Psalms 141

Yook 141

God yaningko kankooni ye yook Dewidbed wongkoon.

O Yariman, eb yaa baandaan kii, kirod mene awawe.
Ne baandi eb yaa kuu wengamberewe.
Ne kurikuri eb yaa ben kabdiin kuu baeb amun kabdi areb kerok.
Ne dingki benkoobi kuu oobnon yaa ye dingkan aye nengke baeb kabdi areb kerok.
O Yariman, ne mongkodkono yaa kangkadmi kerekmeniib ongme.
Kwane ne mandakad ambongko yaa kuu weng amunmo dakmi dowad oone kerendombiri kerekmeniib ongme.
Korondaawa ne niindem aom kuu arewa kami aom kubunaan.
Korondaawa ne kuu inamen arewa ambangkain.
Kane kane kuu arewa kamenabimaib kuu,
korondaawa yi orokbon yaa wene anain.
Korondebko yorokmomanbed ye mimyob dowaken keendi kerekmen yaambed ongkawe ukum kawok.
Kukuu ne korok ari bune amun keruwi ye oiyo areb.
“Yii, ne korok ari bunaab.” andainban.
Arewa kamenabidanbed arewa kamenabimaib kuu kebenok ande kurikuri kamembirimain.

Yi wengyundi korok korok kuu aangko dungkun nare kubuneen yiri ben kiraraneen.
Ne weng kuu amun kowe yi kuu wengambaraniib.
Okad kuu nidke aangke ben kiradmemoon areb
yi kono kono kuu bobkonombon ambongko yaa ben kiradmaniiwe amone dange wananeen.
O Yariman Ambengkan, ne indob kuu eb yaa nengmonaan.
Ne kuu ebbed kukbimaabbon aom doriin kowe, ne kuu kan bobni ari kowaab.
Ne kuu yi kawaad nong ne dowad ben nongkobiwen kuyaambed nen burudande angka kowe.
Ne kuu arewa kamenabidanbed ne kiwaan arimbed awinenok ande nongkobiwen kuyaambed nen burudande angka kowe.
10 Yimbed karub awingki ye men kan batangne awinewande kamiwen kumbed yika awinendoko,
ne kuu amunmo deburudanda.
Copyright information for `YON