Psalms 106

Yook 106

1 Yariman yaningko kankoonime!
 Yariman kuu amunmo kowe, ye yaa eso andem,
amborom kuu ye womoniyiibban ye mimyob dowaken kuu aron korem angkimbaraneen kowe.
2 Yariman ye kamenabi aromkonoyiib kuu kanembed dakme yimin keraneen?
Ma, ye aningko kankooni ye weng korem kuu kanembed dakmaneen?
3Anammo wengyundimaibdan kuu amun kerundoon,
yorokmo dobirimaibdan kangkon amun kerundoon kii.
4O Yariman, eb nimakarub yaa kubi dowaken keendaneeb kuu ne yaa kangkon ika meene.
Ebbed yi kuu arewa yaa burudande bindaneeb kuu ne yaa kangkon awawe.
5Kwananeeb kuu kinewendan yiminmo dobaraniib kuu neyiib keraniin,
kwananeeb kuu eb ambibkindan kubaniib kuu neyiib keraniin kii,
kwananeeb kuu yumbon kondewendan ewaningko kankoonaniib kuu neyiib keraniin kii.
6Nub kuu nub awoya yiri areb ambarakmuwen,
kwane nub kuu wabkad kerenub miin arewa kamenabuwen.
7Nub awoya yiri kuu Idyip aom dobiriwen kuu
binangke eb yaa anam andi yeman ongmenabewen kuyaa kuu ma meenindo.
Eb amun amun kamenabi yemoon yi yaa kamewen kuu ika meenindo keriwen,
kwane yi kuu karamok Dodmo yaambed wabkad keriwen.
8Kumban yembed yi kuu arewa yaa burudande bindoon, ye yirin kowi ye dowad.
Ye aromkono darewoob korokbi dowad kwanoon.
9Yembed karamok Dodmo yaa ongkandoone keekne bid kamkono kereen,
kwane karamok kuu domokbe angkara angkara keroon kowe yembed yi kuu wedyiri bid koknoon ari ben kinban yanoon.
10Kowe yembed yi yaa arud wandemboroonman yaa kuu burudande bindoon,
kwane yembed yi bondan yi dingki dem aom kuu bidde ben angka nongkoboon.
11Kwane yi bondan kuu karamokbed yeene yukneen,
karub mimo ma ok ambe bid dorindo.
12Kwanoon kumbed yi kuu ye weng kunduk yaa anam andenib
ye aningko kankooni yook wingkiwen.
13Kumban yembed komo kamoon yaa kuu yi kuu kirodmo nonondandiwen,
kwane ye dowaken kuu kuna ande kaamonindo, yika inamen ongmenib kwane ambangkiwen.
14Kwane, Idyip ye animan yaa moommo kerenib,
amboon angka God yaa komboon kaamobiwen.
15Kowe yimbed komo kaamoniwen kuu kondoon kumban,
kwane kuyoom kuu bob anikad arewayiib kan kondoon.
16Yi kuu ambib kombon yenbiwenbon aombed Mosesiib
 Yariman ye kurikuri dememo awini ye karub Eeroniib yaa wungkandiwen.
17Kowe okad kuu andokbe mongkod daadenu Detan kuu kan anukmuneen,
kwane okadbed Abiram yoom ye yoman winiwendan yoom kuu ben mangkanabeen.
18Yi yoman winiwendan kuu amotbed denoboon,
amot yumbumbed arewa kamidan kee dene kubunoon kui.
19Yimbed aangko Sainai angkambed buromakau mana ye kuruwak ongmiwen,
kwane kuye dudi god ye kuruwak bot goldbed ongmiwen kuyaa kurikuri keriwen.
20Kowe yi kuu Nambiriyiib Ye God yaa korondenib,
buromakau ambi ye kuruwak yaa kurikuri kame kubiwen,
kukuu kereek animaan ye dingkanmo kuda.
21Godbed yi kuu arewa yaa burudande bindoon kuned,
yi kuu ye yaa nonondandiwen.
Ye kuu Idyip yirimbed ambangkanabi dareb dareb ongmenaboonman,

22ye kuu Hem okad aombed kami yeka mama ongmenaboonman,
ye kuu karamok Dodmo yaambed binangke ye yaa anam andi yeman ongmenaboonman kuned ye yaa nonondandiwen.
23Kowe Godbed yi kuu monmaraniin ande yedmoon kumban,
yembed kinoonman Mosesbed yaro God dore yi dore wedyiri doberene
God ye norinbed yi kuu monmaradamoon kuu kebenande kamoon.
24Amaanbed yi kuu okad amun kuyaa korondenib
ye weng kunduk kuyaa anamban andiwen.
25Yi kuu yi ambib kombon aombed mungkubmangkab kamiwen,
kwane Yariman ye weng kuu awine kandindo, korondiwen.
26Kowe yembed ye dingki kankoone weng kamkono yedme kowoon kuu
yi kuu amboon angkambed duknaniib kumbedmo andoon.
27Weng ari yedme kowoon kuu yembed yi awoya ari ben buyokbayok kamaneena ambibkin yena angka dobaraniib,
bidambib maa maa kuyaa boketawaraneene dobaraniib kui andoon.
28Yi kuu dudi god maa Baal Peor yaa daboknenib,
wadkeriyiibban ye dudi god yaa munob koni ye animan aniwen.
29Yimbed kwane arewa kamenabiwen kumbed Yarimanbed yi yaa norin wandoone,
bob anikad miin arewa kuu kan dembe yenbandoon.
30Kumban Finehasbed yaro dorene ambarakmoonman kuu kan wengyundene ukum kerunoona,
kuyaambed bob anikad arewa kee Godbed kondoon kuu kebenoon.
31Kwane Godbed Finehas yaa karub yorokmo ande yedmoon,
kwane kuye weng kuu nimakarub yaro dobere dobere yaro wananiib korem aom kwane angkimbaraneen.
32Aron maa Israeldanbed ok Meriba yaambed arewa kamiiwe Yarimanbed arud wandoon,
kwane yi arewa kami kumbed dabab kuu Moses yaa monoon,
33amborom kuu yi kuu God ye Kingkin yaa wabkad keriwen kowe,
Mosesbed yi yaa kenambunmo dakmoon.
34 Yarimanbed yi yaa yedme kowoon kuu Keenan ambibkin aom doriibdan korem yeene nongkobime andoon kumban,
koremban yenamo yenbandiwen.
35Kwane, yi kuu Keenan ambibkin aom doriibdan yaa kan dabokenib,
yi amowamob yaa awine kandenib,
36yi kuruwak god yaa kurikuri kame yi aningko kankooniwen kowe,
kuye kuruwak god kuu Israeldan yaa kawaad nong awinemoon areb kerundoon.
37Israeldanbed yi karub danayiib nima danayiib kuu
yeene kuruwak god, awad arewa kui, yi dingki aom nongkobiwen.
38Yimbed ambarakmindodan ogood yenbandiiwe umkan kubudoroon,
yi karub danayiib nima danayiib yi umkan kui.
Yimbed yeene Keenandan yi kuruwak god yi dingki aom nongkobiwen kowe,
ambibkin kuu umkan kubudoroon kumbed Godbed yi yaa angkurom korokbendi yeman keroon.
39Yimbed kwane kamiwen kumbed yi kangkon Godbed angkurom korokbendi yeman keriwen,
yi arewa kamenabi yaambed yi kuu nenemdan areb keriwen.
40Kwana kowe, Yariman ye norin kuu ye nimakarub yaa denoboon,
yumbon kondoondan yaa kuu komyeng areb kerundoon kui.
41Kowe yembed yi kuu ben ambibkin yenadan yi dingki ari nongkoboon kowe,
yi yaa kuu arud wandembiridanbed ooniwen.
42Yi yaa kuu yi bondanbed dabab dabab yobdoodmo bangkandiwen,
kwane yi kuu yi bondan yi dabderem yirimbed doriib.
43Yembed yi kuu aron yemoonmombed arewa yaa burudande bindimaan,
kumban yi kuu wabkad kamembirimaib kowe,
ambarakmi dem kongdem yiri kubunimaib.
44Kwanimaib kumban ye yaa baandiiwe wengamboroon kuu
yembed yi miin yiminban keriwen kuyaa wedmendoon.
45Kwane amob weng ongmoon kuyaa kuu yi dowad ika meenekore,
ye womoniyibban ye mimyob dowaken darewoob yaambed yi yaa ukum kondi kuu korondoon.
46Kwane yembed yi bondan kuu ongmendoona yi bondan kuu yi yaa mimyob kowimaib,
kane kanembed Israeldan awingkiwendan kui.
47O Yariman nub God, nub kuu arewa yaa burudande binde.
Nub kuu ambibkin maa maa kumaom doruub kuu ben menebe.
Kwananeeb kuu ewaningko karadmo yaa eso andenub,
ewaningko kankoone kubi darewoob keranuub.
48 Yariman, Israeldan yi God, ye aningko kankoonem,
aron korem anuk doberewenbed mene aron korem ambab ari dobaraneeb kumaom kuu kwane kamem.
Nimakarub korem kuu yedmime, “Anam kwanok.” andime.
 Yariman yaningko kankoonime.
Copyright information for `YON