Acts 2

Kingkin Karadmo Monoon

Pentikos
2:1 Pentikos kuu Yuudan yi Burudandoon yaronbed wene aron 50yiib dowan keruune, Yuudan yob ibduruk wandiiwe God yaa eso andiiwe kami ye orok.
yaron keruune, anam andiwendan korem mene mimyamo nedbiwen.
Kwane yi korem ambiwoom dibiiwe, kudmeniibban kumbed nuub darewoob ye kuweng areb kuu ambid arimbed kamene ambib kumundin aom yukne daanoon. Kwanoone, yi wedmiiwa amot yumbu areb andokbe mimim kere yi korem ari denobe dangoon. Kwane, Kingkin Karadmombed korem ibnendene, aromkono konde weng maa maa bangkandenaboon kuu kwane dakmenabiwen.

Yuudanbed yi God ye weng wengambiriwendan kuu ambibkin korem yaambed menebe Yerusalem aom Pentikos ye orok ye dowad araben doriib. Dakmenabi ye kuweng wengamberekoriwa, karub yemoon kerebkarab kamenmo menenib wengambiriwen, amborom kuu weng maa maa yi wengbed dakmenaib kowe wengambiriwen.

Binangki miin darewiib kowe, kaamobiwen, “Ai, kee komarewa kamiib kee? Karub kee Galelidanmo kii! Komarewa nub weng anammo kee dakmiibkob kwane wengamburuub kee?

“Nub kuu Paatiadaniib Midiadaniib Ilamdaniib Mesopotemiadaniib Yudeadaniib Kapadosiadaniib Pontusdaniib Esiadaniib 10 Firigiadaniib Pamfiliadaniib Idyipdaniib Libiadan Sairin taun dia angkarayiib Rom ye Yuudaniib Rom ye Yuu keriwendaniib 11 Kuritdaniib Arabdaniib kui. Kwene nub wengamburuuwa, God ye kami yeka mamaa ye weng nub wengbed dakmiiwa wengamburuwen kii!” andiwen. 12 “Keye id kee komarewa?” andimame binangke kerebkarab kamiwen.

13 Kumban karub yenambed anam andiwendan yaa ambon kamende yedmiwen, “Wain ok darewoob ane awarakiib yoonkob dakmiib.” ande daandiwen.

Pitambed Kadaareb Yaa Dakmoon

14 Kwanandiiwe, apasodan 11 yoom Pita yoom yaro dembeniwa, Pitambed kadaareb yaa kankoone daandoon, “Ee ne ambibkindaniiwa yena Yerusalem aom doriibdaniiwa yee. Yiib ongme wengambiribko dakma. 15 Kibireb kee amkimo aron kuu mogeed yaro dibuun kowe, karub kee yi wain ok ane awarak yindo. 16 Dowan! Kukei, profesiman Yoelbed daande wongkoon kuu, Godbed yedmoon,

17 ‘Aron yeenbon kere wananuun yaron kumbed,
ne Kingkin Karadmo nimakarub korem yaa kowaniina mananeen.
Yiib kewediib koyuyiib kuu ne profesi weng dakmenabaniib.
Kwane yiib kewed kuu ne weng yuk wane wedmenabaniib.
Yiib aamkono kuu ne weng yuk kiyuum wedmenabaniib.
18 Kuyaron keranuun kuu ne deme karuwa nimaya yaa
angkon ne Kingkin Karadmo kondaniina ne profesi weng dakmenabaniib.
19 Ambid ari kuu yeka mamaa ye wedme binangki yeman kedmengkandaniin.
Okad yiri kwangkon dud korokbenabaniin,
umkaniib amoyiib amarengiib kui.
20 Aron kuu kumbaneene kumun keranuun.
Wood kuu umkan areb keranuun.
Kwananeen kuye yoman kuu aningko arimbed darewoowiib nambiri darewoowiib Yariman mini yaron keraneen.
21 Kwananeena, nimakarub korem kane kane Yariman yaa anam ande baandaniib kuu
bobni yaa kuu burudande bindaneen.’ ande wongkoon.
22 “Israel karuwa nimaya kee wengambirime. Yesu Nasaretmanbed God yaromkono wedmi yemaniib yeka mamaa ye wedme binangki yemaniib dud korokbiyiib kamenaboon kuu Godbed yiib yaa korokbendoon, yiib wedme anam andi yeman. Yiib wedme yiibkaadkeriwen kui. 23 Yesu kee God ye inamen dowaken unyemanbed ongmoon yaambed yiib yaa kondoone, yiib yoom miin arewadan yoombed aye at ming ari bakumbed daare kankoone maniiwe bobnoon. 24 Kumban Godbed ye bobni durud yewed wankende bobnoon yiri kuu nenkoonoone demboon, amborom kuu bobnimbed ye awineni kuu yiminban kowe. 25 Kee Dewidbed ye dowad kwane daandoon,

‘Yarimandin ne yoman winimo kamuub wedmaan.
Ne kuu ma une kiringmainban,
amborom kuu Godbed ne yaa ibnoon kowe.
26 Kwani kowe, ne niindem aom kuu kubiyiib kere
kwangkon kubi weng dakmimameni
God ye weng kunduk meedme doriin,
27 amborom kuu God, ebbed ne kingkin kuu bobkonombon yiri domowaabban,
angkon eb Karadkonoman bobkonombon yiri domonaawa deendaanban kowe.
28 Ebbed wadkeri kiwaan kuu korokbeweewa nekaadkeraan,
angkon eb kerebiri ari dobaraniin kuu,
kubi darewoob kawaneeb.’ andoon.
29 “Angkodmia, weng kangdommo awinaan kuu nub awo Dewid bobnoona mangkiwen, kumbedmo. Kuye aron yaambed mene kibik aron kee ye bobkonombon kuu kangkeen yayaa kui. 30 Ye kuu profesiman kowe, God Ye Weng kundukbed amob ongmoon kuu ‘ye yobbed ye ooni ye yumbon ari kuu ye awo aman arimbed kandaneen’ kuu yekaadkeroon. 31 Ye kuu aman ari wedme yedmoon ye id kuu Godbed Kinoona Monoonman Keresu anam bobnekore ika dembaneen kowe, dakmoon ye id kuu Yesu ye id kuu kuri domonoona deendindo.

32 “Kowe, Yesu kekei Godbed nenkoone wadkeri konoon kowe, nub kuu anam nub indowiib wedmuuwe kwanoon. 33 Kwanoone, Yesu kuu Yambe Godbed yaningko kankoone ye dingki wiwi angka nenkowene, God ye weng kunduk kumbed Kingkin Karadmo konoon. Konoone, Yesumbed nub yaa kangkon keendoone ibnendoone kwane dakmuuwe, yiib kuu wedme wengambiriib kui. 34 Dewid kuu Ewen ari daanindo, kumban kee Yesu ye dowad dakmoon,

‘Yariman Godbed ne Yariman yaa yedmoon,
“Ne dingki wiwi yaa dibereewa,
35 eb bondan kumbed
eb yon yiidki yeman ongmaniin.” ’ andoon.
36 “Kwanikob Israeldan korem, yiib kuu yiibkaadkerime. Yesu kee yiibbed aye at ming ari dingki dare maniwen kuu, Godbed ongme kowoone ye kuu Yariman angkon Godbed Kinoona Monoonman Keresu keroon.” andoon.

37 Nimakarub weng kee wengambiriwen kuu yi mimyob aomiib wande wonoon kowe, Pita yoom apasodan yena yoom yaa yedmiwen, “Angkodmia, nub komo kamanuub?” andiiwe 38 Pitambed inande yedmoon, “Yiib mimim korem ambarakmi yaambed amonombe Yesu Keresu yaa anam andibko, yiib ambarakmi are nonondandoko yaningko yaambed baptais kerime. Kwanibko, Kingkin Karadmo kuu Godbed yiib yaa munob kondaneen. 39 Weng kunduk kee yiib yoom yiib danaya yoom nimakarub yena ambab dobere weniib yoom yi dowad kui. Kane kane nub Yariman Godbed baandaneendaniib yi dowad kui.” andoon.

40 Andekore, weng yemoon ongkande nangkande dakmoon, “Yiibka amonombe miin arewadan kibikee doriib kee yi kami ye kakman yaa korondime.” ande daandoon. 41 Wengambere anam ande awine kandiwendan kuu baptais kerundiwen, kuu 3,000iib areb mene anam andiwendan yaa dabokniwen, aron kuyaa kuu.

Anam Andidan Yi Dobiri

42 Anam ande dabokniwendan kuu apasodan yi kedmengkandi wengambere doberenib, kurikuri kere doberenib, mene dabokne yonendenib, Yesu yaa meeni ye orok animaib. 43 Apasodanbed yeka mamaa ye wedme binangki yemaniib yeka mamaa ye dud kamiyiib korokbendimaib kuu yi korem wedmekoriwa, binangke God yaningko kankooniwen.

44 Anam andidan korem nedbimaib, angkon yi yiribman korem kuu ibmo neman konoona awinoon awinoon kame dobiriwen. 45 Kwane yi yiribman yena kuu berengkanekorib, od kuu kane yiribmaniibban keroon kuu numbere kondimaib.

46 Yi korem kuu menenib, kurikuri boyambib darewoob kuuk aombed aron korem kuu mene nedbenib, kubi dowakeniibbed animan numbere yi ambiwoom nedbe anenib, 47 God yaningko kankoonenib kubiwen. Kwane, nimakarub korem kuu anam andiwendan yaa kubi dowaken keriwen. Aron korem kuu Yarimanbed nimakarub yewewiib bobni yaa kuu burudande bindene yi yaa daboknaane, yemoon kerimo kamiwen.

Copyright information for `YON