1 John 2

Yesu Kuu Nub Awandi Ye Karub

Ee, ne danaya, yiib yaa kee wongkaan kuu yiib ma ambarak-maib andid. Kumban karub kane ma ambarakmoon kaned kuu, Yesu Keresu kuu Ambe God yaa nub ambarakmi dowad kebengkane koromone inande dakmeen kii, mim yembedmo kuu Yorokmo Ye Karub kowe. Ye kuu nub dowad bobnoon kumbed nub ambarakmi are nonondandi ye kiwaan ongmoon. Kukuu nub dowadmomban, nimakarub korem okad yimin yimin yi dowadiib.

Nub nubkaad, nub kuu Yesumbed kwanime andoon ye weng kuu wengam-bere awine kandanuub kuu, anam ye kuu nubkaadkerenuwen. Kwane, karub kanembed ye kuu nekaad andoon kumban ye weng wengambere awine kandokban keraneen kuu duda-neen, kwane ye kuu anamiibban keraneen. Ma, karub kanembed Yesu ye weng yaa wengambere awine kandaneen kuu, anam kai, God ye mimyob dowaken ye yaa angkeen kuu ibnoon. Kwane keraneen kuu ye niin-dem aom doruub kuu nubkaadkeri yeman. Kwane, karub kanembed ye kuu Yesu ye niindem aom doriin andoka Yesumbed doboroonkin kamok.

Mimyob Dowaken Keendime

Ee, nangkodmia, kwanime ye weng kee kurin yeman andowoon yirimbed kowoon kumbed wongkaan, yeeb yemanban. Kuye weng kuu yiib kwane wengambiriwen. Kumban weng keyiib kee yeweb areb keroon. Kukuu Yesuyiiwa yiiwiiwa yaambed anam id keroon, amborom kuu kumun kuu are weneene nambiri anam kuu ware weneen kowe.

Karub kanembed ne kuu nambiri angka doriin ande kamaneen kumban ye kuristen angkodmi yaa arud wandenembaraneen kuu, ye kuu kumun yiri kwane doreen kii. 10 Ma, kanembed ye kuristen angkodmi yaa mimyob dowaken keendimaan kuu, ye kuu nambiri angka doreen kii. Kwani kowe, ye niindem aom kuu kombiri yemaniibban. 11 Ma, karub kanembed ye kuristen angkodmi yaa arud wandenembaraneen kuu, kumun yiri dorone kumun yiri kwane yareen kii. Kwani kowe, ye kuu yareen kuu ye koron, amborom kuu kumunbed ye indob kuu kebenenoon kowe.

12 Ee, danaya, kerek kee yiib yaa wongkain,
amborom kuu yiib ambarakmi kuu ye aningko yaambed kowene are nonondandoon kowe.
13 Ambeya, kerek kee yiib yaa wong-kain,
amborom kuu andowoon yirim-bed doboroon ye karub kuu yiib yiibkaadkeriwen kowe.
Keweddan, kerek kee yiib yaa wongkain,
amborom kuu yiib kuu miin arewaman burudandune doriwen kowe.
Ee, danaya, yiib yaa wongkain,
amborom kuu Ambe God kuu yiib yiibkaadkeriwen kui.
14 Ambeya, yiib yaa wongkain,
amborom kuu andowoon yirimbed doboroon ye karub kuu yiibkaadkeriwen kui.
Keweddan, yiib yaa wongkain,
amborom kuu yiib kuu arom-konoyiib dobiriiwe, kwane God ye weng kuu yiib aom angkeene, kwane miin arewa-man yaa kuu burudandune doriwen kui.

Okad Yiri Ye Yiribman Yaambed Dowaken Keenaib

15 Okad yiri ye inameniib okad yiri ye barangiib kuyaambed yiib mimyob dowaken kowaib. Kanembed okad yiri ye inamen awene yaa ye mimyob dowaken kowaneen kuu, Ambe God ye mimyob dowaken kuu ye niindem aom angkimbirindo. 16 Kwane, idiib indowiib ye kirim inameniib kereng-kan wengiib, okad yiri ye inamen korem kui, yi kuu okad kirimbed menebeen, Ambe God yaambedban. 17 Okad kiri ye yiribmaniib inameniib kuu dowan kere wananeen kumban, karub kanembed God ye inamen yaa awine ambangkaneen kuu aron korem korem dobaraneen.

Yesu Keresu Ye Bondan

18 Ee, ne danaya, kibireb kee yeen-bon ye aron. Yiib wengambiriwen kuu Keresu ye bonman darewoob kuu mananeen kii. Kedi, kibireb kee bondan yena yemoon menebiwen kii. Kwamune kumbed korokboone nub-kaadkeruwen kuu aron yeenbon kereen. 19 Yi kuu kuristendan nubkan-mo kumbed yaro winiwen, kumban yi kuu nubkanmo mimo anamban. Kuu kwamune kii, yi kuu nubkanmo anam karen, yi kuu nub yoom ibmo doruub karen. Kumban, yi kuu koronde winiwen kumbed korokboon kuu yi korem kuu nubkanmo mimomban keroon kii.

20 Kumban yiib korem yaa kuu Karadkono Ye Karubbed yiib ari oiyo bunemoon areb Kingkin Karadmo kondoone, anam anam kuu yiibkaad-keriwen. 21 Anam anam kuu yiibkaad-ban keriwen andi dowadban wongkani keendaan. Dowan! Anam anam kuu yiibkaadkeriwen kumbed yiib yaa wongkaan. Dudanabi kuu anam anam yaambed minimokban.

22 Kane kuu dudanabi ye karub? Ye kuu kwane yedmimaan, “Yesu kuu Godbed Kinoona Monoonman Keresumban kii.” ande aadikmimaan kii. Kwamunekob, ye kuu Keresu ye bonman kerene God yoom ye Mingki Yesu yoom kuu aadikmendimaan kii. 23 Karub kanembed Mingki wunekara-neen kuu Ambe God yeyiib dobaraan-ban. Ma, karub kanembed Mingki kuu anam yeyiib andaneen kuu Ambe God kwangkon anam yeyiib dobaraneen.

Yesu Ye Niindem Aom Dobirime

24 Weng andowoon yiri kee wengam-biriwen kuu kande yiib niindem aom amuknime. Kwananiib kumbed yiib kuu Ambe God yoom ye Mingki yoom yaa kuu yi niindem aom dobaraniib. 25 Kowe, ye weng kunduk nub yaa kuu kei, wadkeri aron korem korem yeman kondoon.

26 Karub yenambed yiib birandenib kiwaan abdon benwenem ande kamiib ye dowad kumbed yiib yaa kerek kee wongkaan kii. 27 Yiib kuu Kingkin Karadmombed ibnendoonbed kuu dowan kerindo kowe, karub maambed kedmengkandok ande meenaibban. Kwane, Kingkin Karadmombed inamen koremiib kedmengkandaneen kuu anammo kowe, kwamunemo ye niindem aom dobirime.

28 Ee, ne danaya, kibireb kee ye niindem aom doriib kuu kwane dobe-rembirime. Kwananuub kumbed ye mananeen kuu karakiibbaniiwa uniyiibbaniiwa aromkonoyiibbed ye arinambo ari dobaranuub. 29 Yesu kuu yorokmoman ande yiibkaadkeriwen kowe, yiib yiibkaad, kane kane kuu yorokmo kamimaib kuu God ye dana meed kii.

Copyright information for `YON