Psalms 105

Yook 105

 Yariman yaa eso andime, ye aningko yaambed koromone dore baandime.
Yembed komo komo kamenaboon kuu ambibkin mimimdan yaa daandime.
Ye yaa yook wingkime, ye aningko kankooni yook wingkime.
Binangke ye yaa anam andi yeman ongmenaboon korem kuu dakmime.
Ye aningko karadmo yaa kubi darewoob kerime.
 Yariman ande onmiibdan, yiib niindem aom kuu kubime.
 Yariman ande onmenib ye aromkono nub yaa kondok andime.
Ye yaa kurikuri kere ye aningko kankoonembirime.
Binangke ye yaa anam andi yeman ongmenaboon kuyaa kuu ika meenime,
kami yeka mamaayiib wengyundi wengiib kuyaa kangkon ika meenime.
O ye dememan Abraham ye awoya ari,
o Yekob ye meed, Godbed kinoondan kui,
ye kuu Yariman nub God,
ye wengyundi weng kuu okaddan korem yaa angkimbaraneen.
Yi dowad amob weng ongmoon kuyaa aron korem meenimaan, nonondandaanban,
Yembed kwamime andi ye weng yedme kowoon kuyaa meenaneen,
nimakarub yaro dobere dobere yaro wananiib 1,000iib yaron doboob kuu,
Abraham yaa yedme kowoon ye amob weng kui,
Aisek yaa kangkon yedme kowoon ye amob weng kui.
10 Amaanbed kuye amob weng kuu Yekob yaa ee awinem ande yedmoon,
Israel yaa amob weng kee aron korem yeman ande yedmoon kukei,
11 “Eb yaa Keenan ambibkin kee nembed kabdaniin,
kowe eb ambibkin keranuun.” andoon.
12 Kumban Yekob awene kuu yemoonban,
yi kuu yemoonban anam, yi kuu ambibkin kumaom doriib kangkon noroddan.
13 Yi kuu kwane ambibkin maa kere ambibkin maa kere awerenmo yariwen,
oonimbon maa kere oonimbon maa kere yariwen kui.
14 God kuu yi yaa karub yenambed dabab wayiraib ande kebenoon,
kwane yi dowad king yena ongkande yedmoon,
15 “Nembed yi ari oiyo bune kinaandan kee angkorondaib,
ne profesidan keyaa ma arewa kamendaib.” andoon.
16 Kwane yembed Keenan ambibkin kuyaa am yongkonbi kondoone
yi kuu animaniibban keriwen.
17 Kwane karub maa kankowoona yedin wonoon,
kukuu Yosef, ye kuu ye ayiyambed kan mooniwen, dabderem yiri dobere dememo awinembiri ye karub keri dowad.
18 Nenwiniwendanbed ye yon kuu seinbed borokiwen kumbed kubungkabawiib keroone,
ye kongkono yaa kangkon seinbed borokiwen.
19 Kwane doboroonkob wene yembed komarewa keraneen ande dakmoon kuu anam id keroon,
 Yarimanbed ye yaa daanoon ye weng kuu anam id keroon kui.
20 Kwane wii aom doreen kuu Idyipdan yi kingbed nen bunangka kowoon,
ambibkin maa maa oonoonmanbed nen bunangka kowoone obon keroon kui.
21 Kwane kingbed ye kuu nen kowoona ambiwoom doriibdan korem yi korok keroon,
kingbed ye kuu nen kowoona king ye yiribman korem oonoon kui.
22 Kwane deme konoona ye dowaken yaambed king ye dana meed kedmengkandene,
king ye korok korok yaa meeni kangdom kuu kedmengkandoon.
23 Amaanbed Israel awene kuu Idyip aom awudiriwen,
Yekob ye nimadana yoom kuu Hem okad yiri winiwen kui.
24  Yarimanbed ye nimakarub kuu dana yemoon bangkandoona muubniwen,
yi kuu ongmendoona yemoonmo keriwen, Idyipdanbed yi yaa bon keriwendan arebban.
25 Bondan kuu yembed ongmendoona ye nimakarub yaa arud wandembirimaib,
bondanbed ye demedan yaa wunonwanon kamiwen kui.
26 Kwane yembed karub ayoob ben yuroon,
ye dememan Moses yoom kinoonman Eeron yoom kui.
27 Yi kuu binangke God yaa anam andi yeman ongmenabiwen Idyip aombed,
kami yeka mamaa kuu Hem okad aom ongmenabiwen kui.
28 Yembed Idyip ambibkin aom kuu kumunmo kerok ande yedme kowoona kumunmo keroon,
kumban Idyipdan kuu ye weng yaa wabkad keriwen.
29 Yembed yi ok kuu kan amonombe umkan keroone,
okyiri oon korem kuu dukniwen.
30 Idyipdan yi ambibkin aom kuu kod muubniiwe,
yena kuu korok korok yi wadnari angkimbon aom awudiriwen.
31 Yembed yedme kowoona wadmung nimingkiwen yemoon menebiiwe
kimiring menebe ambibkin kumundin aom muubniwen.
32 Yembed ongmoona ambibkin kumundin aom kuu
am boyareb yurukmo kiroboone imakiib kamenaboon.
33 Yembed Idyipdan yi nong yob yongboniib yedob ayiib monmarene
yi ambibkin ye at korem kuu monmaroone kurubkurub keriwen.
34 Yembed ed yedme kowoona menebiwen,
yi kimingki kuu yiminban.
35 Kwane yimbed nong biid at biidiib mongkobon kawiib korem kuu
anenib dowan korodkabmo kere winiwen.
36 Kwane yembed Idyipdan yi meed wonob dana korem kuu yenbande nongkoboon,
kaine amni ye aromkono ibduruk korokbi yeman kuu dukniwen kui.
37 Kwanekore Israeldan kuu bin yaro angkane wonoon, yi kuu bot silvaayiib bot goldiib yemoon ben winiwen,
kwane yi amyenimbon korem aom kuu karub maa ma komborok andindo.
38 Kwane Israeldan winiiwe Idyipdan kuu kubiwen,
amborom kuu Israeldan yaa uniwen kowe.
39 Godbed wiib kandune aron ye nimin kebeni yeman yi ari kowene
amnoom kuu amot yumbuyiib yi ari kondimaan.
40 Yimbed kaamoniiwe yembed on yaningko kweil benmonoon,
kwane Ewen ari ye om animan bangkandoone ane mikmoniwen.
41 Yembed bod dumnad yaambed ok nandaana menebimaun,
kwane ok kuu ok awaan areb kere okad koknoon angka wenebimaun.
42 Godbed kwamoon amborom kuu ye weng kunduk karadmo yaa ika meenoon kowe,
ye dememan Abraham yaa konoon kui.
43 Kwane, yembed ye nimakarub kuu amboon aombed ben kubiyiibbed angkadoroon,
yembed kinoondan kuu kube baandiyiib ben angkadoroon kui.
44 Kwane, yi yaa kuu ambibkin yenadan yi okad kondoon,
kowe yi kuu yenambed deme yobdoodiib ambangkiwen ye kumkam ben ooniiwe yiman keroon.
45 Kwanoon kuu yembed wongkoon yamob awine kandime andene
ye amob ben kongamkime anded.
 Yariman yaningko kankoonime!
Copyright information for `YON