Psalms 103

Yook 103

Dewid ye yook.

O ne kingkin, Yariman yaningko kankoona,
ne niindem aom kumundiniib ye aningko karadmo kankoona.
O ne kingkin, Yariman yaningko kankoona,
ne yaa awawi ye kerekmen yaa ma nonondandain.
Ye kuu ne ambarakmi korem are nonondandene
ne bob anikad maa maa korem kuu ongmewimaan.
Kwane ye kuu ne bobneni bobkonombon aom angkimbarain andi ye dowad biddene,
womoniyiibban ye mimyob dowakeniib mimyob keewe kakman are nonondandiyiib keewimaan.
Kwane ye kuu ne inamen dowaken yaa yiminmo amunmo keruwimaan,
kowe on diba yaromkono areb ne yaa kuu kewed yaromkono dobiri kerekmen ika kawaane kwane dobirimain.
 Yarimanbed yorokmo ambangkimaan,
kwane yembed dabab wayiroondan yi dowad anammo wengyundimaan.
Yembed ye dobiri kerekmen kuu Moses yaa korokbenoon,
kwane ye kamenabi kuu Israeldan yaa korokbendoon.
 Yariman kuu mimyob kowi ye God, kabamoon kondoon ye mimyob dowaken keendi ye God,
ye kuu kirodmo norin wandimokban, ye kuu mimyob dowaken darewoob keendi ye God.
Ye kuu nub yaa manmo kerundembaraanban,
kwane ye norin kuu kwane kowe awinembaraanban.
10 Ye kuu nubbed komo ambarakmuwen ye dabab yaambed ukum kondindo,
kwane ye kuu nubbed komo arewa kamenabuwen ye kakman yaambed inandindo.
11 Amborom kuu okadbed ari daane Ewen nandi ye ambab kumunkingki kwamune areb kuu,
ye womoniyiibban ye mimyob dowaken kuu miin darewoob, ye yaa unimaibdan yaa.
12 Aron dembimaun angkambed wene aron kubunimaun angka keri ye ambab kwamune areb kuu,
yembed nub ambarakmi kuu nub yaambed ben ambab angka kiradmoon.
13 Awodkimbed dana meed yaa mimyob kowimaan kwamune areb kuu,
 Yarimanbed ye yaa unimaibdan yaa kangkon mimyob kowimaan.
14 Amborom kuu nub kuu komombed ongmenaboon kuu yekaad,
nub kuu okad yiridanmo kangkon yekaad kowe.
15 Nimakarub kuu kekei, yi dobiri yaron kuu kereek areb aron dukmenmo.
Yi kuu kainekorib kirodmo kiomne duknaniib, yi kuu dura angka ye nong wuung areb,
16 nuubbed mene wuure araane kokne dowan keremoon areb kii,
kwane nong wuung demboon ye okad kuu nong wuung koknoon yaa ma meenimokban.
17 Kumban aron korem anuk doboroonbed mene aron korem ambab ari dobaraneen kumaom kuu
 Yariman ye womoniyiibban ye mimyob dowaken kuu
ye yaa unimaibdan yaa angkimbirimaan.
Kwane ye yorokmo kerekmen kangkon yi awoya ari yaa angkimbirimaan,
18 kane kanembed amob weng yembed ongmoon kuu awinenib
ye kongamki yamob kuyaa meene awinaniib kuu kuye mimyob dowaken kuu yi yaa kwane angkimbaraneen kui.
19  Yarimanbed ye dibere oonimbon kuu Ewen arimbed nowoon,
kwane ye oonimbon aom kuu kumkam koremiib.
20  Yariman ye engyus, yiib kuu ye aningko kankoonime,
aromkonodan kuu ye kwanime andi ye weng awine kwanimaib,
ye weng awine kandimaibdan kui, yiib kuu ye aningko kankoonime.
21  Yariman ye ana nangmidan Ewen ari doriib korem, ye aningko kankoonime,
ye demedan kuu ye dowaken yaambed kwane ambangkimaib kui, yiib kuu ye aningko kankoonime.
22  Yarimanbed komo komo ongmenaboon ye kumkam, yiib kuu ye aningko kankoonime,
ye oonimbon aom doriibdan kui, ye aningko kankoonime.
O ne kingkin, Yariman yaningko kankoona.
Copyright information for `YON