Psalms 119

Yook 119

Alef

1Kaneya yi kuu yi dobiri kerekmen kuu demkoronmo kuu amun kerundoon,
 Yariman ye amob awine kandi kerekmen yaambed doriibdan kui.
2Kaneya yi kuu ye kerekmen korokboon ye weng yaa awine kande doriib kuu amun kerundoon,
yi meeni inamen kumundin kumbed ye ande onmiibdan kui.
3Yi kuu angkon unitab ye inamen yaa ma awinimokban kerenib
ye kiwaan arimo weniib kui.
4Ebbed eb kongamki yamob dakme nongkobewen kuu,
nubbed korem awine kande amukni dowad.
5Ne dowaken darewoob kuu ne inamen kuu kangdommo kerok,
ebbed wongkewen yamob awine kandi dowad.
6Ebbed kwanime andi ye weng ongmewen kuu andangke meenaniin kuu
ne kuu karak bobni yaa nen kowaibban.
7Ne kuu eb wengyundi yorokmo yaa kaadkeraniin kuu
ne niindem aom kangdommo kereni eb yaa eso andaniin.
8Ne kuu ebbed wongkewen yamob awine kandaniin,
ne kuu kumundin domowaab.

Bet

9Kewedman kuu komarewa kere ye dobiri kerekmen kuu karadmo keraneen?
Ye kuu eb weng yaambed dobaraneen kumbed kii.
10Ne kuu ne niindem aom kumundin kumbed eb ande onmiin,
domowaawe ebbed kwanime andi ye weng kuu domonene kimyen wanain.
11Eb weng kuu kube ne niindem aom awine amuknaan,
eb yaa ambarakmain andi dowad.
12O Yariman, amun kerundi kuu eb yaa angkeen,
ebbed wongkewen yamob kuu kedmengkawe.
13Eb mongkodkonombed dakmewen yamob korem kuu
nembed dakmenabaan.
14Yiribman yemoon kai ye karubbed ye yiribman yaa kubemoon areb kuu
eb kerekmen korokbewen ye weng awine kandi yaa kubaan.
15Ne kuu eb kongamki yamob kuu kube meendobeni,
eb dobiri kerekmen yaa kuu andangke meendobaniin.
16Ne kuu ebbed wongkewen yamob yaa kubaniin,
kwane eb weng kuu nonondandainban.

Gimel

17Eb dememan ne yaa amun amun kamewe.
Kwananeeb kuu wad dobereni eb weng awine kande dobaraniin.
18Ne indob nandebko
manimanandeb ye weng eb amob aom kuu wedmenaba.
19Ne kuu okad kari kee norod karub kowe,
ebbed kwanime andi ye weng kuu ne yaa biknewaab.
20Ne kuu ebbed dakmewen ye amob yaa moom dowakeniib kowembirimain kowe,
ne niindem aom kuu yewed aneen.
21Kerengkandan kuu butun kamendewen, yi yaa kuu ongkandimaab,
kwane yi kuu ebbed kwanime andi ye weng yaa koronde kimyen winimaib.
22Ne kuu eb kerekmen korokbewen ye weng yaa awinaan kowe,
damangkawidaniib ne yaa daawidaniib ne yaa kuu ben kiradme.
23Korok korok kuu nedbe diberenib ne yaa wengamborokbanabimaib kuned,
eb dememan ne kuu ebbed wongkewen yamob yaa kube meendobembirimain.
24Eb kerekmen korokbewen ye weng kuu dowaken darewoowiib keraan,
kuye weng kuu ongkande inamen yaa awandidan areb.

Dalet

25Ne kuu nen okad yiri kankubunoon kowe,
eb weng yaambed ne nen ongmebko wadkera.
26Ne dobiri kerekmen dakmaana ebbed inanduwewen,
ebbed wongkewen yamob kedmengkawe.
27Eb kongamki yamob ye kerekmen kedmengkawebko kaadkera,
kwananeeb kuu binangke eb yaa anam andi yeman yaa kuu kube meendobaniin.
28Ne niindem aom kuu mimyob wandaan kumbed wuud kere wanaan,
eb weng yaambed aromkono kawe.
29Birandi ye inamen ne meeni aom angkeen kuu kankorare.
Ne yaa kuu amun kame eb amob kedmengkawe.
30Ne kuu inamen ongmeni ma korondiyiibban weng awini kerekmen yaambed doriin,
ne kuu ebbed dakmewen ye amob awine kanda andaan.
31Eb kerekmen korokbewen ye weng kuu kamkonomo awinaan,
o Yariman, ne kuu nen karak ari kowaab.
32Ebbed kwanime andi ye weng ye kiwaan arimbed dodkanmo weniin,
amborom kuu ne yaa kuu inamen kaadkeri ariyiib kawewen kowe.

He

33O Yariman, ebbed wongkewen yamob awini ye kiwaan kedmengkawe.
Kwananeeb kuu kuyamob kuu awine kande dobaraniine wene yimin wandaneen.
34Ne yaa inamen kaadkeri kankawebko eb amob wengambere awineni
ne niindem aom kumundin kumbed awine kanda.
35Ne onmewebko ebbed kwanime andi ye weng kerekmen ye kiwaan arimbed dodkanmo wana,
amborom kuu kuyaa kuu kubi dowakeniib kerimain kowe.
36Eb kerekmen korokbewen ye weng yaa kuu ne mimyob nenduneb amonombe ari kowe.
Ne kuu ongmewebko kirim ye inamen kuu koronda.
37Kerengkan keri ye kumkam yaa kuu ne indob kuu kiwaan kimyen yaa nen kowe.
Eb kerekmen yaa dobiri ye inamen ika kawebko awine aromna.
38Eb dememan ne yaa ebbed weng kunduk kowewen kuu kwane awine.
Kwananeeb kuu une bumangki ye inamen kuu darewoob keraniin.
39Yi damangkawi weng yaa wengambere unaan kuu kankorare,
amborom kuu ebbed dakmewen ye amob kuu amun kowe.
40Kedi, eb kongamki yamob yaa kuu moom dowakeniib kowembirimain kii,
Eb yorokmo kerekmen yaambed ne kuu ongmewebko wadkera.

Waw

41O Yariman, eb womoniyiibban ye mimyob dowaken kuu ne yaa monok.
Eb weng kunduk yaambed ne kuu arewa yaa burudande nende.
42Kwananeeb kuu damangkawi ye karub yaa inandunaniin,
amborom kuu eb weng yaa angkumone doriin kowe.
43Ne kuu ebbed dakmewen ye amob yaambed kwananeen ande yedmaan kowe,
eb amob ne mongkodkono ari angkeen kuu bingewande kanwanaab.
44Kowe ne kuu eb amob yaamo awine kamembaraniin,
aron korem korem.
45Kwane ne kuu obonmo aombed wananiin,
amborom kuu eb kongamki yamob awine dobiri kerekmen onmimain kowe.
46Ne kuu eb kerekmen korokbewen ye weng kangkon kingdan yaa dakmendaniin,
kwananiin kuned karak kandainban.
47Kwane ne kuu ebbed kwanime andi ye weng yaa kubi dowakeniib kerimain,
amborom kuu ne inamen mimyob korem kuu kuyaa kowaan kowe.
48Ebbed kwanime andi ye weng kuu barang darewoob ande kankoonimain,
kuyamob kuyaa kuu ne inamen mimyob korem kowaan,
kwane ne kuu ebbed wongkewen yamob kuu kube meendobembaraniin.

Zayin

49Eb weng kunduk eb dememan ne yaa kawewen kuu ika meene,
amborom kuu ebbed ne yaa kuu ari kwananeen andi ye inamen kawewen kowe.
50Ne dabab kandaan yaa mimyob wandi kankubuni yeman kukei,
eb weng kunduk yaambed ongmeweewa wadkeraan.
51Kerengkandanbed ne yaa kuu naawonmo damangkawimaib,
kumban ne kuu eb amob yaa koronde kimyen winimokban.
52O Yariman, eb amob unyeman anukbed dakme nongkobewen kuu ika meenaan,
kowe ne mimyob wandi kuu kankubunoon.
53Arewa kamenabidanbed eb amob yaa wunekariwen kuyaa kuu
amot denemoon areb yi yaa naawonmo kongendaan.
54Ebbed wongkewen yamob kuu ne yook kii,
okad kari kee norod doriin yaron aombed kui.
55O Yariman, amnoom kuu ewaningko yaa ika meenimain,
kwane eb amob awine dobaraniin.
56Ne kwane awine dobara andi ye weng kukei,
eb kongamki yamob kuu awine kandimain.

Het

57 Yariman, ne dobiriyiib yumboniib kuu ebbed ongmewen.
Ne weng kunduk ongmaan kuu eb weng awine kandembara andaan.
58Ne niindem aom kumundin kumbed eb kubi dowaken kuu ne yaa keewe.
Eb weng kunduk yaambed kabamon kondewen ye mimyob dowaken keewe.
59Ne dobiri kerekmen yaa andangke meendobaan kowe,
amonombeni eb kerekmen korokbewen ye weng ye yoman dodkanmo weniin.
60Ne kuu erebnarainban nindorokiibbed
ebbed kwanime andi ye weng awine kandaniin.
61Arewa kamenabidanbed ne kuu nen nongbed yerengkaniib kuu
ne kuu eb amob nonondandainban.
62Ebbed dakmewen ye amob kuu yorokmo kowe,
amnomnom yaambed yeedereni eb yaa eso andaniin.
63Ne kuu eb yaa unimaibdan yaa angkodmendimain,
eb kongamki yamob awinimaibdan kangkon angkodmendimain.
64O Yariman, okad kari kee eb womoniyiibban ye mimyob dowaken kuu derendaroon.
Ebbed wongkewen yamob kuu kedmengkawe.

Tet

65Eb dememan ne yaa kuu amunmo kamenabewen,
o Yariman, eb weng yaambed kwane kamewen kui.
66Ebbed kwanime andi ye weng yaa anam andaan kowe,
andangki amuniib inamen kaadkeriyiib kedmengkawe.
67Dabab ne yaa minindo yaron anuk kuu ne kuu kimyen wanaan,
kumban kibikee ne kuu eb weng awine kandimain.
68Eb kuu amun, angkon eb kuu amunmo kamenabimaab,
kowe ebbed wongkewen yamob kuu kedmengkawe.
69Kerengkandanbed ne dowad dudanabi weng dakmiwen kuned,
eb kongamki yamob kuu ne niindem aom kumundin kumbed awingkaniin.
70Yi niindem aom kuu kamkonomo,
kumban ne kuu eb amob yaa kubi dowakeniib kowaan.
71Dabab ne yaa monoon kuu amun,
amborom kuu kuyaambed ebbed wongkewen yamob kedmengkawoon kowe.
72Eb mongkodkonombed dakmewen yamob kuu miin manimanandeb andaan,
od gold tausen yemooniib od silvaa tausen yemooniib arebban.

Yod

73Ne kuu eb dingkimbed ongmewen, kwane ebbed ne id kuu wuub nimingkewen,
kwane ebbed inamen kaweebkob ebbed kwanime andi ye weng kuu nekaadkeraan.
74Ne kuu eb weng yaambed anam kwananeen ande meedme doriin kowe,
eb yaa unimaibdan kuu ne yaa wedmewenib kubime.
75O Yariman, nekaad eb wengyundi weng kuu yorokmo kii,
kwane eb ma korondiyiibban weng awini ye kerekmen yaambed eb kuu ne yaa didangke dabab kawewen.
76Eb dememan ne yaa weng kunduk kowewen yaambed kwane ambangkoko,
eb womoniyiibban ye mimyob dowaken kumbed ne mimyob wandi kankubunok.
77Eb amob yaa kubi dowakeniib keendimain kowe,
mimyob keewebko wad dobara.
78Kerengkandanbed ne dowad dudanabi weng dakmimaib kumbed ne yaa ambarakmimaib kowe, ebbed yi yaa karak konde.
Kumban ne kuu eb kongamki yamob yaa kube meendobaniin.
79Eb yaa unimaibdan kuu neyiib yaa minime,
eb kerekmen korokbewen ye weng yikaaddan kui.
80Ebbed wongkewen yamob yaa kuu ne niindem aom ambarakmiyiibban kerok,
kwananeen kuu ne kuu nen karak ari kowaibban.

Kaf

81Ebbed arewa yaa burudande nendi dowad ne niindem aom kuu moom dowakeniib koweni miin yiminban keraan,
kumban eb weng yaa kwananeeb ande kowaan kii.
82Ne kuu eb weng kunduk yaa kwanok ande onmoni nindob yidnoon,
kwane yedmimain, “Komo aron arimbed ne mimyob wandi kuu kankubunaneeb?” andimain.
83Ne kuu wain ok yeman ba kadbed ongmiwen amareng aom angkemoon areb keraan kumban,
ne kuu ebbed wongkwewen yamob yaa nonondandainban.
84Eb dememan ne kuu aron komoyiib kwane meedmaniin?
Komo aron arimbed ebbed ne nenbandimaibdan yaa kuu ukum kondaneeb?
85Kerengkandanbed ne kombiri dowad dem nidkanabiwen,
kowe eb amob dookbiwen.
86Ebbed kwanime andi ye weng korem kuu angkumone dori yeman.
Karub kuu dudanabe nenbandimaib kowe awawe.
87Yimbed okad kari kee ne kuu monmarok andiwen,
kumban ne kuu eb kongamki yamob yaa ma wunekarindo.
88Eb womoniyiibban ye mimyob dowaken yaambed ongmewebko wadkera.
Kwananeeb kuu eb kerekmen korokbewen ye weng ebbed dakmewen kuu awinaniin.

Lamed

89O Yariman, eb weng kuu aron korem kwane angkimbaraneen,
eb weng kuu Ewen aombed kangdommo awine angkeen.
90Eb ma korondiyiibban weng awini kerekmen kuu nimakarub yaro dobere dobere yaro wananiib korem aom kwane angkimbaraneen.
Ebbed okad kee ongmeneb yumbon koweewa, kwamunemo angkimbureen.
91Kumkam korem kuu ebbed dakmewen ye amob yaambed kwane dangoon,
amborom kuu kumkam korem kuu eb deme yeman kowe.
92Ne kuu eb amob yaa kubi dowakeniib kerindo karen,
dabab ne yaa monoon kumbed bobnaan karen.
93Eb kongamki yamob kuu ma nonondandainban,
amborom kuu kuye amob yaambed ebbed ongmeweewa wadkeraan.
94Ne kuu ebman kowe, ne kuu arewa yaa burudande nende,
amborom kuu eb kongamki yamob awine dobiri kerekmen onmimain kowe.
95Miin arewa kamenabidan kuu ne neene monmarem ande meedmiib,
kumban ne kuu eb kerekmen korokbewen ye weng yaa andangke meendobaniin.
96Nembed kumkam korem wedmaan kuu ye yiminiibmo kii,
kumban ebbed kwanime andi ye weng kuu ye yiminiibban kii.

Mem

97O, eb amob kuu mimyob dowaken darewoob kerimain kii!
Aronki doboob kuu kuyaamo meenme andangkembirimain.
98Ebbed kwanime andi ye weng awinaan kumbed meeni kangdom keraan, ne bondan arebban,
kedi, kuye weng kuu kwane awinembirimain kii.
99Eb kerekmen korokbewen ye weng yaa kube meendobimain kowe,
inamen niindem aom andangke bi kerekmen arimbed kandaan, ne kedmengkawiibdan arebban.
100Eb kongamki yamob awine kandaan kowe,
inamen kaadkeri arimbed kandaan, aamkono aamkono arebban.
101Ne kuu arewa kami ye kiwaan kuu ma wanain ande wunekaraan,
eb weng awine kandi dowad.
102Ne kuu ebka kedmengkawewen kowe,
ebbed dakmewen ye amob yaa kuu doombere angkanindo.
103Eb weng ambod ne kandaan kuu maa kai kii,
ne mongkodkono aom kuu in ye ambod kuu burudande arimbed keroon!
104Eb kongamki yamob yaabed inamen kaadkeri kandimain,
kwanekob ne kuu abdon kami kiwaan korem yaa kuu dowakenban odkenebmo kerimain.

Nun

105Eb weng kuu lem areb ne yonbed amunmo dodkan wini yaa nambiri yeman,
eb weng kuu ne kiwaan yaa nambiri yeman kui.
106Ebbed dakmewen ye amob yorokmo kuu awina ande kowaan,
nangkon ee anam kwane awinaniin andaan.
107Ne kuu durud yewed yemoon kandaan,
o Yariman, eb weng yaambed ongmewebko wadkera.
108O Yariman, ewaningko kankooni weng nindorokiibbed dakmaan kuyaa kuu ee yimin ande.
Kwane ebbed dakmewen ye amob kuu kedmengkawe.
109Ne kuu arudbon aom awunimain kuned,
eb amob nonondandainban.
110Miin arewa kamenabidan kuu ne dowad yi kawaad nong kowiwen kuned,
ne kuu eb kongamki yamob yaa domonde kimyen winindo.
111Eb kerekmen korokbewen ye weng wengambere aron korem awini ye yumbon kandaan,
kuye weng kumbed ne niindem aom kubi darewoob kerunimaan.
112Ebbed wongkewen ye amob kuu awine kanda ande nekwaan,
aron korem, kwane wene yimin wandi yimin yaamo keraniin.

Samek

113Aadidmidan kuu naawonmo kongendimain,
kumban eb amob yaa mimyob dowaken kowaan.
114Eb kuu ne biknimbon kere ne kombe kii,
eb weng yaambed kwananeeb ande meedmiin.
115Miin arewa kamenabidan, ne yaa angkanime,
kwananiib kuu ne Godbed kwanime andi ye weng kuu awinaniin.
116Eb weng kunduk yaambed angkumone awawebko ne kuu doberembara,
kwanebko ne kwananeeb andi kuu kombere monmarain.
117Ne kuu ebbed wongkewen yamob yaa amun andi dowad angkumone awawe.
Kwananeeb kuu arud ye barangbed ne kuu ma monmaraanban.
118Ebbed wongkewen yamob yaa domonde kimyen winimaibdan kuu ebbed wunekarundimaab,
amborom kuu yi birandi kuu dawangmo kaimaib kowe.
119Okad kiri miin arewa kamenabidan kuu ebbed kemengkod aremoon areb kerewen,
kwanekob ne kuu eb kerekmen korokbewen ye weng kuu mimyob dowaken kowimain.
120Eb yaa uneni ne id kumundin kiringmimain,
kwane eb wengyundi yaa unimain.

Ayin

121Ne kamenabaan kuu yorokmo anammo kerekmen yaambed kwamaan,
kowe ne kuu ne bondan yaa nen kondaab.
122Eb dememan ne yaa kuu amun amun kamebdaniin ande kowe.
Korondaawa kerengkandanbed ne yaa dabab wayiraib.
123Ebbed ne kuu arewa yaa burudande nende ande onmoni nindob yidnoon,
kwane eb weng yorokmo yaa kangkon kwanimain.
124Eb dememan ne yaa kuu eb womoniyiibban ye mimyob dowaken yaambed kame.
Kwane ebbed wongkewen yamob kuu kedmengkawe.
125Ne kuu eb dememan, inamen kaadkeri kankawe,
eb kerekmen korokbewen ye weng nekaadkeri dowad.
126O Yariman, kuned kuu ebbed ambangki yaron kii,
amborom kuu eb amob domabangkaib kowe.
127Anamaa, ebbed kwanime andi ye weng kuu mimyob dowaken kowaan,
bot gold arebban, bot gold yankorenmo arebban kui.
128Kwanekob, inamen korem yaa kuu eb kongamki yamob kuu yiminmo ande wedmaan,
kowe dudanabi kiwaan korem yaa kuu naawonmo kongendimain.

Pe

129Eb kerekmen korokbewen ye weng kuu manimanandeb amun kai,
kowe ne kuu kwane awine kandimain.
130Eb wengbed ambobimaan kuu nambiri kondimaan,
kwane eb weng kuu mengmengiibban iwari doriibdan yaa inamen kaadkeri kondimaan.
131Eb weng dowad ne mongkod daande moom kowembirimain,
amborom kuu ebbed kwanime andi ye weng yaa moom dowakeniib kowembirimain kowe.
132Ne yaa murubia kaweneb ne yaa mimyob keewe kakman are nonondande.
Eb yaa mimyob dowaken keebdimaibdan yaa komo kamimaab kuu ne yaa kwamunemo kame.
133Eb weng yaambed ne yon dodkanmo wini kerekmen yaa kangkadmewe.
Korondaawa ambarakmimbed ne yaa ma oone dobaraan.
134Karubbed ne yaa dabab kawembiri yaa kuu ne nen bidde obon kowe.
Kwananeeb kuu eb kongamki yamob awine kandaniin.
135Eb dememan ne yaa kuu kubi dowakeniib keewe amun keruwe.
Kwane ebbed wongkewen yamob kuu kedmengkawe.
136Nimakarub kuu eb amob kuu awine kandokban kowe,
ne indob inok kuu ok mana areb menebimaan.

Tsadhe

137O Yariman, eb kuu yorokmo,
kwane eb wengyundi kuu kangdommo.
138Eb kerekmen korokbewen ye weng kowewen kuu yorokmo,
kuye weng kuu angkumone dobiri yeman kumbedmo.
139Ne bondan kuu eb weng wunekare nonondandiwen kowe,
anam ambarakmiwen kii ande ne niindem aom denobeen.
140Eb weng kuu karadmo,
kowe eb dememan ne kuu kuyaa mimyob dowaken kowimain.
141Ne kuu yiri mana kere kwane akmendandiwen,
kuned eb kongamki yamob kuu nonondandainban.
142Eb yorokmo kerekmen kuu aron korem korem yeman,
kwane eb amob kuu anammo.
143Dabawiib durud yewediib ne ari meneboon,
kumban ebbed kwanime andi ye weng yaa kuu kubi dowakeniib kowaan.
144Eb kerekmen korokbewen ye weng kuu aron korem yorokmo yeman,
inamen kaadkeri kuu kawebko wad dobara.

Kwof

145O Yariman, ne niindem aom kumundin kumbed eb yaa baandaan kowe inanduwe.
Ne kuu ebbed wongkewen yamob awine kandaniin.
146Ne kuu eb yaa baandaan kowe, ne kuu arewa yaa burudande nende.
Ne kuu eb kerekmen korokbewen ye weng awine kandaniin.
147Ne kuu warindombed yaro dembeni eb yaa awawe ande baandimain,
eb weng yaambed kwananeeb ande meedmiin.
148Eb weng meenme andangki dowad
ne kuu amki unuk angkimokban.
149Eb womoniyiibban ye mimyob dowaken yaambed ne weng wengambere.
O Yariman, ebbed dakmewen ye amob yaambed ongmewebko wadkera.
150Inamen arewa ongmenib ne nenbandande kamiibdan kuu ne dia keriwen kii,
kumban yi kuu eb amob yaa ambab angka doriib.
151O Yariman, eb kuu ne dia,
kwane ebbed kwanime andi ye weng korem kuu anammo.
152Unyeman anukbed ne kuu eb kerekmen korokbewen yaambed nekaadkeraan kuu,
ebbed kuye weng kuu aron korem kwane angkimbiri yeman ongmewen.

Res

153Dabab ne yaa monoon kuyaa wedmeneb ne nen burudande angka kowe,
amborom kuu eb amob kuu ne nonondandimokban kowe.
154Ne dowad koromoni weng nekweneb ne kuu bidde.
Eb weng yaambed ongmewebko wadkera.
155Arewa kamenabidan kuu arewa yaa burudande bindi kerekmen yaa ambab angka doriib,
amborom kuu ebbed wongkewen yamob awine dobiri kerekmen onmimokban kowe.
156O Yariman, eb mimyob keende kakman are nonondandi kerekmen kuu miin darewoob arimbed,
ebbed dakmewen ye amob yaambed ongmewebko wadkera.
157Ne yaa dabab kawidaniib ne bondaniib kuu yemoon,
kuned ne kuu eb kerekmen korokbewen ye weng yaa kuu koronde kimyen winimokban.
158Koyabdan yaa kuu wedmendekori komyeng areb kerimain,
amborom kuu yi kuu eb weng awinimokban kowe.
159Eb kongamki yamob yaa mimyob dowaken kowimain kuu wedme.
O Yariman, eb womoniyiibban ye mimyob dowaken yaambed ongmewebko wadkera.
160Eb weng korem kuu anammo,
kwane ebbed dakmewen ye amob yorokmo korem kuu aron korem kwane angkimbaraneen.

Sin

161Korok korok kuu idiibbanbed ne yaa nenbandimaib,
kumban ne kuu eb weng yaa binangke une kuu anammo kii andimain.
162Ne kuu eb weng yaa kubimain,
odamod miin darewoob wedme kandoon ye karub areb kerimain.
163Ne kuu dudanabi yaa naawonmo kongendeni komyeng areb kerimain,
kumban ne kuu eb amob yaa mimyob dowaken kowimain.
164Ne kuu aronki mimo aom kuu ewaningko kankoone ediib kerimain,
ebbed dakmewen ye amob yorokmo ye dowad.
165Eb amob yaa mimyob dowaken kowimaibdan kuu yewenub darewoob kai kondimaab,
kwane yi kuu komo yaambed ma boknande kombaraibban kii.
166O Yariman, ebbed nende burudande angka kowi kuu ne yaa monok ande meedmiin,
kwane ne kuu ebbed kwanime andi ye weng yaambed kwane ambangkimain.
167Eb kerekmen korokbewen ye weng kuu awine kandimain,
kuyaa kuu mimyob dowaken miin darewoob kowimain.
168Ne kuu eb kongamki yamowiib eb kerekmen korokbewen ye wengiib awine kandimain,
amborom kuu ne dobiri kerekmen kumundin kuu ebkaadmo kowe.

Taw

169O Yariman, ne baandi kuu wengambere.
Eb weng yaambed inamen kaadkeri kuu kankawe.
170Ne kaamoni kuu wengambere.
Eb weng yaambed ne kuu arewa yaa burudande nende.
171Ne mongkodkono kuu ewaningko kankooni wengbed diire darewoob kerok,
amborom kuu ebbed wongkewen yamob kuu kedmengkawimaab kowe.
172Eb weng dowad yook wingka,
amborom kuu ebbed kwanime andi ye weng korem kuu yorokmo kowe.
173Ne awawi dowad eb dingki kuyaa kowe,
amborom kuu eb kongamki yamob kerekmen yaa kine kowaan kowe.
174O Yariman, ne kuu ebbed ne nen arewa yaa burudandi yaa kuu moom dowakeniib kowimain,
kwane eb amob yaa kuu kubi dowakeniib kowimain.
175Korondebko ewaningko kankooni dowad dobara,
kwane ebbed dakmewen ye amob kuu ne yaa awawok.
176Ne kuu sibi biknemoon areb awerendobenmo yarebiin kowe,
eb dememan ne dowad mene kerekne onme,
amborom kuu ne kuu ebbed kwanime andi ye weng kuu ma nonondandimokban kowe.
Copyright information for `YON