1 Peter 5

Ongki Weng Kurikuri Aamkono Aamkono Yaa

Keresu komarewa durud yewed kandene bobnoon kuu ne indowiib wedmeni, nambiri dian keraneen yaa daboknaneen ye karub kereni, nangkon kurikuri aamkono keraan kowe, yiib kurikuri aamkono aamkono yaa ongkandi weng yedmandamaan kukei. God ye nimaya karuwa yiibbed ooniibdan yaa sibi keendombere oonidan areb ongme keendombere oonime, yiib yaa yenambed ande dedmoniyiibbedban, yiib dowaken kerundimbed oonime. Kukuu God ye dowaken yiib yaa. Kuye deme ye kakmaniib kandi ye inamen kowe awinaib, awandi ye dowaken darewoob kumbed awinime. Yiib dingki ari kondoondan yaa dedmobende keanime kwanime kami ye korok keraib. Yiib dobiri amuniib weng amuniib kumbed yi yaa inamen amun korokbendime. Kwamaniib kuu Korok Korem Yi Yariman angkadaraneen yaron arimbed korob kerindeban ye kakman nambiriyiib king ye korok ari dereni yeman areb kandaniib.

Ongki Weng Kuristendan Korem Yaa

Keweda koyuya, yiib kangkon aamkono aamkono yi dabderem aom dobirime. Yiib korem kuu yiibkanmo yaa kerengkaniibban kankubune yirimbed dobirime, amborom kuu God Ye Weng aombed yedmoon,

“Godbed kerengkandan yaa manmo kerimaan,
kumban yika kankubune yirimbed dobiridan yaa ye kabamoon kondoon ye mimyob dowaken kondimaan.” andoon.
Kwani kowe, yiibka kankubunenib God ye dingki dabderem aom dobirime. Kwananiib kuu God ye dowaken keroon yaron arimbed benkoobaneen. Ye kuu yiib yaa dowakeniib kerene awandembirimaan kowe, dabab yaa meeni darewoob korem kuu ye dingki ari nongkobime.

Yiibkareb kangkadme keenombirime. Yiib bonman, Seten kuu laiyon arud kabang kameen kumbed nimakarub anandameen areb yarebeen. Yiib anam andi kangdommo doriib kumbed ye yaa manmo kerime, amborom kuu yiib kuristen angkodmia okad yimin yimin yaa doriib kuu yiib durud yewed kandiwen areb kwamune kandiwen kuu yiibkaadkeriwen kowe.

10 Kabamoon kondoon ye mimyob dowaken korem ye God, Yesu yaambed dowan kerindeban ye nambiri dabokni dowad yiib yaa baande kinoon ye God kui, yiib durud yewed kandiiwe kibikbed nare ari aron dukmen keraneen kuu yembed yiib yaa demkoronmo ongmene anam andi kangdommoyiib aromkonoyiib kiringmindeban ye anam andiyiib kondaneen. 11 Ye yaa ooni ye aromkono aron korem korem kerok. Anam kwanok.

Kubendi Weng

12 Ma korondiyiibban ye kuristen angkodmi Sailas, kuu kwamunemo wedmenaan kui, ye kuu awawoonkob kerek dukmen kee yiib yaa wongkane keendaan. Yiib yaa kube ongkandeni weng keyaambed Godbed kabamoon kondoon ye mimyob dowaken anam kuu korokbendaan. Keyaa kangdommo kere dobirime. 13 Yiib ibmo kinoondan Babilon aom doriib kumbed kubendi weng yiib yaa keendiib kii. Ne dana Maak kangkon kwamune keendoon. 14 Yiibkanmo yaa mimyob dowakeniibbed kubenoon kubenoon kamime.

Keresu yaa ibmo dabokne doriibdan, yiib korem yaa yewenubmo dobiriyiib kerundok.

Copyright information for `YON