James 2

Yena Yaa Manmo Keri Ye Inamen Ambangkaib

Nangkodmia, yiib kwane nub Yariman Yesu Keresu nambiriyiib doreen yaa anam andiwen kowe, yena yaa manmo keri ye inamen ambangkaib. Kwamune, karub maa gold ye dingki kandingiib deebe ebkad amunmombed inwaraneen kumbed yiib kurikuri wengbon aom meneena, kamboknon ye karub ebkad korobmo deeboon kangkon mananeen kuu, ebkad amun inwaroon ye karub kuyaamo kubenenib yedmenaniib, “Eb mene dibiri yeman amun karimbed dibere.” andaniib kumban, kamboknon karub yaa no yedmaniib, “Yakuyaa dobere.” o “Ne yon dad yirimbed dibere.” andaniib kuu, yiib kuu inamen arewa yaambed andokbe karub yena ben ari keriiwa karub yena ben yiri kiribe keriib kii! Kukuu amunoo? Dowan!

Mimyob dowaken keendimain ye angkodmia, wengambirime. Okad yiridanbed kane kane yaa kamboknon andimaib ye karuwa nimaya kuu, Godbed kinoona yi anam andi yaa yiminmo kerekoriwa, oonimbon aom mimyob dowaken keendoondan yi yumbon yeka ye weng kunduk kowoon kuu kandaniib. Eeyoo? Kumban yiib kuu kamboknondan yaa weng arewambed damangkandiwen. Ma, yiribman yemoondanbed yiib yaa deme darewoob bangkandimaib kumban od embeng kondimaib dee? Yimbed yiib awingke wengyundi dowad kangdod korok yaa be winimaib dee? Yiib Yariman yaningko amun kuu yimbed wengamborokbanabimaib dee? Korem kee kwamunemo kamimaib kuda.

Kuned, God Ye Weng Karadmo aombed nub King ye amob ye wengbed yedmoon kuu “Ebka ebmeren yaa mimyob dowaken kowimaab areb kuu, eb dia doriibdan yaa kwangkon kwane mimyob dowakenbed keende.” andoon. Kuye weng kuu yiibbed anammo awinaniib kuu, yiib kuu yiminmo kamaniib. Kumban yiib kuu yena yaa manmo keri ye inamen kwane ambangkaniib kuu ambarakmaniiwe amobbed yiib kuu amob domangkidan ande korokbendaneen. 10 Kwane, karub kanembed God ye amob korem kuu oonoon kumban mimo domokbaneen kuu, ambarakme amob korem domangkoon ye karub keroon. 11 Kedi, Godbed yedmoon, “Nenem kamaab.” andoon. Kumban ye kangkon yedmoon kuu, “Kumka o kuman ayaab.” andoon. Kowe, yiib kuu nenem kamimokban kumban kumka kuman ayiwen kuu yiib kuu God ye amob domangkidan keriwen.

12 Yiib kuu ambarakmi ye wii kanangka kowimaan ye amobbed wengyundaneen kuyaa meenmiib kumbed, kwamunemo dakmenib kwamunemo kamime. 13 Amborom kuu kane kanembed ambarakmidan yaa mimyob keende kakman are nonondandaanban kuu, Godbed yi yaa mimyob keende kakman are nonondandiyiibbanbed wengyundaneen. Mimyob keende kakman are nonondandi kuu wengyundi burudande ari keroon ye inamen kii.

Anam Andiyiib Amun Amun Kamiyiib

14 Nangkodmia, karub kanembed Yesu yaa anam andaan ande yedmimaan kumban amun amun kamimokban kuu idiib dee? Anam andi keyaambed Godbed bindaneen dee? Dowan! 15 Kwamune, kuristen angkodmi maa wonong o karub kuu ebkadiibban animaniibban keraneen kuu 16 yiib kuyaombed karub maambed ye yaa yedmaneen, “Wene, amunmo doborok, ebkadiib animaniib kerok.” andaneen kumban, komo dowan keroon yaa ma awanenaanban kuu idiib dee? Dowan! 17 Kwamune areb kuu amun amun kamiyiibban ye anam andi kuu anamban, bobnemoon areb.

18 Kumban karub maambed yedmaneen, “Karub maa ye no wengbed anam andi kumbed yimin, maa ye amun amun kamiyiib ye anam andi kangkon yimin.” andaneen kuu amunban. Ye amun amun kamiyiibban ye anam andi kuu korokbewok, yiminbanaa! Ne kuu ne kamiyiib kumbed ne anam andi korokbena. 19 No wengbed ye kuu anam andoon kuu God mimo, maayiibban. Kuu amun kumban, awad arewa kwamune yikaad kumbed kiringmenabiyiib unimaib.

20 Inameniibbanman, eb dowaken kuu amun amun kamiyiibban ye anam andi kuu idiibban kuu korokbewok andewed dee? 21 Nub awo amaan yiri Abraham kuu nengke God yaa baeb koni dowad bot wenorene ye dana Aisek kande kan kwari kowoon kumbed Godbed ye yaa yorokmoman ande meenoon dee? Anamaa. 22 Kudi, wedmeewoo? Ye anam andiyiib ye amun amun kamiyiib ibmo daboknoon kumbed kwanoon. Ye komo kamoon kumbed ye anam andi kuu yiminmo keroon. 23 Kwane, God Ye Weng Karadmo aombed yedmoon, “Abraham kuu Godbed komo dakmoon yaa anam andoon kowe, Godbed ye yaa yorokmoman ande kowoon.” andoon kuu anam id keroone, ye kuu God ye angkodmi andimaib. 24 Nimakarub kuu yi anam andimo kumbed God yaa yimin keraanban, amun amun kamiyiib dabokniwed yimin keraniib kedi.

25 Kwamune areb kuu kiwaan ari wonong Rehab kwangkon, yu kuu Yuudan yi darobidan angkodmendenu kiwaan kimyen ari nongkobeen kumbed Godbed yu yaa yorokmo ye wonong ande meenoon dee? Anamaa. 26 Karub id kuu kingkiniibban angkeen kuu bobnoon kwamune areb kuu, anam andi kuu amun amun kamiyiibban kuu idiibban, bobnemoon areb.

Copyright information for `YON