Psalms 107

Buk Angko

Yook 107-150

Yook 107

 Yariman kuu amun kowe, ye yaa eso andem,
amborom kuu ye womoniyiibban ye mimyob dowaken kuu aron korem angkimbaraneen kowe.
Ku yedmaan kuu Yarimanbed biddoondan kuu kwane yedmime,
bondan yi dingki dem aombed biddoondan kui.
Okad maa maa yaambed benmonoondan kui,
kangkayiib kaomiib kariyiib kiriyiib yaambed benmonoondan kui.
Yena kuu amiibban ye amboon angka awerenmo yariwen,
kwane siti yaa wini ye kiwaan onmiwen kuned ma wedmindo.
Yi kuu mungiyiib ok moomiib kumbed
duknok andiwen.
Kwane yi kuu dabab kandiwen ye dowad Yariman yaa baandiwen,
kowe yembed yi miin yiminban keriwen yaa kuu awandoon.
Ye kangkon yi kuu ben kiwaan yorokmo arimbed
kinban wenene siti yaa nandoon.
Yi kuu Yariman ye womoniyiibban ye mimyob dowaken ye dowad ye yaa eso andime,
kwane binangke ye yaa anam andi yeman ongmenaboon ye dowad kangkon eso andime.
Amborom kuu kane kane yi kuu moom bobniwen kuu bangkandoone ane mikmoniwen,
kwane kane kane yi kuu mungi bobniwen kuu animan amun bangkandoone yiminmo keriwen kowe.
10 Yena kuu kumun aombed dobiriwen, kumun doromod bobnin aom kui,
yi kuu wiidan, seinbed yerengki ye durud yewediib dobiriwen kui.
11 Amborom kuu yi kuu anukbed God ye weng yaa wabkad kerenib,
Korem Burudandoon Arimbed ye God ye ongkandi yaa wunekariwen kowe.
12 Kwana kowe, yembed yi kuu ben deme yobdoodmo yaa kiraroon,
kwane yi kuu komborok andiwen kuu yi kuu awandi ye karuwiibban.
13 Kwanekorib dabab kandiwen ye dowad Yariman yaa baandiwen,
kowe yembed yi miin yiminban keriwen yaa kuu awandoon.
14 Kwane yembed kumun doromod bobnin aom kuu yi ben angkaderene,
yi yaa sein yerengkoon kuu buruwadmoon.
15 Yi kuu Yariman ye womoniyiibban ye mimyob dowaken ye dowad ye yaa eso andime,
kwane binangke ye yaa anam andi yeman ongmenaboon ye dowad kangkon eso andime.
16 Amborom kuu yembed wii ambongko broonsbed ongmiwen kuu wowe monmarene,
yerengki yeman awurimbed ongmiwen kuu nare kiradmoon kowe.
17 Yena kuu yika wabkad keri ye inamen yaambed inameniibbandan kerenib,
ambarakmenabiwen kumbed durud yewed kandiwen.
18 Kwane yi kuu animan korem yaa komyeng areb kerundekorib,
bobni ambongko yaa winiwen.
19 Kwanekorib dabab kandiwen ye dowad Yariman yaa baandiwen,
kowe yembed yi miin yiminban keriwen yaa kuu awandoon.
20 Kwane yembed weng kowoon kumbed yi kuu ongmendoon,
kwane yika monmari ye inamen yaa kuu burudande bindoon.
21 Yi kuu Yariman ye womoniyiibban ye mimyob dowaken ye dowad ye yaa eso andime,
kwane binangke ye yaa anam andi yeman ongmenaboon ye dowad kangkon eso andime.
22 Yi kuu munob konemoon areb ye yaa eso andime,
kwane ye ambangkanabi kuu dakme kubi yookbed wingkime.
23 Yena kuu motod aombed karamok ari winiwen,
yi kuu ok darewoob ari dewenenib berengke moonidan keriwen kui.
24 Yi kuu Yariman ye ambangkanabi wedmiwen,
binangke ye yaa anam andi yeman karamok niindem yiri ongmenaboon kui.
25 Amborom kuu yembed yedmoone nuuwa ama arewa kamene
oknondok darewoob ambab ari ben daanebeen kowe.
26 Oknondokbed yi kuu kan ambid ari daanekoru kan niindem yiri kubunekoru kameen,
kwane arud darewoob aom aomniwen kumbed aromkonoyiibban dubendebenmo keriwen.
27 Kwane yi kuu awarak yimaundan areb kanwene kudore kudore kamenib,
inamen amun kandindeban keriwen.
28 Kwanekorib dabab kandiwen ye dowad Yariman yaa baandiwen,
kowe yembed yi miin yiminban keriwen yaa kuu ben angka nongkoboon.
29 Yembed nuuwa ama yaa yedmoone dowan keroon,
kowe karamok yu oknondok kuu kan kubune yewenub kereen.
30 Yewenub keruune yi kuu kubiwen,
kwane yembed ben kinban wene yimbed wirinande meeniwen yaa be monoon.
31 Yi kuu Yariman ye womoniyiibban ye mimyob dowaken ye dowad ye yaa eso andime,
kwane binangke ye yaa anam andi yeman ongmenaboon ye dowad kangkon eso andime.
32 Kwane yi kuu nimakarub nedbimaib aombed ye aningko kankoonenib,
aamkono aamkono nedbimaib aombed ye aningko kankoonime.
33 Yembed ok awaan kuu amonomboone koknoonbon okad keruune,
kirubdem menebenaun ye okad kuu kebenoone okad kamkonombonmo keruune,
34 yob irimaan ye okad kuu amonomboone kab kainindeban ye okad kereen,
amborom kuu kuyaa doriibdan kuu miin arewa kamenabimaib kowe.
35 Angkon amaan yembed amaan koknoonbon okad kuu amonomboone ok bumbon ye okad keruune,
okad kamkonobonmo kuu amonomboone kirubdem menebenaun ye okad keruune,
36 mungi bobniwendan kuu kuyaa ben monoone,
yimbed siti yenbekorib dobiriwen.
37 Yi kuu mongkobon ongmekorib nong yob kab kibingkiiwe
yob yemoonmo ire wonoone wandiwen.
38 Yembed yi yaa amun kerundoone yemoon ariyiib yidwaroon,
kwane yi dingkan amongkob kangkon ma domondoona nombere yiri kubunindo yemoon ariyiib keriwen.
39 Amaanbed yi kuu nombere kamene yiri keroon,
kwane dabab wayiriyiib miin yiminban keriyiib mimyob wandiyiib kumbed kan kubune yirimbed keriwen.
40 Yembed yi korok korok yi dowad miin arewa ande ambodiibban kerundekore,
kiwaaniibban ye amboon yaa ben nongkoboone awerenmo yariwen.
41 Kumban yembed nub yaa awandok andidan kuu yi yaa dabab angkeen yaa benkoobekore,
yi nimadana kuu ongmendoone sibi wad yemoon areb yemoon ariyiib keriwen.
42 Kangdommo dobiridan kuu kuyaa wedmekorib kubiwen,
kumban arewa kamenabidan kuu mungkod karangkiwen.
43 Kanembed ye kuu meeni kangdomiib keroka weng anuk angkeen kuyaa kaadkerok.
Kwane ye kuu Yariman ye womoniyiibban ye mimyob dowaken kerekmen yaa meenok.
Copyright information for `YON