i na 'ive'atumaidi Yaubada mataneye ve'etoboda 'adi vematayakayaka 'waidiega, nika i vetafewa-wayoga. 32 Kebu i da ve'atumaiga Yaubada mataneye fai kebu ma yadi vetumagana taunidi i da tauyedi Yaubada 'waineye, nuanuadi taunidi yadi folova wata igodi yadi vematayakayaka 'waidiega i da ve'atumai. Tomotoganidi i baila, kebu nuanuadi i na vetumagana Iesu 'waineye begaidi vita i na veluagai. Iesu bani'odi 'unututu vanuga 'eba velu'ui nageneye, tomotoganidi 'wa da vo folovanina i da tayaidi. 33 'Adi 'agetaya wata folovanina, faifaidi basenadiotoga i kilumi Yaubada yana Buki 'waineye. Yaubada i vo,

A na vonemi, yaku 'atamana Saioni 'waineye tamu folova a sisivetovoia, folovanina 'waineye tomotoga i na tayaidi i na be'ube'u.

We'e egavo i na vetumagana folovanina 'waineye kebu i na vetumagana-maimaiga, mogitana 'aivaita i na veluagai.”

  • S33 Ais 8:14, 28:16 1 Fit 2:6,8
Copyright information for `YML